އުދުހޭ ކާރެއް ކާމިޔާބުކަމާ އެކު ޓެސްޓްކޮށްފި

ޓެކްނޮލޮޖީގެ ގޮތުން ކުރިއަރާފައިވާ ޖަޕާނުން، އުދުހޭ ކާރެއް ކާމިޔާބުކަމާ އެކު ޓެސްޓްކޮށްފި އެވެ.

މި މަސައްކަތުގެ ފަހަތުގައި އޮތީ ސްކައި ޑްރައިވް އިންކެވެ. އެތަނުން ނެރުނު ބަޔާނެއްގައި ބުނީ ޓޮޔޮޓާ ޓެސްޓް ފީލްޑްގައި، އުދުހޭ ކާރު ޓެސްޓްކުރީ މި މަހުގެ 25 ގައި ކަމަށެވެ. މިއީ އުދުހޭ ކާރެއް މީހަކާ އެކު ޖަޕާނުގައި ޓެސްޓްކުރި ފުރަތަމަ ފަހަރު ވެސް މެ އެވެ.

"މިއީ ވަރަށް ބޮޑު ކާމިޔާބީއެއް. އަދި މިއީ ދެ އަހަރު ދުވަހުގެ މަސައްކަތުގެ ނަތީޖާ،" ސްކައި ޑްރައިވްގެ ސީއީއޯ ޓޮމޮހީރޯ ފުކްޒާވާ ވިދާޅުވި އެވެ. "އަހަރެމެންގެ ވިސްނުން ހުރީ އުދުހޭ ކާރު ވިޔަފާރި އަށް ނެރުން. މިހާތަނަށް ކުރެވުނު މަސައްކަތުން މިކަން ކާމިޔާބުވާނެކަމުގެ އުންމީދު އާވެއްޖެ."

އޭނާ ވިދާޅުވި ގޮތުގައި އުދުހޭ ކާރަކީ އެއްގަމުދަތުރުފަތުރަށް ކުރިއަށް އޮތް ތަނުގައި ބޭނުންކުރެވޭނެ އެންމެ ފަސޭހަ، ރައްކާތެރި އަދި ހަރަދު ވެސް ކުޑަ ގޮތަށް ވާނެ އެވެ.

ސްކައި ޑްރައިވުން ބުނިގޮތުގައި އެ ކުންފުނީގެ ކުޑަ SD-03 އިލެކްޓްރި ކާރަކީ ދަތުރުތަކަށް އެންމެ ރައްކާތެރި ގޮތްތައް ބަލައިގެން ފަރުމާކޮށްފައިވާ އެއްޗެކެވެ. އަދި މިއީ ޕާކްކުރުން ފަދަ ކަންކަމަށް ވެސް ބޮޑު ލުއިކަމެއް ގެނެސްދޭނެ އެއްޗެއް ކަމަށް ބުންޏެވެ. އެކެއްގެ ޖާގަ ހުންނަ ގޮތަށް އެ ފަރުމާކޮށްފައި ވަނީ އިމަޖެންސީ ހާލަތްތަކަށް ވެސް އެންމެ އެކަށޭނެ ގޮތަށެވެ.

"މިއީ ދަތުރުފަތުރަށް އާ އިންގިލާބެއް ގެނެސްދޭނެ އުފެއްދުމެއް،" ސްކައި ޑްރައިވްގެ ޑިޒައިން ޑިރެކްޓަރު ޓަކޫމީ ޔަމަމާޓޯ ވިދާޅުވި އެވެ.

ސްކައި ޑްރައިވުން ބުނިގޮތުގައި ރަސްމީކޮށް އުދުހޭ ކާރު 2023 ގައި ނެރުމުގެ ކުރިން އެ އިތުރަށް ވަރުގަދަކުރުމަށްޓަކައި އިތުރު ޓެކްނޮލޮޖީތައް ބޭނުންކޮށް، ރައްކާތެރިކަން ކަށަވަރުކޮށްދޭން ގިނަ މަސައްކަތްތަކެއް ކުރާނެ އެވެ. އުދުހޭ ކާރު ވިއްކާނެ އަގެއް އަދި ހާމައެއްނުކުރެ އެވެ.