ސަލްޓަން ޕާކުގެ ބައެއް ތަންތަން ފަޅުވެ، އަޅާނުލެވޭ ކަމުގެ ޝަކުވާ!

މިދިޔަ ސަރުކާރުން ކުރިއަށް ގެންދިޔަ އެކި ޕްރޮޖެކްޓުތަކުގެ ތެރެއިން، އެންމެ ބޮޑަށް ޕްރޮމޯޓް ކުރި އެއް ތަނަކީ ކުޑަކުދިންނަށް ހާއްސަކޮށްގެން، ސަލްޓަން ޕާކުގައި ހެދި ވިންޓަ ތީމް ޕާކެވެ. އެތަން އޭރުގެ ސަރުކާރުން ފާހަގަކުރީ ރާއްޖެއަށް ސްނޯ ފައިބައި، ފިނި މޫސުމުގެ އިހުސާސް ކުރެވޭނެ ފަދަ ތަނެއްގެ ގޮތުގަ އެވެ.

ސަލްޓަން ޕާކުގެ އިރު ދެކުނު ކަނުގައި ހުރި ކަޅުވަކަރު މިސްކިތް ނެގުމަށް ފަހު ހެދި ވިންޓަ ތީމު ޕާކު، މިދިޔަ އަހަރުގެ ޖޫންގައި އާއްމުންނަށް ހުޅުވާލުމާ އެކު ގިނަ ބައެއްގެ ތަރުހީބު ލިބުނެވެ. ގިނަ ކުޑަކުދިންތަކެއް އެތަނަށް ގޮސް ފިނި މޫސުމުގެ އުފާ ލިބިގަތެވެ.

އެކަމަކު ބޮޑު ހަރަދެއްކޮށްގެން ހެދި ތަން މިހާރު އޮތީ ފަޅަށެވެ. އެތަނުގައި ހިދުމަތް ނުދޭތާ އެތައް ދުވަހެއް ވެފައިވާއިރު، ވިންޓަ ތީމް ޕާކާ އެކު ހިންގި ކެފޭ ވެސް ވަނީ ހުއްޓާލައިފަ އެވެ.

ވިންޓަ ތީމް ޕާކުގެ އިތުރުން ސަލްޓަން ޕާކުގައި ހެދި އެހެން ބައެއް ތަންތަން ވެސް މިހާރު ބޭނުމެއް ނުކުރެވެ އެވެ. އެއް ބަޔަކު މިކަން ސިފަކުރީ ކުރީގެ ސަރުކާރުން ހެދި ތަނަކަށް ވުމުން، މި ސަރުކާރުން އަޅާނުލައި ދޫކޮށްލީ ކަމަށެވެ. އެކަމަކު ސަރުކާރުން ބުނީ ބޮޑު ހަރަދެއްކޮށްގެން އެ ތަންތަން ހަދާފައިވަނީ ބޭނުމެއް ނުހިފޭ، އަވަހަށް ހަލާކުވާ ފަދަ ގޮތަކަށް ކަމަށެވެ. އަދި ޕާކު އަލުން ހެދިތާ އަހަރެއް ވީއިރު، އެކި ތަންތަން ހަލާކުވެފައިވާ ކަމަށް ވެސް އާ ސަރުކާރުން ބުނެ އެވެ.

އަގުބޮޑުކޮށް ހެދި ތަންތަނުގެ ބޭނުން ނުހިފި!

ސަލްޓަން ޕާކުގެ ނަން ރަސްރަނި ބަގީޗާއަށް ބަދަލުކޮށް، ރައީސް އަބްދުﷲ ޔާމީނުގެ ސަރުކާރުން އެތަން ތަރައްގީކުރީ މި ސަރަހައްދުގެ އެހެން ގައުމުތަކުން ވެސް ނުފެންނަހާ ޗާލު ބަގީޗާއެއްގެ ގޮތުގަ އެވެ. ސިފައިންގެ އެހީގައި އެތަނަށް ބޮޑެތި ބަދަލުތައް ގެނަ އެވެ. އެގޮތުން އެއް ތަނަކީ، ޑައިމަންޑް ވިންގްސްއާ ހަވާލުކޮށްގެން ހެދި ވިންޓަ ތީމް ޕާކެވެ.

ފިނިހޫނުމިން 4-14 ޑިގްރީގައި ހުންނަ އެ ތަނަށް ވަދެވެނީ ޓިކެޓް ނަގައިގެންނެވެ. ފިނި މޫސުމުގައި ބޭނުންކުރާ ބޫޓާއި ޖެކެޓް އަދި އަންގި ވެސް ދޫކުރީ ކުއްޔަށެވެ. ޑައިމަންޑް ވިންޑްސްއާ އެތަން ހިންގަން ހަވާލުކުރީ، އެ ތަނުގެ ބޭރުގައި ކެފޭއެއް ހިންގުމުގެ ހުއްދައާ އެކުގަ އެވެ.

އެކަމަކު އަގުބޮޑު ވިންޓަ ޕާކުގެ ހިދުމަތް، މި ސަރުކާރުން ވެރިކަމާ ހަވާލުވުމުގެ ކުރިން ވެސް އޮތީ ހުއްޓާލައިފަ އެވެ. މިހާރު އެތަން ހުރީ ފަޅަށެވެ.

ދެން ޕާކުގައި ހުރި ފާހަގަކޮށްލެވޭ އަނެއް ތަނަކީ ބިމުން ފެށިގެން 12 ވަރަކަށް ފޫޓު އުހުގައި ހަދާފައި ހުންނަ ބިއްލޫރި "ގެ" އެވެ. އެންމެ ޒަމާނީ ވަސީލަތްތަކާ އެކު ދަރިވަރުންނަށް ކިޔެވޭ ގޮތަށް ކްލާސްރޫމުތަކަކާއި ކުރެހުމުގެ ހުނަރު ދައްކާލަން އާޓް ޑެކެއް، އެތަނުގައި ހުރެ އެވެ. ޕާކުގެ ފުރިހަމަކަން އެންމެ ރީތިކޮށް ފެންނަނީ ވެސް އެތަނަށް އެރުމެވެ. އެކަމަކު މިހާރު އެތަނުގެ ބޭނުމެއް ވެސް ނުކުރެ އެވެ.

ކުރީގެ ސަރުކާރުން ތަރައްގީކުރި މި ޕާކުގެ ހިދުމަތް އެންމެ އެދެވޭ ގޮތަށް ފޯރުކޮށް ނުދޭ ކަމަށް ބުނެ ބައެއް މީހުން ދަނީ ކަންބޮޑުވުން ފާޅުކުރަމުންނެވެ.

ޓްވިޓާގައި ހިޔާލުފާޅުކުރި މީހަކު ބުނީ ސަލްޓަން ޕާކު މިހާރު ދަނީ މަރުވަމުން ކަމަށާއި ކޮންމެ ސަރުކާރަކުން ތަރައްގީކުރި ތަނެއް ކަމުގައި ވިޔަސް، އެއިން ފައިދާތަކެއް ކުރާ ނަމަ އެތަން ރަނގަޅަށް ބަލަހައްޓަން ޖެހޭނެ ކަމަށެވެ. އަދި ރައްޔިތުންގެ ފައިސާއިން ހަދާފައިވާ މިފަދަ ތަންތަން ވީރާނާވާން ދޫކޮށްނުލުމަށް ބައެއް މީހުން ގޮވާލާފައިވެ އެވެ.

"މިއީ މާލޭން އަހަރެމެންނަށް ހިތްހަމަ ޖައްސާލަން އޮތް ހަމައެކަނި ތަނަކީ. މިތަންތަން ހަލާކުވިޔަ ނުދީ ރަނގަޅަށް ބަލަހައްޓައިދީ،" މާލޭ ސިޓީ ކައުންސިލް ޓެގްކޮށް، މީހަކު ކުރި ޓްވީޓެއްގައި ބުންޏެވެ.

"ރަސްރަނި ވިއު"ގެ ނަމުގައި ހެދި ބިއްލޫރިގެ ފަޅަށް ހުންނަކަން ފާހަގަކޮށް އެހެން މީހަކު ކުރި ޓްވީޓެއްގައި ބުނީ އެތަން ހުޅުވި ދުވަސްކޮޅު، ގިނަ ކުދިންތަކެއް ކުރަހައި މުނިފޫހިފިލުވާނެ ވަސީލަތްތައް އެތަނުގައި ހުރި ކަމަށާއި އެކަމަކު މިހާރު އެތަނުގެ ބޭނުން ނުހިފޭ ގޮތް ވުމަކީ ހިތާމަކުރާ ކަމެއް ކަމަށެވެ. އަދި ބޮޑެތި ބަދަލުތަކަށް ފަހު ސަލްޓަން ޕާކު ހުޅުވި ދުވަސްކޮޅު އެތަނުގައި ޑިޖިޓަލް ސޭންޑް ބޮކްސް ފަދަ ބޭނުންތެރި ސާމާނު ހުއްޓަސް މާ ގިނަ ދުވަހެއް ނުވެ އެ އެއްޗެހި ވެސް އެތަނުން ގެއްލިއްޖެ ކަމަށް ޓްވީޓެއްގައި ބުނެފައިވެ އެވެ.

"މި ތަންތަނަށް މީހުން ދަނީ ވަކި މީހަކު ތަރައްގީކުރި ތަނެއް ވީމައެއް ނޫން. ރައްޔިތުންގެ ފައިސާއިން އެޅި ރައްޔިތުންގެ ތަނަކަށް ވީމައި. އެހެންވީމައި ކޮންމެ ސަރުކާރަކުން ވެސް މިތަން ބަލަހައްޓަން ޖެހޭނެ،" އާންމު މީހަކު ބުންޏެވެ.

ބައެއް މީހުން ވަނީ ޕާކުގެ ހިދުމަތް ދަށްވެފައިވަނީ، އެތަން ބަލަހައްޓައި، މަރާމާތު ކުރަން ތިބި މީހުން ވަޒީފާއިން ވަކިކުރުމުން ކަމަށް ތުހުމަތުކޮށްފަ އެވެ. އެކަމަކު މާލޭ ސިޓީ ކައުންސިލުން އެކަން ދޮގުކުރެ އެވެ.

"ގިނަ ތަންތަން ހަދާފައި ހުރީ ހަމައެކަނި ނަމަކަށް، ގިނައީ އިސްރާފު"

ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވި ގޮތުގައި ވަކި ސަރުކާރަކުން ތަރައްގީކުރި ތަނަކަށް ވާތީ އެތަނަކާ މެދު ކައުންސިލުން އިހުމާލެއް ނުވާނެ އެވެ. އެކަމަކު ޕާކު ހަދާފައި ހުރީ، އަވަހަށް މަރާމާތު ކުރަން ޖެހޭ ފަދަ ގޮތަކަށް، އިސްރާފު ބޮޑުކޮށް ކަމަށް އޭނާ ވިދާޅުވި އެވެ.

"ޕާކުގައި އެބަހުރި މަރާމާތުކުރަން ޖެހޭ ގިނަ ތަންތަން. އެކަމަކު އެ ތަންތަން ހަލާކު އެވީ އެތަނަށް އަދި އަހަރެއް ވީ ތަނުން. އެހެންވީމައި، ތަނުގެ ފެންވަރާ މެދު ވިސްނަވާ ލައްވާ،" ޝިފާ ވިދާޅުވި އެވެ.

''އަޅުގަނޑުމެން ސުވާލު އުފައްދަންވީ އެހާ ރަނގަޅަށް ހަދާފައި ހުންނަ ތަނެއް އަހަރެއް ވާތަނުން ހަލާކުވާން ވީ ކީއްވެގެން ކަމާ މެދު." އޭނާ ވިދާޅުވި ގޮތުގައި ބިއްލޫރިގޭގެ ބޭނުން ނުހިފާ ސަބަބު މިހާރު ދަނީ ބަލަމުންނެވެ.

ޝިފާ ވިދާޅުވީ ސަލްޓަން ޕާކުގައި ހަލާކުވާ ތަންތަން ވީ އެންމެ އަވަހަކަށް މަރާމާތު ކުރާ ކަމަށާއި އެކަމަށް ހާއްސަކޮށްފައި ބަޔަކު ވެސް ތިބޭނެ ކަމަށެވެ. އެކަމަކު އެއިން ކޮންމެ ކަމަކަށް ވެސް ބަޖެޓް ހަމަޖައްސަން ޖެހޭ އިރު އެކަމަށް ބައެއް ފަހަރަށް ވަގުތު ނަގާފާނެ ކަމަށް ވިދާޅުވި އެވެ.

ޝިފާ ވިދާޅުވި ގޮތުގައި އެތަންތަން އިތުރަށް ތަރައްގީ ކުރެވޭނީ ކައުންސިލަށް މާލީ މިނިވަންކަން ލިބިގެންނެވެ. ކައުންސިލަށް ލިބިފައިވާ ބަޖެޓުން މުޅި މާލޭގެ ތަރައްގީއަށް ޚަރަދު ނުކުރެވޭނެތީ އޭނާ ވިދާޅުވީ ޕާކުން ލިބޭ އާމްދަނީއަކުން އެތަން ބެލެހެއްޓޭނެ ގޮތް ސަރުކާރުން ހަމަޖައްސައިދޭން ޖެހޭ ކަމަށެވެ.

ސަލްޓަން ޕާކު ބަލަހައްޓަން ތިބޭ މުވައްޒަފުންގެ ތެރެއިން އެކަކު ވެސް ވަޒީފާއިން ވަކި ނުކުރާ ކަމަށް ކައުންސިލުން ބުނެ އެވެ. އެކަމަކު ކުރީ ސަރުކާރުން އެތަނަށް ހަމަޖެއްސި ޓުއާގައިޑުން މިހާރު ބޭނުމެއް ނުކުރެ އެވެ.

ޝިފާ ތުހުމަތުކުރެއްވި ގޮތުގައި ހައުސިން މިނިސްޓްރީން އެ ޓުއާގައިޑުންނަށް ވަޒީފާ ދިނީ، ވަކި ބަޔަކަށް ވަޒީފާ ހޯދައިދިނުމުގެ ނިޔަތުގައި، ރަށްރަށުގެ ޕްރޮޖެކްޓުތަކަށް ހުރި ފައިސާއިން ކަމަށެވެ.

"އެއީ އެއްގޮތަކަށް ވެސް ތަން މަރާމާތު ކުރުމަށް ލާފައި ތިބި ކުދިންނެއް ނޫން. ޕްރޮޖެކްޓުތަކުން ފައިސާ ލިބުނުހާ އަވަހަކަށް އަޅުގަނޑުމެން ޓުއާގައިޑުން ހޯދާ، އެ ކުދިންނަށް ޓްރެއިނިން ދީގެން މަސައްކަތަށް ނެރޭނަން،" ޝިފާ ވިދާޅުވި އެވެ.

އޭނާ ވިދާޅުވީ ފެން އަރުވާ ވަޑާމާއި މަސް ފެންގަނޑު ބެލެހެއްޓުމަށް އޭރުގެ ސަރުކާރުން ބަޔަކާ ހަވާލުކުރީ މަހަކު 156،000 ރުފިޔާއަށް ކަމަށް ވުމުން އެއީ ބޮޑު އިސްރާފެއް ކަމަށެވެ. އަދި އެތަނުގެ ގިނަ މަސައްކަތްތައް ކޮށްފައި ހުރީ ވަކި ބަޔަކަށް އާމްދަނީ ލިބޭނެ ފަދަ ގޮތަކަށް ކަމަށް އޭނާ ވިދާޅުވި އެވެ.

ސިޓީ ކައުންސިލުން ބުނާ ގޮތުން ނަމަ ސަލްޓަން ޕާކު ބަލަހައްޓަން ކައުންސިލުން މިހާރު ވެސް ބޮޑު ޚަރަދެއް ކުރެ އެވެ. އެތަނުގައި ހަލާކުވެފައި ހުރި އެއްޗެހި ކުއްލިއަކަށް ނުހެދުނު ނަމަވެސް، ފައިސާ ހުރި މިންވަރަކުން މަރާމާތު ކުރާ ކަމަށް ވެސް ބުންޏެވެ. އެހެންވެ، އާންމުންގެ ކަންބޮޑުވުންތައް ޝިފާ ސިފަކުރެއްވީ، "އިދިކޮޅު ފަރާތްތަކުން ދައްކާ ސާބިތު ނުހިފޭ ވާހަކަތަކެއް"ގެ ގޮތުގަ އެވެ. "މާލޭގެ ތަންތަން ތަރައްގީ ކުރުމަށް އަޅުގަނޑުމެންނަށް އެބަ މަސައްކަތްތަކެއް ކުރެވޭ. އެހެންވެ، އެކަމާ ދެކޮޅަށް އިދިކޮޅު ފަރާތްތަކުން ދައްކާ ވާހަކަތަކެއް އެއީ،" ޝިފާ ވިދާޅުވި އެވެ.