އަޒްމީ އަވަހާރަވެއްޖެ

މުހައްމަދު ޖަމީލު މިސްކިތުގެ މަސައްކަތެއްގައި އުޅެނިކޮށް، އެތަނުގެ ދެ ވަނަ ބުރިން މިދިޔަ ހަފުތާގެ ހޮނިހިރު ދުވަހުގެ ރޭ ވެއްޓުނު މުސްތަފާ އަޒްމީ މިރޭ އަވަހާރަވެއްޖެ އެވެ. އޭނާ އަވާހަރަވީ އިތުރު ފަރުވާ އަށް އިންޑިއާގެ ބެންގަލޫރަށް ގެންދިޔަ ނަމަވެސް ދޭނެ އިތުރު ފަރުވާއެއް ނެތިގެން އެއާ އެމްބިއުލާންސްގައި ރާއްޖެ ގެނައިތަނާ އެވެ.

"ރާއްޖެ ގެނެސް އެއާ އެމްބިއުލާންސުން ބޭލި ފަހުން އަވަހާރަވީ،" އުމުރުން 41 އަހަރުގެ އަޒްމީގެ ގާތް މީހަކު ބުންޏެވެ.

ހ. މަހިނޫރު އަޒްމީގެ މައްޗަށް ކަށުނަމާދު ކުރުން އޮންނާނީ މިއަދުގެ މެންދުރު ނަމާދަށް ފަހު އިސްލާމީ މަރުކަޒުގަ އެވެ.

އެސްޓީއޯގެ އައިޓީ ހެޑް އަޒްމީ ވެއްޓި އޭނާގެ ބޮލަށާއި ފުއްޕާމެއަށް ބޮޑެތި ޒަހަމްތަކެއް ވުމުން އިތުރު ފަރުވާ އަށް އިންޑިއާ އަށް ގެންދިޔައީ މިދިޔަ ބުދަ ދުވަހުގެ ރޭގަ އެވެ. އެކަމަކު، އޭނާ އަށް ރާއްޖެ އިން ބޭރުން ދޭނެ އިތުރު ފަރުވާއެއް ނެތިގެން އަނބުރާ މިރޭ ރާއްޖެ ގެނައީ އެވެ.

އަޒްމީ، ވެއްޓުނު އިރު މޭގެ ތިން ކަށިގަނޑެއް ބިންދައިގެން ގޮސް ފުއްޕާމެ އަށް ހެރުމުގެ ސަބަބުން އޭނާގެ ލޭގެ ޕްރެޝަރު ހިފެހެއްޓުމުގައި ދަތިތަކެއް ދިމާވެފައި ވެ އެވެ. އަދި ސިކުނޑީގެ ހިނގުން ވެސް ވަނީ ހުއްޓިފަ އެވެ.

އަޒްމީ އަކީ އެސްޓީއޯ ގައި މަސައްކަތް ކުރައްވާތާ 25 އަހަރު ވެފައިވާ ބޭފުޅެކެވެ. އޭނާ އަކީ ލަކުޑީގެ އަތްތެރި މަސައްކަތަށް ވަރަށް ލޯބިކުރާ މީހެކެވެ.

އަޒްމީ އަވަހާރަވިއިރު، އޭނާގެ އެއް އަހަރު ނުވާ ތުއްތު ކުއްޖަކާއި އަންބަކު ދުނިޔޭގައި އެބަހުންނެވި އެވެ.