ލ. ލިންކްރޯޑްގައި އެކްސިޑެންޓްވެ މީހަކަށް އަނިޔާވެއްޖެ

ލ. ލިންކްރޯޑްގައި ސައިކަލަކާއި ވޭނެއް ޖެހި ހިނގި އެކްސިޑެންޓެއްގައި ސައިކަލް ދުއްވަން އިން މެދު އުމުރުގެ މީހަކަށް އަނިޔާ ވެއްޖެ އެވެ.

މިއަދު މެންދުރު 12:00 ހާއިރު އެ އެކްސިޑެންޓް ހިނގީ ގިނަ އަދަދެއްގެ ކަނޑު މަސް އަޅާފައި ހުރި ވަށިގަނޑެއް ހިފައިގެން އެކަނި ސައިކަލެއްގައި ދިޔަ 56 އަހަރުގެ ދިވެހި ފިރިހެނަކު ދުއްވަން އިން ސައިކަލެއް ވޭނެއްގައި ޖެހިގެންނެވެ.

އެ އެކްސިޑެންޓްގައި 56 އަހަރު މީހާގެ ކޮނޑުހުޅު ބިންދައިގެންގޮސް އެކިވަރުގެ އަނިޔާތައް ލިބިފައިވާ ކަމަށް ފުލުހުން ބުނެ އެވެ. ލ. ގަން ރީޖަނަލް ހޮސްޕިޓަލުގައި އޭނާ އަށް އަންނަނީ ފަރުވާ ދެމުންނެވެ.

ލ. ކައްދޫ އެއާޕޯޓް ސަރަހައްދުގައި އެ އެކްސިޑެންޓް ހިނގިއިރު ސައިކަލުގައި އުފުލި ގިނަ އަދަދެއްގެ މަސްތައް ހުރީ މަގުމަތީގަ އެވެ.

އެ އެކްސިޑެންޓް ފުލުހުން އަންނަނީ ތަހުގީގު ކުރަމުންނެވެ. އިތުރު ތަފްސީލް އަދި ނުލިބެ އެވެ.

މިއަދު ހެނދުނު މާލޭގައި 17 އަހަރުގެ ކުއްޖަކު ދުއްވި ސައިކަލެއް ޕާކްކޮށްފައި އޮތް ޕިކަޕެއްގައި ޖެހި ހިނގި އެކްސިޑެންޓްގައި އަނިޔާވެ އެ ކުއްޖާ ވަނީ މަރުވެފަ އެވެ.