މަސްވެރިޔާ ކާޑުން 100،000ރ. ލިބޭ ޕްރޮމޯޝަނެއް

މަސްވެރިޔާ ކާޑު ބޭނުންކުރާ މީހުންނަށް، މަސްވެރިންގެ ދުވަހާ ގުޅިގެން ބޭންކް އޮފް މޯލްޑިވްސް (ބީއެމްއެލް) އިން ހާއްސަ ޕްރޮމޯޝަނެއް ފަށަން ނިންމައިފި އެވެ.

އަންގާރަ ދުވަހުން ފެށިގެން އަންނަ އަހަރުގެ މާޗް 10 ގެ ނިޔަލަށް ކުރިއަށްގެންދާ މި ޕްރޮމޯޝަނުގައި މަސްވެރިޔާ ކާޑު ބޭނުންކޮށްގެން ވިޔަފާރިކުރާ މީހުންގެ މެދުގައި ގުރުއަތު ނަގާނެ އެވެ. މި ގުރުއަތުން ހޮވޭ މީހަކަށް 100،000ރ. ދިނުމަށް ވަނީ ހަމަޖެހިފަ އެވެ. މަސްވެރިޔާ ކާޑަކީ މަސްވެރިންނަށް ހާއްސަކޮށްގެން ބީއެމްއެލުން މިއަހަރު ތައާރަފުކުރި ކާޑެކެވެ.

މަސްވެރިޔާ ކާޑު ބޭނުންކޮށްގެން މިހާރު ރާއްޖޭގެ ކޮންމެ ސަރަހައްދަކުން ވެސް ވިޔަފާރި ކުރެވޭނެ އެވެ. ޕީއޯއެސް އާއި އޭޓީއެމްގެ އިތުރުން ބީއެމްއެލްގެ ކޭޝް އޭޖެންޓުން ދޭ ހިދުމަތްތައް ވެސް މިކާޑު ބޭނުން ކުރާ މީހުންނަށް ހޯދޭނެ އެވެ. މި ކާޑަކީ އޮންލައިންކޮށް ވިޔަފާރި ކުރުމަށާއި ރާއްޖޭން ބޭރުގައި ވެސް ވިޔަފާރި ކުރެވޭނެ ކާޑެކެވެ.

މަސްވެރިޔާ ކާޑަކީ ދޯނީގެ ކެޔޮޅުންނާއި ފަޅުވެރިންނަށް ފައިސާ ލިބިގަތުމަށާއި ކުރަންޖެހޭ ހަރަދުތައް ކުރުމަށް ބޭނުންކުރެވޭގޮތަށް ފަރުމާކޮށްފައިވާ ކާޑެކެވެ. މި ކާޑުން މަސްދޯނިތަކަށް ބޭނުންވާ ތެޔޮ އަދި އައިސް ގަތުމުގެ އިތުރުން ފަޅުވެރިންނަށް ލިބެންޖެހޭ ފައިސާ ވެސް އެ ފަޅުވެރިންގެ މަސްވެރިޔާ ކާޑަށް ފޮނުވާލެވޭނެ އެވެ.

ބީއެމްއެލުން ވަނީ މަސްވެރިންގެ ދުވަހާ ގުޅިގެން ފަށާފައިވާ ފިޝަރީޒް އެކްސްޕޯގައި މި ކާޑަށް އެދި ހުށަހެޅުމުގެ ފުރުސަތު ވެސް ހުޅުވާލައިފަ އެވެ. ހުޅުމާލެ ހުރަވީ ސްކޫލުގައި ކުރިއަށްދާ މި އެކްސްޕޯގައި ބީއެމްއެލްގެ ސްޓޭންޑުން މަސްވެރިޔާ ކާޑަށް އެދޭ ފޯމު ލިބެން ހުންނާނެ ކަމަށް ބީއެމްއެލުން ބުންޏެވެ.