ކޮންސިއުލޭޓް ސްޓާފުން ސަލާމަތް ކުރުމުގެ ތައުރީފް އަންހެން އޮފިސަރަކަށް

ކަރާޗީ (ނޮވެމްބަރު 24) - ޕާކިސްތާނުގެ ކަރާޗީގައި ހުންނަ ޗައިނާ ކޮންސިއުލޭޓަށް އިއްޔެ ދިން ބަޑީގެ ހަމަލާތަކުގައި ކޮންސިއުލޭޓުގެ ސްޓާފުން ސަލާމަތް ކުރުމުގައި އިސްކޮށް އުޅުނު ފުލުހުންގެ އަންހެން އޮފިސަރަށް ގިނަ ބަޔަކު ތައުރީފް ކުރަން ފަށައިފި އެވެ.

ކޮންސިއުލޭޓަށް ވަންނަން މަސައްކަތް ކުރި ބަލޮޗިސްތާން ލިބަރޭޝަން އާމީ (ބީއެލްއޭ) ގެ ޓެރަރިސްޓް ހަނގުރާމަވެރިންގެ ހަމަލާތައް ނާކާމިޔާބުކޮށްލުމުގެ އޮޕަރޭޝަނުގައި އިސްކޮށް ހުރީ ސީނިއާ ސުޕްރިންޓެންޑެންޓް އޮފް ޕޮލިސް ސުހައި އަޒީޒް ތަލްޕޫރެވެ. އަތުބޮމާއި ރައިފަލާއި ގޮވާތަކެތި ހިފައިގެން ތިބި ހަނގުރާމަވެރިންނަށް ކޮންސިއުލޭޓް ތެރޭގައި ޑިޕްލޮމެޓިކް ސްޓާފުންނާ ހަމައަށް ނާދެވޭނެ ގޮތް ސުހައި ހެދި އެވެ.

ޓެރަރިސްޓުން ހުއްޓުވަން ދިން ހަމަލާގައި ފުލުހުންގެ ދެ މީހުން މަރުވި އެވެ. އަދި ހަމަލާ ދިން ތިން ހަނގުރާމަވެރިން ވެސް މަރާލި އެވެ.

ފުލުހުން ބުނީ ޓެރަރިސްޓުން ކޮންސިއުލޭޓަށް ވަންނަން ދިޔައީ ކާނާ އާއި ބޭސް ވެސް ހިފައިގެން ކަމަށެވެ. ބޭނުމަކީ ކޮންސިއުލޭޓް ސްޓާފުން ރަހީނު ކުރުން ކަމަށް ވެސް ބުންޏެވެ. ނަމަވެސް ކޮންސިއުލޭޓުގެ ގޭޓާ ހަމައިން ވަނީ ފުލުހުން ރައްދު ހަމަލާ ދޭން ފަށައިފަ އެވެ.

ސުހައި އަކީ ސިންދު ޕްރޮވިންސްގެ ޓަންޑޯ މުހައްމަދު ޚާން އަވަށުގެ އާދައިގެ އާއިލާއަކަށް ނިސްބަތްވާ މީހެކެވެ. ފުލުހުންގެ ޚިދުމަތާ އޭނާ 2013 ވަނަ އަހަރު ގުޅުނީ ސެންޓްރަލް ސުޕީރިއާ ސާވިސް އިމްތިހާނުން ފާސްވެގެންނެވެ.

"އަހަރެން ސްކޫލަކަށް ވައްދަން މައިންބަފައިން ނިންމުމުން އާއިލާގެ ވަރަށް ގިނަ މީހުން ނުރުހުންވި. އެހެންވެ މަންމަ އާއި ބައްޕަ ވަނީ އަވަށް ދޫކޮށް ކައިރި އެހެން ޓައުނަކަށް ބަދަލުވެފައި،" ސުހައި ބުންޏެވެ.

ސުހައިގެ ބައްޕަ އަޒީޒް ބުނީ އޭނާ ބޭނުންވީ ދަރިފުޅަށް ރަނގަޅު ތައުލީމެއް ދިނުމަށް ކަމަށެވެ.

"ބައްޕަ ބޭނުންވީ އަހަރެން އެކައުންޓެންޓަކަށް ވާން. އެކަމަކު އަހަރެން ގަބޫލްކުރި ގޮތުގައި އެއީ ފޫހި ވަޒީފާއެއް، ސުހައި ބުންޏެވެ.

ހަމަލާ އަށް ފަހު ސިންދު ޕްރޮވިންސްގެ ޗީފް މިނިސްޓަރު ކޮންސިއުލޭޓަށް ވަޑައިގެން ސުހައިގެ މަސައްކަތަށް ވަނީ ތައުރީފް ކުރައްވައިފަ އެވެ. ސިންދު ޕޮލިސްގެ ވެރިޔާ ވަނީ ގާއިދޭ އައުޒަމް ޕޮލިސް މެޑަލް އަށް ސުހައި ނޮމިނޭޓް ކޮށްފަ އެވެ.

ބޮޑު ވަޒީރު އިމްރާން ޚާން ވެސް ވަނީ ހަމަލާ ނާކާމިޔާބުކޮށްލި އޮފިސަރުންނަށް ތައުރީފް ކުރައްވައިފަ އެވެ. ސޯޝަލް މީޑިއާގައި ވެސް ސުހައި އަށް ދަނީ އެތައް ބަޔަކު ތައުރީފް ކުރަމުންނެވެ.