ބަންގްލަދޭޝްގެ އިސްލާމީ ޕާޓީގެ ލީޑަރު ދަންޖައްސައިފި

ޑާކާ (ސެޕްޓެމްބަރު 4) - ބަންގްލަދޭޝްގެ އެންމެ ބޮޑު އިސްލާމީ ޕާޓީ އަށް ޚަރަދުކުރާ ލީޑަރުގެ މައްޗަށް މަރުގެ އަދަބު ތަންފީޒު ކޮށްފި އެވެ. ބަންގްލަދޭޝްގެ މިނިވަން ކަމަށް 1971 ވަނަ އަހަރު ކުރި ހަނގުރާމައިގައި މީހުން މެރިކަމުގެ ކުށުގައި އުމުރުން 63 އަހަރުގެ މީރު ގައުސަމް އަލީ މަރަން މީގެ ދެ އަހަރު ކުރިން ހުކުމް ކުރީ އެ ގައުމުގެ ހަނގުރާމައިގެ ކުށްތަކާ ބެހޭ ޓްރައިބިއުނަލުންނެވެ. އޭނާ ދަންޖައްސާފައި ވަނީ ޑާކާގެ ސަލާމަތީ ފިޔަވަޅުތައް ވަރުގަދަކޮށްފައިވާ ޖަލެއްގައި އިއްޔެ ވަރަށް ހަވީރުގެ ވަގުތެއްގަ އެވެ. ބަންގްލަދޭޝްގައި ޝިޕިން އާއި އިމާރާތް ކުރުމުގެ ވިޔަފާރި ކުރާ މީރު ގައުސަމް ހައްޔަރު ކުރީ 2010 ވަނަ އަހަރު އެވެ. އޭނާގެ މައްޗަށް ކުށް ސާބިތުވީ 2014 ވަނަ އަހަރު އެވެ. އޭނާ ކުށުން ސަލާމަތްވާން އޮތީ ރައީސްގެ މައާފް ލިބުމުންނެވެ. އެކަމަކު ރައީސްގެ މައާފް ލިބެންޏާ ކުށަށް އިއުތިރާފް ވާން ޖެހެ އެވެ. އެހެންވެ މީރު ގައުސަމް ވަނީ ރައީސްގެ މައާފް ހޯދުމަށް ދެކޮޅު ހަދައިފަ އެވެ.

ބޮޑު ވަޒީރު ޝެއިޚް ހަސީނާގެ ސަރުކާރުން ވޯ ކްރައިމްސް ޓްރައިބިއުނަލް 2010 ވަނަ އަހަރު އުފެއްދި ފަހުން މިނިވަން ކަމަށް ކުރި ހަނގުރާމައިގައި ހިންގި ޖަރީމާތަކާ ގުޅިގެން ކަމަށް ބުނެ، އިދިކޮޅު ހަ ލީޑަރެއްގެ މައްޗަށް ވަނީ މަރުގެ ހުކުމް ތަންފީޒުކޮށްފަ އެވެ. މީގެ ތެރޭގައި އިސްލާމީ ޕާޓީގެ ފަސް ލީޑަރަކު ވެސް ހިމެނެ އެވެ. އެ މީހުންގެ އަދަބު ތަންފީޒު ކުރީ ސްޕްރީމް ކޯޓުން މަރުގެ އަދަބަށް ތާއީދުކުރުމާ ގުޅިގެންނެވެ.

އިސްލާމީ ޕާޓީ އާއި އިދިކޮޅު ބީއެންޕީން ބުނެފައި ވަނީ ސަރުކާރުން އުފެއްދި މި ޓްރައިބިއުނަލުގެ ބޭނުމަކީ އިދިކޮޅު ލީޑަރުން ނައްތާލުން ކަމަށެވެ. ހަސީނާގެ ސަރުކާރުން ބުނެފައި ވަނީ ހަނގުރާމައިގެ ޒަޚަމްތަކަށް ފަރުވާ ހޯދުމަށް ޓްރައިބިއުނަކީ ކޮންމެހެން ބޭނުން ކޯޓެއް ކަމަށެވެ. ބަންގްލަދޭޝްގެ މިނިވަން ކަމަށް ކުރި ނުވަ މަސް ދުވަހުގެ ހަނގުރާމައިގައި ތިން މިލިއަން މީހުން މަރުވެފައިވާ ކަމަށް ސަރުކާރުން ވަނީ ބުނެފަ އެވެ. ނަމަވެސް އެއް ބަޔަކު ބުނަނީ އެ އަދަދު އެއަށް ވުރެ މަދުވާނެ ކަމަށެވެ.