ނަޝީދު އޭ ސްޓާ ދެއްވުމުން އެޑިއުކޭޝަނުން ހަފުލާއެއް ބާއްވައިފި

ރައްޔިތުންގެ މަޖިލިހުގެ މެމްބަރުން ކުރެއްވި ސުވާލުތަކާ ގުޅިގެން އެޑިއުކޭޝަން މިނިސްޓަރު ޑރ. އައިޝަތު އަލީ ދެއްވި ޖަވާބުތައް ވަރަށް ފުރިހަމަ ކަމަށް ވިދާޅުވެ، މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދު އޭ ސްޓާ ދެއްވުމުން އެ މިނިސްޓްރީން އެކަން ފާހަގަކޮށް ހަފުލާއެއް ބާއްވައިފި އެވެ.

އައިޝަތު އަލީ އާއި އެ މިނިސްޓްރީގެ ބައެއް ވެރިން ވެސް ބައިވެރިވެ ވަޑައިގެން އެ ހަފުލާގައި ކޭކު ފަޅައި، މިނިސްޓަރަށް ހަދިޔާ ދެއްވި އެވެ. އަދި އޭނާގެ ޖަވާބުތަކުގެ ފުރިހަމަކަން ފާހަގަކޮށް ނަޝީދު ތައުރީފު ކުރެއްވުމުން އެކަމަށް މަރުހަބާ ކިޔައި ބޯޑެއް ވެސް ހަދާފައި ހުއްޓެވެ.

އެޑިއުކޭޝަން މިނިސްޓަރު މަޖިލިހަށް ހާޒިރުކުރީ ޓީޗަރުންގެ މުސާރަ އަށް ހެޔޮ ބަދަލެއް ގެނެވޭނީ ކިހާ ތާކުތޯ ބެލުމަށް މަޖިލިހުގެ ދާންދޫ ދާއިރާގެ މެމްބަރު ޔައުގޫބް އަބްދުﷲ ހުށަހެޅުއްވުމުންނެވެ. އެ ސުވާލުގައި، ސްކޫލް ނިންމާ ދަރިވަރުން ދާއިރާއާ ދުރަށް ދާ ތަން ފާއިތުވެދިޔަ 12 އަހަރު ފެންނާތީ އެކަން ދިމާވާ ސަބަބާއި އެ ކަން ހައްލު ކުރަން މިނިސްޓްރީން ކުރާ މަސައްކަތް ބެލުމަށް ޔައުގޫބްގެ ސުވާލުގައިވެ އެވެ. އެ ހުރިހާ ސުވާލަކަށް މިނިސްޓަރު ވަނީ ޖަވާބު ދެއްވައިފަ އެވެ.

މަޖިލިހުގެ ރައީސް ނަޝީދު ވިދާޅުވީ ތިން ސްކޫލަކާ ގުޅޭ ގޮތުން މެމްބަރުން ކުރެއްވި ސުވާލުތަކަށް އެޑިއުކޭޝަން މިނިސްޓަރު ވަރަށް ތަފްސީލްކޮށް ޖަވާބު ދެއްވި ކަމަށެވެ. އެއީ ވ. ރަކީދޫ އާއި އއ. ފެރިދޫ އާއި ލ. ގަތަރު އަމީރު ސްކޫލާ ބެހޭ ގޮތުން ކުރެއްވި ސުވާލުތަކެވެ. "ވަޒީރު ތަފްސީލްކޮށް އެ ކަންކަމަށް ޖަވާބު ދެއްވި. އިތުބާރާއި މައުލޫމާތު ލިބިވަޑައިގެން ހުންނަވައި. އެހެންވީމަ އަޅުގަނޑު ވަޒީރަށް ފަށްފަށުން ޝުކުރު ދަންނަވަން. އަދި އޭ ސްޓާ އަޅުގަނޑުމެން ވަޒީރަށް އަރުވަން،" މިނިސްޓަރަށް ތައުރީފް ކުރައްވައި ނަޝީދު ވިދާޅުވި އެވެ. އޭ ސްޓާ ދެއްވުމުން މިނިސްޓަރު ވެސް ވަނީ ރިޔާސަތަށް ޝުކުރު ދަންނަވައިފަ އެވެ. ނަޝީދު ވިދާޅުވީ މިނިސްޓަރު މަޖިލިހަށް ވަޑައިގަތީ މަޖިލިހުގެ ތަޅުމަށް ޕްރިންސިޕަލެއް ބޭނުންވި ދަނޑިވަޅެއްގައި ކަމަށެވެ. އެމަނިކުފާނު އެގޮތަށް އެ އިޝާރާތް ކުރެއްވީ މިދިޔަ ދެ ދުވަހު މަޖިލިހުގައި އިދިކޮޅު މެމްބަރުން ވަރަށް ބޮޑަށް އަޑުގަދަ ކުރައްވާފައި ވާތީ ކަމަށް ބެލެވެ އެވެ. އިއްޔެ ވެސް މަޖިލިސް ހޫނުވެ ބައެއް މެމްބަރުންގެ ނަން އިއްވައި، އެބޭފުޅުންގެ އަތުން ދުންމާރި އާއި ކަށިގަނޑު ވެސް އަތުލި އެވެ.