މޫސަ ވިދާޅުވަނީ އެސްއޯއެފްގެ އެކައުންޓުން ފައިސާ ޖަމާކުރީ އަސްވާޑުކަމަށް

އެމްއެމްޕީއާރްސީގެ ބޮޑު ޚިޔާނާތުގެ ފައިސާ ޖަމާވި އެސްއޯއެފްގެ އެކައުންޓުން ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކުގެ އެކައުންޓަށް ޖަމާކޮށްފައިވާ 100،000 ޑޮލަރު (1،542،000ރ.) އަކީ ސަންގު ޓީވީގެ މެނޭޖިން ޑައިރެކްޓަރު އިބްރާހިމް ވަހީދު (އަސްވާޑް) ފޮނުވި ފައިސާ ކަމަށް މޫސަ އިއްޔެ ވިދާޅުވެއްޖެ އެވެ.

އެންޓި ކޮރަޕްޝަން ކޮމިޝަން (އޭސީސީ) އިން ކުރި ތަހުގީގަށް ފަހު އެކުލަވާލި 779 ސޮފްހާގެ ރިޕޯޓުގައި އެމްއެމްޕީއާރުސީ މެދުވެރިކޮށް ރަށްތަކާއި ފަޅުތައް ދޫކޮށްގެން ދައުލަތަށް ލިބެން ޖެހޭ 1.4 ބިލިއަން ރުފިޔާ، ދީފައިވާ މީހުންނާއި ކުންފުނިތަކުގެ އެކައުންޓް ހާމަކޮށްފައިވެ އެވެ. އޭގެ ތެރޭގައި މަޖިލީހުގެ ނައިބު ރައީސް މޫސަގެ ނަން ވެސް ހިމެނެ އެވެ. އެކަމާ ގުޅިގެން އޭސީސީގެ ރައީސް ހަސަން ލުތުފީއަށް ފޮނުއްވި ސިޓީއެއްގައި މޫސަ ވިދާޅުވީ އޭނާއަކީ 1989 ވަނަ އަހަރުން ފެށިގެން ވިޔަފާރިކުރަމުން އަންނަ މީހެއް ކަމަށާއި ބޭރު ފައިސާ ގަނެ ރާއްޖެއިން ބޭރަށް ފޮނުވައި، އަދި ރާއްޖޭން ބޭރުގައި ވެސް ވިޔަފާރިކުރާ ކަމަށެވެ. ނަމަވެސް އެއިން އެއްވެސް ވިޔަފާރިއެއްގައި އެސްއޯއެފާ މުއާމަލާތްކޮށްފައިނުވާނެ ކަމަށް ވިދާޅުވި އެެވެ.

މޫސަ ވިދާޅުވީ އޭސީސީން ހާމަކުރި ލިޔުމުގައި އޭނާގެ ނަން އޮތުމުން އެކަން ހިނގިގޮތް ބަލާފައިވާ ކަމަށެވެ. އެގޮތުން ވެލިދޫ ދާއިރާގެ މެމްބަރު ޔާމިން ރަޝީދާއި އަސްވާޑް އަލަށް ހަދާ ޓީވީ ޗެނަލަކަށް ބޭނުންވާ އާލާތްތައް ސިންގަޕޫރުން ގެންނަން ބޭނުންވާތީ އެ ގައުމުން ފައިސާ ލިބޭނެ އިންތިޒާމު ހަމަޖައްސައިދިނުމަށް އެ ދެ ބޭފުޅުން 2015 ވަނަ އަހަރުގެ ފެބްރުއަރީ މަހު އެދިވަޑައިގެންނެވި ކަމަށެވެ. އެހެންވެ މޫސަގެ ބީއެމްއެލްގެ އެކައުންޓަކަށް ފައިސާ ޖަމާކުރުމުން ސިންގަޕޫރުން ފައިސާ ލިބޭނެ ގޮތް ހަދައިދޭނެ ކަމަށް އަންގާފައިވާނެ ކަމަށް ވިދާޅުވި އެވެ.

"އެމީހުން އަޅުގަނޑުގެ އެކައުންޓަށް ފައިސާ ޖަމާކުރުމުން އެމީހުންނަށް ސިންގަޕޫރުން އެ އަދަދަށް ފައިސާ ދޭނެކަމަށް ބުނުމުން އަސްވާޑު ވަނީ 8 މާޗު 2015 ގައި އަޅުގަނޑުގެ އެކައުންޓަށް އެއް ލައްކަ ޑޮލަރު ޖަމާކޮށްދީފަ އެވެ. އިބްރާހިމް ވަހީދު (އަސްވާޑު) އަށް އެކައުންޓް ނަންބަރު ދީފައި އެއަށް ފައިސާ ޖަމާކުރުމަށް އޭނާގާތު ބުނުމުން އެ ފައިސާ ޖަމާކޮށްފައިވަނީ އިންޓަނެޓް ބޭންކިން މެދުވެރިކޮށް ކަމަށްވާތީ އެ ފައިސާ އަޅުގަނޑުގެ އެކައުންޓަށް ޖަމާކުރީ އިބްރާހިމް ވަހީދު (އަސްވާޑު) ގެ އެކައުންޓުން ކަމަށް އަޅުގަނޑު ހުރީ ނިންމައިގެންނެވެ،" މޫސަގެ ބަޔާނުގައި ވިދާޅުވި އެވެ.

"އަދި 8 މާޗު 2015 ގެ ތާރީހުގައި އަޅުގަނޑުގެ އެޗްއެސްބީސީ ސިންގަޕޫރުގެ އެކައުންޓުގެ ހަތަރު ޗެކު އަޅުގަނޑު އިބްރާހިމް ވަހީދު (އަސްވާޑު) އާ ހަވާލުކުރުމުން އޭނާ ވަނީ ފައިސާ ނަގައިފަ އެވެ. މިއީ ރައްޓެހި ކުދިން ކަމަށްވެފައި މި ކުދިންނަށް ސިންގަޕޫރަށް އަވަހަށް އެ ފައިސާ ފޮނުވޭނެ ގޮތެއް ނެތުމުން އެހީތެރިވުމުގެ ގޮތުން އަޅުގަނޑު ކޮށްދިންކަމެކެވެ،"

މޫސަ ވިދާޅުވީ އޭސީސީގެ ރިޕޯޓުގައި އޭނާގެ ނަން އޮތަސް އެކަމާ ގުޅޭގޮތުން ތަހުގީގަށް ކޮމިޝަނުން ސުވާލުކޮށްފައިނުވާ ކަމަށެވެ. އެހެންވެ ކަމުގެ ހަގީގަތް އޮޅޭގޮތަށް އޭނާގެ ނަން ބޭނުންކުރުމަކީ ގާނޫނު އަސާސިން ލިބިދީފައިވާ އެތައް ހައްގެއް ގެއްލި އަމިއްލަ ދިިރިއުޅުމާ ވިޔަފާރިއަށް އޭގެ ނޭދެވޭ އަސަރުކުރާނެ ކަމެއްގެ ގޮތުގައި ސިފަކުރައްވާފައިވެ އެވެ.

މޫސަ ވިދާޅުވި ގޮތުގައި އޭނާ އަކީ ދައުލަތުގެ ޒިންމާދާރު މަގާމެއްގައި ހުރި މީހަކަށް ވާއިރު އެފަދަ ކަމެއްގެ ތެރެއަށް ނަން އައުމަކީ ރައްޔިތުންގެ ހިދުމަތުގައި ހޭދަކުރި 15 އަހަރު ތެރޭގައި ދުވަހަކު ވެސް ކުރިމަތިނުވާ ފަދަ ލަދުވެތިކަމެކެވެ. ސިޔާސީ ގޮތުން މީޑިއާތަކާއި ސިޔާސީ ހަތުރުން ދައްކާ ވާހަކަތަކަކީ އަމާޒުވާ ވާހަކަތަކެއް ކަމަށާއި ނަމަވެސް ދުވަހަކު ވެސް ތަހުގީގަކަށް އެއްވެސް އިދާރާއަކަށް ހާޒިރުކޮށްފައިނުވާކަމަށް ވިދާޅުވި އެވެ.

"ދައުލަތުގެ މަގާމުތަކުގައި ތިއްބަވާ ތިޔަ ފަދަ ބޭފުޅުން މިއަށްވުރެ ޒިންމާދާރުކޮށް ކަންކަން ކުރުމަކީ ތިޔަބޭފުޅުންނަށް ގާނޫނުން މަތިކޮށްފައިވާ ޒިންމާއެކެވެ،" މޫސަ ވިދާޅުވި އެވެ.

މޫސަގެ އިތުރުން އެސްއޯއެފްގެ ފައިސާ މަޖިލީހުގެ އެހެން ބައެއް މެންބަރުންގެ އަމިއްލަ އެކައުންޓާއި އެ ބޭފުޅުންގެ މަސްލަހަތު އޮންނަ ކުންފުނިތަކަށް ވެސް ލިބިފައިވެ އެވެ. އޭގެ ތެރޭގައި ވިލުފުށީ ދާއިރާގެ މެމްބަރު ރިޔާޒު ރަޝީދާއި ގަލޮޅު ދެކުނު ދާއިރާގެ ކުރީގެ މެމްބަރު އަދި މިހާރުގެ ޔޫތު މިނިސްޓަރު އަހުމަދު މަހުލޫފާއި ގުރައިދޫ ދާއިރާގެ މެމްބަރު ހުސެއިން މަނިކު ދޮންމަނިކު ހިމެނިވަޑައިގަންނަވަ އެވެ.