ކަފިހިހުރަސް އެކްސިޑެންޓާ ގުޅިގެން ޑްރައިވަރުގެ ހުއްދަ ބާތިލްކޮށްފި

ސެނެހިޔާ ކައިރީގައި އޮންނަ ކަފިހިހުރަސް މަތިން މަގު ހުރަސް ކުރަނިކޮށް ޓެކްސީއެއްގައި ޖެހި އަންހެނަކަށް ބޮޑެތި އަނިޔާތަކެއްވި މައްސަލައިގައި ޓެކްސީ ދުއްވި ޑްރައިވަރުގެ ލައިސަންސް ހިފަހައްޓައި، ހުއްދަ ބާތިލްކޮށްފި އެވެ.

ސެނަހިޔާ ހޮސްޕިޓަލު ކައިރިން ކަފިހިހުރަހަކުން މަގު ހުރަސްކުރަން އުޅެނިކޮށް އެކްސިޑެންޓުވި އުމުރުން 46 އަހަރުގެ އަންހެން މީހާގެ ބޮލަށް ލޭ އެޅި މިހާރު އޮތީ ވަރަށް ނާޒުކު ހާލަތެއްގަ އެވެ. އޭނާގެ ހޭ ވެސް ނެތް ކަމަށްވެ އެވެ.

ޓްރާންސްޕޯޓް އޮތޯރިޓީން މިއަދު ބުނީ އެކްސިޑެންޓުގައި ހިމެނޭ ކާރު ދުއްވި މީހާގެ ލައިސަންސް ހިފަހައްޓާފައި ވަނީ ދެ އަހަރަށް ކަމަށެވެ. އަދި އޭނާ ޓެކްސީ ދުއްވުމުގެ ހުއްދަ ވެސް މިހާރު ބާތިލްކޮށްފައިވާ ކަމަށް އެ އޮތޯރިޓީން ބުންޏެވެ.

ޑްރައިވަރުގެ ލައިސަންސް ބާތިލްކޮށްފައި މި ވަނީ އޭނާގެ ނަމާއި ފޮޓޯ ސޯޝަލް މީޑިއާގައި އާންމުވެ ފިޔަވަޅު އެޅުމަށް ގިނަ ބަޔަކު ގޮވާލަމުން ދަނިކޮށެވެ.

މިދިޔަ އަންގާރަ ދުވަހު ހިނގި މި އެކްސިޑެންޓުގައި އިތުރު އަންހެނަކަށް ވެސް ވަނީ އަނިޔާވެފަ އެވެ. ނަމަވެސް އޭނާއަށް ސީރިއަސް އަނިޔާތަކެއް ލިބިފައެއްނުވެ އެވެ.

އެ އެކްސިޑެންޓްގައި އަނިޔާވެ، އައިސީޔޫގައި ފަރުވާ ހޯދަމުން އަންނަ 46 އަހަރުގެ އަންހެން މީހާއަކީ 18 މަހުގެ ކުއްޖެއްގެ މަންމަ އެކެވެ.