ކަޅުވަކަރު މިސްކިތް ރޫޅާލައި އެހެން ތަނަކަށް ގެންދާ މައްސަލާގައި ދައުވާކުރަނީ!

މާލޭގައި ހުރި ޒަމާންވީ ތަންތަން ރޫޅާލައި އެކި ތަންތަނަށް ބަދަލުކުރަނީ މާލޭގެ ތާރީހު އޮޅުވާލަން ކަމަށާއި ތަރިކައެއްގެ ގޮތުގައި ބަލާ ކަޅުވަކަރު މިސްކިތް ރޫޅާލައި މާލެއިން ބޭރަށް ގެންދާ މައްސަލާގައި ދައުވާކުރާނެ ކަަމަށް މާލޭ ސިޓީ ކައުންސިލް މެމްބަރު ޝަމާއު ޝަރީފް މިއަދު ވިދާޅުވެއްޖެ އެވެ.

އޭނާ ވިދާޅުވީ ސަލްޓަންޕާކުގައި ހުރި މިސްކިތަށް ގެއްލުންވާ ގޮތަށް އެތަން ރޫޅާލައި ގދ. ތިނަދުއަށް ގެންދާ މައްސަލަ ކޯޓަށް ހުށަހަޅުއްވާނީ އަމިއްލަ ގޮތުން ކަމަށެވެ. އެކަމަކު މިސްކިތް ރޫޅާލުމަކީ މާލޭ ސިޓީ ކައުންސިލުން ވެސް ކަންބޮޑުވާ ކަމެއް ކަމަށާއި އެކަމުގައި އެ ކައުންސިލުން ވެސް ނިންމުންތަކެއް ނިންމާނެ ކަމަށް ޝަމާއު ވިދާޅުވި އެވެ.

ހިރިގަލާއި ކަޅުވަކަރުން ހަދާފައިވާ މިސްކިތް ސަލްޓަންޕާކުން ނަގައި އެހެން ރަށަކަށް ގެންދަނީ މާލޭގެ ތާރީހު އޮޅުވާލުން ކަމަށް ޝަމާހް ވިދާޅުވި އެވެ. މިއީ، އޭނާ ވިދާޅުވި ގޮތުގައި، ސަރުކާރުން ކުރަމުން އަންނަ މިފަދަ ކަންކަމަށް އިތުރުކުރި ބޮޅެކެވެ.

ސަލްޓަން ޕާކު ތަރައްގީކުރަން މިސްކިތް ރޫޅާލީ ތަރިކަ ހިމާޔަތްކުރުމުގެ ގާނޫނާއި ތަރިކަ ހިމާޔަތްކުރަން ރާއްޖެ ބައިވެރިވެފައިވާ މުއާހަދާތަކާ ވެސް ހިލާފަށެވެ.

"އުސްގެކޮޅަށް ބަދަލު ގެންނަނީ. ޖުމްހޫރީ ބިނާ ހުރި ތަނުން ނަގައިގެން އެހެން ތަނަކަށް ބަދަލުކޮށްފި. ސުނާމީބިނާ ނަގައިފި. ކަޅުވަކަރު މިސްކިތް ވެސް މި ރޫޅާލީ. މިގޮތަށް ތަރިކަ ރޫޅާލައިގެން ނަގާ މަންޒަރު މިފެންނަނީ،" އޭނާ ވިދާޅުވި އެވެ.

ކުރީ ޒަމާނުގައި ވާރުތަވެފައި ހުރި ތަންތަނަށް މިގޮތަށް ބަދަލު ނުކުރެވޭނެ ކަމަށް އޭނާ ވިދާޅުވި އެވެ. މާލޭގެ ތާރީހީ ތަންތަނަކީ ވެސް ހިމާޔަތްކުރެވި ރައްކާތެރިކަމާއެކު ބަލަހައްޓަން ޖެހޭ ތަންތަން ކަމަށް ވިދާޅުވި އެވެ.

"އުތީމުގައި ހުރި ގަނޑުވަރު މާލެ ގެންނާނެތޯ؟ ނޫން، އުތީމު، އުތީމަކަށް ވަނީ ގަނޑުވަރާ ހެދި. ހަމައެގޮތަށް ކަޅުވަކަރު މިސްކިތް ވެސް އެހެން ތަނަކަށް ބަދަލުކޮށްގެން ނުވާނެ. އެއީ މާލޭގެ ތާރީހާ ގުޅިފައިވާ ތަނެއް،" ޝަމާއު ވިދާޅުވި އެވެ.

އޭނާ ވިދާޅުވި ގޮތުގައި ކަޅުވަކަރު މިސްކިތް ރޫޅައިލި މައްސަލާގައި ގިނަ ބަޔަކު އަންނަނީ މާލޭ ސިޓީ ކައުންސިލަށް ޝަކުވާ ހުށަހަޅަމުންނެވެ. އެކަމުގައި ކައުންސިލަށް ކުރެވެން ހުރި މަސައްކަތްތަކެއް ކުރާނެ ކަމަށް ވެސް ޝަމާއު ވިދާޅުވި އެވެ.