އެމެރިކާގެ ސަމާލުކަން މި ރީތި ދޫންޏަށް

އެމެރިކާ އިން މީގެ ކުރިން ނުފެންނަ ވައްތަރެއްގެ ދޫންޏެއް ފެނިގެން އޭގެ ޖާދޫގައި އެތައް ހާސް ބަޔަކު ޖެހިއްޖެ އެވެ.

މީޑިއާތަކުން ރިޕޯޓްކޮށްފައިވާ ގޮތުން ނިއު ޔޯކްގެ އެންމެ ކާރޫބާރޫ ބޮޑު މެންހަޓަންގެ ސެންޓްރަލް ޕާކަށް ޒިޔާރަތްކޮށްގެން އުޅެނީ "މެންޑަރިން ޑަކް" އެކެވެ. މިއީ އާންމުކޮށް ޗައިނާ އާއި ޖަޕާން ފަދަ އިރުމަތީ އޭޝިއާގެ ގައުމުތަކުގައި އުޅޭ ދޫންޏެކެވެ.

އެމެރިކާ މީހުންނަށް މި ދޫނި ވެފައި މި ވަނީ މުޅިން އަލަށް ފެނުނު، ލޯބި އެއްޗަކަށެވެ.

މިކަމާ ބެހޭ ގޮތުން ނިއު ޔޯކް ސިޓީގެ ޕާކް އެންޑް ވައިޑް ލައިފްގެ އޮފިޝަލުންނާ ހަވާލާދީ ނިއު ޔޯކް ޓައިމްސް އިން ބުނީ މެންޑަރިން ޑަކް ސެންޓްރަލް ޕާކުން ފެންނަން ފެށީ މިދިޔަ މަހުގެ ފަހުކޮޅުން ފެށިގެން ކަމަށެވެ. އަދި އެ ތަނުގައި ވަރަށް ހަމަޖެހިލައިގެން އޭތި އުޅެމުން އަންނަ ކަމަށް ބުންޏެވެ. ނަމަވެސް މި ދޫނި އެތަނަށް ހިޖުރަ ކުރި ގޮތެއް ނޭނގޭ ކަމަށް ބުންޏެވެ.

"އޭތި ހިފާކަށް ވެސް އަހަރެމެން އެއްވެސް މަސައްކަތެއް ނުކުރަން. އަދި އޭގެ އަސްލު ވަޒަނަށް ފޮނުވައިލުމުގެ ވިސްނުމެއް ވެސް ނެތް،" އާބަން ޕާކް ރޭންޖާ ޖޯން މެކޯއި ވިދާޅުވި އެވެ. "އޭތި އިނީ ވެސް ވަރަށް ސިއްހަތު ރަނގަޅުކޮށް. ބަރާބަރަށް ކައި ހަދައި އުދުހި ވެސް ހަދާ. އާންމުކޮށް އުޅެނި ޕާކްގައި އޮންނަ ފެންގަނޑު ތެރޭގައި."

އޮފިޝަލުން ބުނި ގޮތުގައި މެންޑަރިން ޑަކް ބަލައިލަން މިހާރު ސެންޓްރަލް ޕާކަށް ކޮންމެ ދުވަހަކު ވެސް އެތައް ބަޔަކު ޖަމާވެ އެވެ. އަދި މީގެ ސަބަބުން އެތައް ބަޔަކަށް އުފާވެރިކަން ގެނުވައިދީ ގިނަ ބައެއް މޫނު މައްޗަށް ހިނިތުވުން ގެނެސް ދީފައިވާ ކަމަށް ބުންޏެވެ.

މި ދޫނި ޕާކްގެ އެކި ދިމަދިމާލުގައި އުޅެނިކޮށް ފޮޓޯ އާއި ވީޑިއޯ ނަގައި ވަރަށް ގިނަ ބަޔަކު އަންނަނީ ސޯޝަލް މީޑިއާގައި ވެސް ހިއްސާ ކުރަމުންނެވެ.

މެންޑަރިން ޑަކަށް ލިބުނު ސަމާލުކަމާ އެކު ނިއު ޔޯކްގައި އުޅޭ ވަރަށް ގިނަ ފޮޓޯގްރާފުންގެ ލެންސްތަކަށް ވެސް އޭތި ވަނީ އަރައިފަ އެވެ. އަދި އެމެރިކާގެ ވަރަށް ގިނަ ސިޓީތަކުން ވެސް މިހާރު އެ ދޫނި ބަލައިލަން މެންޙަޓަން ކޮންމެ ދުވަހަކު ވެސް އެތައް ބަޔަކު ޒިޔާރަތް ކުރާ ކަމަށް ސެންޓްރަލް ޕާކުން ބުންޏެވެ.