ޝަރުއީ ދާއިރާގެ ދިރާސާ ހެދުމަށް ބޭރުގެ ފަނޑިޔާރެއް

ރާއްޖޭގެ ޝަރުއީ ދާއިރާ އިސްލާހު ކުރުމަށް ސަރުކާރުން ކުރަމުން އަންނަ މަސައްކަތްތަކަށް އެއްބާރުލުން ދިނުމަށް ސައުތު އެފްރިކާގެ ރިޓަޔާޑް ޖަސްޓިސް، ޔޮހާން ކްރީގްލާ ރާއްޖެ ވަޑައިގެންފި އެވެ.

އެޓާނީ ޖެނެރަލް އޮފީހުން ނެރުނު ބަޔާނެއްގައި ބުނެފައިވަނީ އެ ފަނޑިޔާރު ރާއްޖެ ގެނެސްފައި ވަނީ ޔޫއެންޑީޕީގެ އެހީތެރިކަމާ އެކުގައި ޝަރުއީ ދާއިރާގެ ފުރިހަމަ ދިރާސާއެއް ހެދުމަށް ކަމަށެވެ.

ޔޮހާން އަކީ ސައުތު އެފްރިކާގެ ޝަރުއީ ދާއިރާގައި 25 އަހަރަށް ވުރެ ގިނަ ދުވަހު މަސައްކަތް ކުރައްވާފައިވާ ބޭފުޅެކެވެ. އެގޮތުން އޭނާ ވަނީ ކޮންސްޓިޓިއުޝަނަލް ކޯޓު 1994 ގައި އުފެއްދީއްސުރެ 2002 އާ ހަމައަށް އެ ކޯޓުގެ ފަނޑިޔާރުކަން ކުރައްވާފަ އެވެ. މިހާރު އޭނާ މަސައްކަތް ކުރައްވަމުން ގެންދަވަނީ ޝަރުއީ ދާއިރާއާ ގުޅޭ އެކިއެކި ބައިނަލްއަގުވާމީ ޕްރޮގުރާމުތަކުގަ އެވެ.

މިދިޔަ އާދިއްތަ ދުވަހުން ފެށިގެން އަންނަ އާދިއްތަ ދުވަހާ ހަމައަށް ޔޮހާން ރާއްޖޭގައި މަސައްކަތް ކުރައްވާނެ ކަމަށް ބަޔާނުގައި ބުނެފައިވެ އެވެ. އެގޮތުން މިނިވަން މުއައްސަސާތަކާއި މަދަނީ ޖަމިއްޔާތަކުގެ އިތުރުން ގާނޫނީ ދާއިރާގެ ތަޖުރިބާކާރުންނާ އޭނާ ބައްދަލު ކުރެއްވުމަށް ނިންމާފައިވާ ކަމަށް ބަޔާނުގައި ބުނެފައިވެ އެވެ.

އޭޖީގެ ބަޔާނުގައި ބުނެފައިވަނީ ޝަރުއީ ދާއިރާ އިސްލާހު ކުރުމުގެ މަސައްކަތުގެ ތެރޭގައި ގާނޫނުތަކުގައި ހުރި މައްސަލަތަކާއި އެކަންކަން ތަންފީޒު ކުރަން ދިމާވެފައިވާ ދަތިތަކާއި ގޮންޖެހުންތައް ދިރާސާ ކުރުން ހިމެނޭ ކަމަށެވެ. އަދި މިހާރު ޝަރުއީ ދާއިރާގެ އޮނިގަނޑު އޮތްގޮތާއި އެކި މުއައްސަސާތައް އެކުލަވާލާފައިވާގޮތް މުރާޖާ ކުރުން ހިމެނޭ ކަމަށް ބުނެފައިވެ އެވެ. އޭގެ އިތުރުން ފަނޑިޔާރުން އައްޔަން ކުރުމާއި ސުލޫކީ މައްސަލަ ބަލައި ފިޔަވަޅު އަޅާ އުސޫލު މުރާޖާ ކުރުމަށް ވަނީ ނިންމާފަ އެވެ.

އެކަންކަމަށް ބަލައި ދިރާސާކޮށް ހަދާ ރިޕޯޓް އޮގަސްޓް މަހުގެ 29 ވަނަ ދުވަހުގެ ނިޔަލަށް އޭޖީ އޮފީހާ ހަވާލު ކުރަން ވަނީ ނިންމާފަ އެވެ.