ޒުވާން ކެޔޮޅު: ފުލުހުންގެ ވަޒީފާ ދޫކޮށްލީ މަސްވެރިކަމުން ބޮޑު އާމްދަނީ ހޯދަން

ގއ. ގެމަނަފުއްޓަށް އުފަން އަލީ އަކްބަރަށް ރޭ ވަނީ ޒުވާން ކެޔޮޅުގެ މަގާމު ލިބިފަ އެވެ. އުމުރުން 31 އަހަރުގެ އަކްބަރު މަސްވެރިކަމުގެ ދާއިރާ އަށް ނުކުތީ 18 އަހަރުގަ އެވެ. އޯލެވެލް ނިންމުމަށް ފަހު 2004 ވަނަ އަހަރު މަސްވެރިކަމަށް ނުކުތީ، މިކަމަށް އޮތް ލޯތްބެއްގެ ބޮޑުކަމުންނެވެ. އެހެން ނަމަވެސް 2007 ވަނަ އަހަރު ފުލުހުންގެ ވަޒީފާއާ ގުޅުނީ އެދުވަސްވަރު މަސްވެރިކަން ދަށްވުމާ ގުޅިގެން ދެމެހެއްޓެނިވި އާމްދަނީއެއް ލިބޭނެ ވަޒީފާއަކަށް ދިއުމުގެ ބޭނުމުގަ އެވެ.

އޭގެ ހަ އަހަރު ފަހުން އަނެއްކާވެސް "އެންމެ ކުރާ ހިތްވާ" މަސްވެރިކަމާ އަކްބަރު ގުޅުނެވެ. އެ މަސައްކަތާ ގުޅުނީ ބޮޑު އާމްދަނީއެއް ލިބޭނެ ކަމުގެ އުންމީދުގަ އެވެ. ކަންތައްތައް ވެގެންދިޔައީ އުންމީދު ކުރިގޮތަށެވެ.

"އެންމެ ފުރަތަމަ މި މަސައްކަތް ފެށި އިރު ވަރަށް ބުރަކޮށް އުޅުނީ. އެކަމަކު މިހާރު ކުރިޔާ އަޅާ ބަލާއިރު ކުރަން ޖެހޭ މަސައްކަތް ވަރަށް ބޮޑަށް ލުއި. މަސް ދޯންޏަކުން ނުލިބޭނެ އެއްވެސް ހިދުމަތެއް މިހާރަކު ނޯންނާނެ. ކިތަންމެ ގިނަ ދުވަހަކު ކަނޑުމަތީގަ އުޅެން ޖެހުނަސް މިހާރު މައްސަލައަކަށް ނުވޭ،" އޭނާ ބުންޏެވެ.

އަކްބަރުގެ ބައްޕަ އާއި ކާފަގެ އިތުރުން އާއިލާގައި ގިނައީ މަސްވެރިންނެވެ. މަސްވެރިކަމުގައި 2012 ވަނަ އަހަރުން ފެށިގެން މިއަދާ ހަމައަށް އުޅޭ އިރު ލިބޭ އާމްދަނީވެސް ރަނގަޅެވެ.

"ފުލުހުންގެ މުއައްސަސާގައި އުޅުނު އިރު ވެސް ޗުއްޓީގައި އައިސް މަހަށް ދަން. އެންމެ ބޮޑު އާމްދަނީއެއް ލިބެނީ މަސްވެރިކަމުން. ފުލުހުންގެ ވަޒީފާ އިން ލިބޭ އާމްދަނީގެ ދެގުނަ މިހާރު ލިބޭ،" އޭނާ ކިޔާދިނެވެ.

މިއީ ޒުވާނުން ކުރަން އެންމެ ރަނގަޅު މަސައްކަތް ކަމަށް އޭނާ ބުންޏެވެ.

"ގެމަނަފުށީގެ 75 ޕަސެންޓް ޒުވާނުން ކޮށްއުޅޭ މަސައްކަތަކީ މަސްވެރިކަން. އުމުރުން ދޮށީ މީހުން މިހާރު ވަރަށް ނޫޅޭނެ. ގިނަ ވާނީ އުމުރުން 16 އަހަރާއި 35 އަހަރާ ދެމެދުގެ މީހުން. މަސްވެރިކަން ކުރާނީ ވަރަށް ޒަމާނީކޮށް. މަސް ދޯންޏެއްގައި އުޅުމާއި ގެއެއްގައި އުޅުމުގެ ތަފާތެއް ނެތް،" އަކްބަރު ބުންޏެވެ.

ގެމަނަފުށީގައި ގިނަ ޒުވާނުން މަސްވެރިކަމުގައި އުޅުނަސް، ރާއްޖޭގެ އެހެން ހިސާބުތަކުގައި މަސްވެރިކަމުގައި އަދިވެސް ގިނައީ އުމުރުން ދޮށީ މީހުންނެވެ. މަސްވެރިކަމުގައި ޒުވާނުން މަދީ، މި މަސައްކަތާ މެދު ދެކޭ ގޮތުން ކަމަށް އަކްބަރު ބުންޏެވެ. މަސްވެރިކަމަކީ ނުކިޔަވާ މީހުން ކުރާ މަސައްކަތެއްގެ ގޮތުގައި ދެކޭ މީހުން އަދިވެސް ގިނަ ކަމަށާއި އެހެން ދެކޭ މީހުންވެސް އަމަލީ ގޮތުން މިކަން ތަޖުރިބާކޮށްފި ނަމަ، މަސްވެރިކަމާ މެދު ދެކޭ ގޮތް ބަދަލުވާނެ ކަމަށް އޭނާ ބުންޏެވެ.

"ކާބަފައިން ކާންބޯން ކުރި މަސައްކަތަކީ މަސްވެރިކަން. މަސްވެރިން ވެހޭހާ ވާރެ އާއި އަވީގާ ބުރަ މަސައްކަތްކޮށް ދަރިންނަށް އޭރު ކިޔަވައިދެނީ. ދެން މަސްވެރިމީހާ ބޭނުމެއް ނުވޭ ކިޔަވައި ދިނުމަށްފަހު އެމީހުންގެ ދަރިން މި މަސައްކަތަށް ނެރޭކަށް. އެހެންވެގެން މިހާރުގެ މި ޖެނެރޭޝަންގައި އެގޮތަށް ދެކެނީ،" އޭނާ ބުންޏެވެ.

ޒުވާނުން މަސްވެރިކަމަށް ނުކުތުމުގެ ހަމައެކަނި ހުރަހަކީ އެމީހުންގެ ވިސްނުމެވެ. މިއީ އާމްދަނީއެއް ހޯދުމަށްވުރެ ބޮޑަށް "ރަނގަޅު" އާމްދަނީއެއް ބޭނުންވާ ޒުވާނުން ކުރުމަށް ރަނގަޅު ކަމެއް ކަމަށް އަކްބަރު ދެކެ އެވެ. ހަފްތާއެއްގެ މައްޗަށް 10،000ރ. ނުވަތަ 15،000ރ. ވެސް ލިބިދާނެ ކަމަށް އޭނާ ބުންޏެވެ. އަދި މަސްވެރިކަން ރަނގަޅު ނޫން ދުވަސްވަރުގައި ލިބޭ އާމްދަނީ މަދުވި ނަމަވެސް އަހަރުގެ ބޮޑު ބަޔަކީ މަސްވެރިކަން ރަނގަޅު ދުވަސް ވަރު ކަމަށް އަކްބަރު ބުންޏެވެ.

ޒުވާން ކެޔޮޅު އަކްބަރު 2011 ވަނަ އަހަރު ޒަވާޖީ ހަޔާތެއް ފަށާފައިވާ އިރު އޭނާ އަކީ މިހާރު ދެ ކުދިންގެ ބައްޕަ އެވެ.

"މަސްވެރިކަން ކުރާތީ ވަކިން ޗުއްޓީ ނަގާކަށް ނުޖެހޭ. އާއިލާއަކު ގިނަ ވަގުތު ލިބޭ. މިއީ ރަށުގައި ހުރެގެން ކުރަން އެންމެ ރަނގަޅު މަސައްކަތް،" އޭނާ ބުންޏެވެ.

އަކްބަރު ބުނީ، މަސްވެރިކަމަށް ސަރުކާރުންދޭ އަހައްމިއްޔަތު އިތުރު ކުރަންޖެހޭ ކަމަށެވެ. މަސްވެރިނަށް އައިސް އަދި ތެޔޮ ނުލިބުން ފަދަ ކަންކަމަށް އަވަސް ހައްލުތަކެއް ހޯދަންޖެހޭ ކަމަށް އޭނާ ބުންޏެވެ.

އަކްބަރު ބުނީ "ޒުވާން ކެޔޮޅު" ފަދަ އެވޯޑުތަކުގެ ސަބަބުން ގިނަ މަސްވެރިން މި ދާއިރާއަށް ނުކުތުމަށް އިތުރު ހިތްވަރެއް ލިބިގެންދާނެ ކަމަށެވެ. އޭނާއަށް ޒުވާން ކެޔޮޅުގެ އެވޯޑް ލިބުމުން އަކްބަރު ވެސް ހުރީ ވަރަށް އުފަލުންނެވެ. އޭނާ ދެން ވެސް ފެނިގެންދާނީ މަސްވެރިޔެއްގެ ގޮތުގަ އެވެ.