ޔޫ2 އާއި އޭއާރް ރަހްމާންގެ ސިންގަލްއެއް

އަޔަލެންޑްގެ މަޝްހޫރު މިއުޒިކް ބޭންޑް ޔޫ2 އާއި އިންޑިއާގެ މަޝްހޫރު މިއުޒިކް ޑައިރެކްޓަރު އޭއާރް ރަހްމާން ގުޅިގެން ސިންގަލްއެއް ގެނެސްދޭން ނިންމައިފި އެވެ.

މި ވާހަކަ އޮސްކާ އެވޯޑް ވެސް ހޯދާފައިވާ ރަހްމާނާއި ޔޫ2 ގެ ޓްވިޓާގައި ވެސް ހިއްސާކޮށްފައިވެ އެވެ. ޔޫ2 އާއި ރަހްމާން ގުޅިގެން ގެނެސްދޭ ލަވައިގެ ނަމަކީ "އަހިމްސާ" އެވެ. ޓްވިޓާގައި ވަނީ ލަވައިގެ ތަންކޮޅެއް ވެސް އިއްވާލައިފަ އެވެ.

މީޑިއާތަކުން ބުނިގޮތުގައި ޔޫ2 ބޭންޑް ކޮންސަޓަކަށް އަންނަ މަހުގެ 15 ގައި އިންޑިއާ އަށް ދިއުމުގެ ކުރިން މި ލަވަ އާންމުކުރާނެ އެވެ. ބޭންޑް އިންޑިއާގައި ޕަފޯމްކުރަން ހަމަޖެހިފައި ވަނީ ޑީސެމްބަރު މަހުގެ 15 ވަނަ ދުވަހު މުމްބާއީގެ ޑީވައި ޕަޓިލް ސްޓޭޑިއަމްގަ އެވެ.

މީގެ 43 އަހަރު ކުރިން އުފެދުނު ރޮކް ބޭންޑް ޔޫ2 ގެ މެމްބަރުންނަކީ ބޯނޯ، ދި އެޖް، އެޑަމް ކްލޭޓަން އަދި ލެރީ މުލެން ޖޫނިއާ އެވެ. ބޭންޑުން މިހާތަނަށް މަގުބޫލު އެތައް ލަވައެއް ގެނެސްދީފައިވާ އިރު، މިހާތަނަށް 14 އަލްބަމް ނެރެފައިވެ އެވެ.

މިހާތަނަށް 22 ގްރެމީ އެވޯޑް ހޯދާފައިވާ ޔޫ2 ގެ އެންމެ ފަހުގެ އަލްބަމަކީ 2017 ގެ "ސޯންގްސް އޮފް އެކްސްޕީރިއަންސް" އެވެ.

ދެހާސް ނުވައެއްގައި ރިލީޒްކުރި "ސްލަމްޑޯގް މިލިއަނާ" އިން އޮސްކާ އެވޯޑް ހޯދި ރަހްމާނަކީ މީގެ ކުރިން ވެސް ދުނިޔޭގެ ނުފޫޒު ގަދަ ބައެއް މިއުޒިޝަނުންނާ އެކު މަސައްކަތްކޮށްފައިވާ ފަންނާނެކެވެ. އޭނާ އާއި ޔޫ2 ގެނެސްދޭ ލަވައަކީ ޔަގީނުން ވެސް ވަރަށް ގިނަ ބަޔަކު އިންތިޒާކުރާނެ ލަވައަކަށް ވާނެ އެވެ.