ފުލުހުން ޖެހި ޕެޕާ ސްޕްރޭ ފުލުހުންގެ ލޮލަށް

މިއީ ހަމަ ހަގީގަތުގައި ވެސް އަމިއްލަ އަތުން ފޭހުނު އިލޮށިގަނޑު އަމިއްލަ ލޮލަށް ހެރުމޭ ބުނާ ކަހަލަ ހާދިސާއެކެވެ. ބަލްގޭރިއާގެ ފުލުހުންތަކެއް މުޒާހަރާއެއް ރޫޅައިލަން ޕެޕާ ސްޕްރޭ ޖެހުމުން އޭގެ ހުރިހާ އަސަރެއް ކުރީ ހަމަ ފުލުހުންނަށެވެ.

އިންތިހާބު އަވަސްކުރަން ގޮވާލައި ބަލްގޭރިއާގެ ވެރިރަށް ސޯފިއާގެ މަގުތަކަށް ހަފުތާ ބަންދުގައި ނުކުތް އެތައް ހާސް މީހުން ދުރަށް ޖައްސަން، އުޅުނު ފުލުހުންގެ ތެރެއިން ފުލުހަކު ޕެޕާ ސްޕްރޭ ޖެހުމުން، ގިނަ އަދަދެއްގެ ފުލުހުންގެ ލޮލަށް އަސަރު ކުރި އެވެ. އަދި މިކަމާ ގުޅިގެން ފުލުހުން އުޅުނު ހާލު ފެންނަ ވީޑިއޯއެއް ސޯޝަލް މީޑިއާގައި ދައުރުވެ، ގިނަ ބަޔަކު މިކަމަށް މަލާމާތް ވެސް ކޮށްފައިވެ އެވެ.

މީޑިއާތަކުން ރިޕޯޓްކޮށްފައިވާ ގޮތުގައި އާންމުންގެ ތެރެއަށް ޖެހި ޕެޕާ ސްޕްރޭ، ފުލުހުންނަށް އުފުލަން ޖެހުނު ބޮޑު ވޭނަކަށްވީ، ވައިގެ ޖެހުނު ގޮތުންނެވެ. އެގޮތުން ޕެޕާ ސްޕްރޭ ޖެހުމުން، ވައި ހުރި ގޮތުން އެ ފެތުރިގެން ދިޔައީ ފުލުހުން ތިބި ދިމާއަށެވެ. އާންމުންނަށް އަސަރުކުރާ ގޮތެއް ނުވި އެވެ.

ފުލުހުންނަށް ޕެޕާ ސްޕްރޭގެ އަސަރުކޮށްގެން އުޅުނު މަންޒަރު ފެންނަ ވީޑިއޯ އާންމު ކުރި ނޫސްވެރިއެއް ކަމަށްވާ ޖޭސްޕާ ނީވް ބުނި ގޮތުގައި ފުލުހުން އެހާ ވަރުން އުޅެން ޖެހުނީ އެ މީހުން އަމިއްލަ އަށް ވެސް ޕެޕާ ސްޕްރޭ ތަޖުރިބާކޮށްފައި ނެތުމުންނެވެ. އަދި ވީޑިއޯއިން އެކަން ސާފުވާ ކަމަށް ބުންޏެވެ.

ބަލްގޭރިއާ އަކީ އާންމު ގޮތެއްގައި ވަރަށް ސުލްހަވެރި އަމާން ގައުމެކެވެ. މަގުތަކަށް މުޒާހަރާކުރަން ރައްޔިތުން ނުކުތުމަކީ އެހާ އާންމު ކަމެއް ނޫނެވެ.

އެހެންވެ އާންމުކޮށް ދިމާ ނުވާ ކަހަލަ ކަމަކާ ފުލުހުން ޖުރިމަތިލާން ޖެހުމުން، އަތުގައި ހުންނަ ވަސީލަތްތައް ވެސް ބޭނުން ކުރާނެ އުކުޅު ނޭނގުނީ ކަމަށް ބުނެ ވީޑިއޯ އަށް ޖެހި މީހުން އެކި ކަހަލަ ވާހަކަތައް ދައްކާފައިވެ އެވެ.