50 މިލިއަން މީހުންނަށް އާމްދަނީ ކަށަވަރު ކޮށްދޭނަން: ރާހުލް

ނިއު ދިއްލީ (މާޗް 26) - އިންޑިއާގެ ފަގީރު 50 މިލިއަން އާއިލާ އަށް އެންމެ ކުޑަ މުސާރަ ކަށަވަރުކޮށްދެއްވާނެ ކަމަށް ކޮންގްރެސް ޕާޓީގެ ލީޑަރު ރާހުލް ގާނދީ ވައުދުވެވަޑައިގެންފި އެވެ.

އަންނަ މަހު އޮންނަ އާއްމު އިންތިޚާބުގެ ކެމްޕޭނުގައި އިދިކޮޅު ލީޑަރު ވިދާޅުވީ ދުނިޔޭގެ އެންމެ ބޮޑު "އެންމެ ކުޑަ މުސާރައިގެ ސްކީމް" ތައާރަފް ކުރުމުން އިންޑިއާ އިން ފަގީރުކަން ނައްތާލަން ފުރުސަތު ފަހިވާނެ ކަމަށެވެ. ނަމަވެސް އިންޑިއާގެ ވެރިކަން ކުރާ ބީޖޭޕީން ބުނަމުން ދަނީ މިހާރު ހުރި ސްކީމްތަކުން ވެސް ފަގީރުންނަށް ފައިދާ ކުރަމުންދާ ކަމަށެވެ.

"އިންތިޚާބަކުން ބަލިވާނެކަން ޔަގީންވުމުން ހަނދު ގެނެސްދޭނެ ކަމަށް ވެސް ވައުދުވާނެ،" ބީޖޭޕީގެ ސެކްރެޓަރީ ޖެނެރަލް ރާމް މަދާވް ޓްވީޓް ކުރެއްވި އެވެ.

އެންމެ ކުޑަ މުސާރައިގެ ސިޔާސަތު ވަނީ ކޮންގްރެސް ޕާޓީން ޖެނުއަރީ މަހު ނެރުނު މެނިފެސްޓޯގައި ވެސް ހިމަނައިފަ އެވެ. ނަމަވެސް އޭގެ ތަފްސީލްތައް ހާމަކޮށްފައެއް ނުވެ އެވެ.

ރާހުލް ގާނދީ ވިދާޅުވީ ސްކީމްގެ ދަށުން އިންޑިއާގެ އެންމެ ފަގީރު 20 ޕަސެންޓް މީހުންނަށް އަހަރަކު 72،000 ރުޕީސް (1050 ޑޮލަރު) ލިބޭނެ ކަމަށެވެ. އަދި އޭގެ ފައިދާ 50 މިލިއަން އާއިލާ ނުވަތަ 250 މިލިއަން މީހުންނަށް ސީދާ ގޮތުން ލިބޭނެ ކަމަށެވެ.

"ފަގީރުކަމާ ދެކޮޅަށް އެންމެ ފަހު ހަމަލާ ވަނީ ފަށާފައި. އިންޑިއާ އިން ފަގީރުކަން ނައްތާލާނަން،" ރާހުލް ވިދާޅުވި އެވެ.

ކޮންގްރެސް އިން ތައާރަފް ކުރާ ސްކީމުން 52 ބިލިއަން ޑޮލަރު ޚަރަދުވާނެ އެވެ. އެ ސްކީމަށް ފަންޑު ހޯދާނެ ގޮތެއް ރާހުލް ވިދާޅެއް ނުވެ އެވެ.

އިންޑިއާގައި ސަރުކާރުން ފަންޑްކުރާ 900 އަށް ވުރެ ގިނަ ސްކީމް ހިންގަ އެވެ. އޭގެ ތެރޭގައި އަގުހެޔޮ ކާބޯތަކެއްޗާއި ދަނޑުވެރިންގެ ސަބްސިޑީ އާއި ކިޔަވާ ކުދިންގެ ސްކޮލާޝިޕް އަދި ރަށްފުށު ހިސާބުގެ މީހުންނަށް ވަޒީފާގެ ޔަގީންކަން ކަށަވަރުކޮށްދޭ ސްކީމްތައް ހިމެނެ އެވެ.