ފުނަދޫގައި ސިޒޭޝަން ކްލިނިކެއް ހުޅުވައިފި

ދުންފަތާއި ދުރުވުމަށް އެހީތެރިވެދިނުމަށް ށ. ފުނަދޫގައި ސިޒޭޝަން ކްލިނިކެއް އިއްޔެ ހުޅުވައިފި އެވެ.

މާލޭއިން ބޭރުގައި ހުޅުވި މި ފަދަ ފުރަތަމަ ސިޒޭޝަން ކްލިނިކް ހުޅުއްވައިދެއްވީ ހެލްތު މިނިސްޓަރު އަބްދުﷲ އަމީނެވެ.

ށ. ފުނަދޫ އަތޮޅު ހޮސްޕިޓަލުގެ މެނޭޖަރު އަހުމަދު ޒުމްރަތު "މިހާރު" އަށް ވިދާޅުވީ އިއްޔެ ހުޅުވި މި ކްލިނިކަށް ރައްޔިތުން ވަރަށް ތާއީދު ކުރާ ކަމަށެވެ. އަދި ދުންފަތުގެ އިސްތިއުމާލު ކުރުމާ ދުރުވާން 11 މީހުން މިހާތަނަށް ރަޖިސްޓްރީވެފައިވާ ކަމަށް ވެސް އޭނާ ވިދާޅުވި އެވެ.

ދުންފަތާ ދުރުވާން ބޭނުންވާ މީހުންނަށް ފުނަދޫގައި ހުޅުވި އެ ކްލިނިކުން ކައުންސެލިން ދޭނެ އެވެ. އަދި ބޭސް ބޭނުންކޮށްގެން ފަރުވާ ހޯދަން ބޭނުންވާ ފަރާތްތަކަށް އާސަންދަގެ އެހީގައި އެ ހިދުމަތްތައް ވެސް ހިލޭ ލިބޭނެ ކަމަށް ޒުމްރަތު ވިދާޅުުވި އެވެ.

ރަސްމީ ވަގުތުގައި އެ ހޮސްޕިޓަލުން ސިޒޭޝަން ކްލިނިކުގެ ހިދުމަތް ލިބޭނެ އެވެ.

މިނިސްޓަރު ފުނަދުއަށް ކުރެއްވި މި ދަތުރުގައި، އެ ރަށުގައި ޓާޝަރީ ފެންވަރުގެ އާ ހޮސްޕިޓަލެއް އަޅަން އަންނަ އަހަރު ފަށާނެ ކަމަށް ވިދާޅުވި ކަމަށް ޒުމްރަތު ވިދާޅުވި އެވެ. އަދި އެ ތަނުން އެ އަތޮޅުގެ ރައްޔިތުންނަށް އެކަށީގެންވާ ސިއްހީ ހިދުމަތްތައް ލިބޭނެ ކަމަށް ވެސް އޭނާ ވިދާޅުވި އެވެ.

މީގެ އިތުރުން ނިއުޓްރިޝަން ޕްރޮގްރާމެއް ވެސް އެ ރަށުގައި މިނިސްޓަރު އިއްޔެ އިފްތިތާހުކުރެއްވި ކަމަށް ޒުމްރަތު ވިދާޅުވި އެވެ. މިއީ އެ ރަށުން ކުރިން ވެސް ކުރިއަށް ގެންދިޔަ، އެހެން ނަމަވެސް ހުއްޓިފައި އޮތް ޕްރޮގްރާމެކެވެ.

ށ،. އަތޮޅަށް މިނިސްޓަރު ކުރައްވާ މި ދަތުރުގައި އެ އަތޮޅު މާއުނގޫދޫއަށާއި ޅައިމަގަށް ވެސް ޒިޔާރަތްކުރައްވާފައި ވެ އެވެ.