ބާ ކައުންސިލްގެ ވޯޓުލުން އޮންނާނީ މާލެ އާއި އައްޑޫގައި

އަންނަ ހޮނިހިރު ދުވަހު ބާ ކައުންސިލްގެ އިންތިޚާބު އޮންނާނީ މާލެ އާއި އައްޑޫގައި އެކަނި ކަމަށް އިލެކްޝަން ކޮމިޝަން (އީސީ) އިން މިއަދު ބުނެފި އެވެ.

އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ މެމްބަރު އަހުމަދު އަކްރަމް ވިދާޅުވީ ބާ ކައުންސިލްގެ އިންތިޚާބު ބޭއްވުމަށް ރާއްޖޭގެ މީހުން ދިރިއުޅޭ ހުރިހާ ރަށެއްގައި އިއުލާން ކުރި ނަމަވެސް ކަނޑައެޅި އަދަދަށް ރީ-ރަޖިސްޓްރީ ކުރީ މާލެ އާއި އައްޑޫގައި ކަމަށެވެ.

އެހެންވެ، ބާ ކައުންސިލްގެ އިންތިޚާބު މާލޭގައި ކުރިއަށް ދާނީ އިލެކްޝަންސް ކޮމިޝަންގެ އިންތިޚާބާ ބެހޭ މަރުކަޒު ހުންނަ ބާ ޖަމާލުއްދީންގަ އެވެ. އައްޑޫގައި ވޯޓު ފޮށި ބަހައްޓާނީ ޝަރަފުއްދީން ސްކޫލްގަ އެވެ. މާލޭގައި ދެ ވޯޓު ފޮއްޓެއް ބަހައްޓާ އިރު، އައްޑޫގައި ބަހައްޓަނީ އެއް ވޯޓު ފޮއްޓެވެ.

އިލެކްޝަންސް ކޮމިޝަނުން ބުނީ އެ ކައުންސިލަށް ކުރިމަތިލުމުގެ ވަގުތު ހަމަވިއިރު ރައީސް ކަމުގެ މަގާމަށް ދެ ބޭފުޅަކު އަދި ނައިބު ރައީސް ކަމުގެ މަގާމަށް ވެސް ދެ ބޭފުޅަކު ކުރިމަތިލެއްވި ކަމަށެވެ. އެގްޒެކަޓިވް ކޮމިޓީގެ މެމްބަރު ކަމަށް 19 ވަކީލަކު ކުރިމަތިލެއްވި އެވެ.

ރައީސް ކަމަށް ކުރިމަތިލެއްވީ ކުރީގެ ބަންޑާރަ ނައިބު ހުސްނުއްސުއޫދާއި މައުމޫން ހަމީދެވެ. ނައިބު ރައީސް ކަމަށް ކުރިމަތިލައްވާފައިވަނީ ސިވިލް ކޯޓުގެ ކުރީގެ ގާޒީ މުހައްމަދު ހަލީމާއި ކުރީގެ ރައީސް މުހައްމަދު ނަޝީދުގެ ސަރުކާރުގެ އެޓާނީ ޖެނެރަލް އަބްދުﷲ މުއިއްޒެވެ.

އަކްރަމް ވިދާޅުވީ އިންތިޚާބުގައި ރައީސް އާއި ނައިބު ރައީސް ހޮވުމަށް ވަކި ކަރުދާސްކޮޅެއް ބޭނުން ކުރާ އިރު، ކައުންސިލަށް މެމްބަރުން ހޮވުމަށް ވެސް ބޭނުން ކުރާނީ ވަކި ކަރުދާސްކޮޅެއް ކަމަށެވެ.

ހޮނިހިރު ދުވަހު ބާއްވާ ދުވަހު ބާއްވާ އިންތިޚާބުގައި ވޯޓުލާނީ ރާއްޖޭގައި ގާނޫނީ ވަކީލުކަން ކުރުމުގެ ހުއްދަ އޮންނަ 1،600 ވަކީލުންގެ މެދުގަ އެވެ.

ބާ ކައުންސިލް އިންތިޚާބަށް ހަމަޖައްސާފައިވަނީ 1.2 މިލިއަން ރުފިޔާގެ ބަޖެޓެކެވެ.

ނައިބު ރައީސް އަމްޖަދު މުސްތަފާ ވިދާޅުވީ އިންތިޚާބުގެ ވަގުތީ ނަތީޖާ ހޮނިހިރު ދުވަހު އިއުލާން ކުރުމަށް ފަހު، ރަސްމީ ނަތީޖާ ޖެހިގެން އަންނަ އާދިއްތަ ދުވަހު އިއުލާން ކުރައްވާނެ ކަމަށެވެ. އަދި އިންތިޚާބަކީ ވަރަށް އިންސާފުވެރި، ދެ ފުށް ފެންނަ އިންތިޚާބަކަށް ހައްދަވާނެ ކަމަށް އޭނާ ވިދާޅުވި އެވެ.

ބާ ކައުންސިލްގެ އެގްޒެކެޓިވް ކޮމިޓީގައި ތިއްބަވާނީ ރައީސާއި ނައިބު ރައީސާއި ބަންޑާރަ ނައިބުގެ އިތުރުން ހަ މެމްބަރެކެވެ. އޭގެ ތެރެއިން ބަންޑާރަ ނައިބު ފިޔަވައި، އެހެން ހުރިހާ ބޭފުޅުން ވެސް އިންތިޚާބު ކުރާނީ ވަކީލުންގެ މެދުގައި ނަގާ ވޯޓަކުންނެވެ.