އެއްގަމު އުޅަނދުގެ އަދަދު އެއް ލައްކަ އަށް ވުރެ އިތުރުވެއްޖެ

ރާއްޖޭގައި ރަޖިސްޓްރީކޮށްފައިވާ އެއްގަމު އުޅަނދުތަކުގެ އަދަދު މިދިޔަ އަހަރުގެ ނިޔަލަށް އެއް ލައްކައަށް އަރައިފި އެވެ.

ނޭޝަނަލް ބިއުރޯ އޮފް ސްޓެޓިސްޓިކްސްގެ ރިޕޯޓްތައް ދައްކާގޮތުގައި މިދިޔަ އަހަރު މުޅިން އަލަށް 11،319 އުޅަނދު ވަނީ ރަޖިސްޓްރީ ކޮށްފަ އެވެ. އެގޮތުން އެންމެ ގިނައިން ރަޖިސްޓްރީ ކޮށްފައި ވަނީ ސައިކަލެވެ. އެގޮތުން 9،038 ސައިކަލް ރަޖިސްޓްރީކޮށްފައިވެ އެވެ.

ދެން އެންމެ ގިނައިން ރަޖިސްޓްރީ ކޮށްފައިވަނީ ބެޓަރި ބައިސްކަލެވެ. މިއީ 2016 ވަނަ އަހަރުން ފެށިގެން ރާއްޖޭގައި ބޭނުންކުރަން ފަށައި ރާއްޖެ އެތެރެކުރުން ގިނަވަމުން އަންނަ އުޅަނދުތަކެކެވެ. މިދިޔަ އަހަރުގެ ނިޔަލަށް ރާއްޖޭގައި 1،183 ބެޓަރި ސައިކަލު ވަނީ ރަޖިސްޓްރީ ކޮށްފަ އެވެ.

ރާއްޖޭގައި ރަޖިސްޓްރީ ކޮށްފައިވާ އެއްގަމު އުޅަނދުތަކުގެ ތެރެއިން އެންމެ ގިނަ އުޅަނދުތައް ދުއްވަނީ މާލެ ސަރަހައްދުގަ އެވެ. އެއީ 74،488 އުޅަނދެވެ.

އެއްގަމު އުޅަނދުތަކުގެ އަދަދު ލައްކައަކަށް އަރާފައިވާއިރު ކަނޑު ދަތުރުކުރާ އުޅަނދުތަކުގެ އަދަދު ވަނީ 14،000 އަށް އަރާފަ އެވެ. އޭގެ ތެރެއިން އެންމެ ގިނައިން ރަޖިސްޓްރީ ކޮށްފައިވަނީ ދޯންޏެވެ. އެއީ 7،246 އެވެ.