ރާއްްޖޭގެ ޖަލުތަކުގައި އަދިވެސް މައްސަލަ ގިނަ

ރާއްޖޭގެ ޖަލުތަކާއި މީހުން ބަންދުކުރާ އެހެން ބައެއް ތަންތަނުގައި ގިނަ މައްސަލަތަކެއް އެބަހުރި ކަމަށް، ލާއިންސާނީ އަނިޔާ އާއި އިންސާނީ އިންސާނިއްޔަތާ ހިލާފު އަދަބާއި އިންސާނީ ކަރާމަތަށް ގެއްލުންވާ ގޮތަށް ކުރާ ކަންތައްތައް ބަލަން އދ. އިން ކަނޑައަޅާފައިވާ ސްޕެޝަލް ރެޕަޓުއާ ނިޒް މެލްޒާ ވިދާޅުވެއްޖެ އެވެ.

ރާއްޖޭގެ ޖަލުތަކާއި މީހުން ބަންދުކުރާ ގިނަ ތަންތަނާއި ދައުލަތުން ބަލަހައްޓާ މީހުންނާއި ކުދިން ތިބޭ ތަންތަނަށް ޒިޔާރަތް ކުރައްވައި، މި މަހުގެ 17 އިން ފެށިގެން މިއަދާ ހަމައަށް ހޯއްދެވި ހޯއްދެވުންތައް މީޑިއާ ހިއްސާކުރައްވަމުން މެލްޒާ ވިދާޅުވީ ރާއްޖޭގެ ޖަލުތަކުގައި ޖާގައިގެ ދަތިކަން އޮތީ ފާހަގަކޮށްލެވޭ މިންވަރަކަށް ކަމަށެވެ. އަދި މައްސަލަތައް ތަހުގީގު ކުރުމާއި ޝަރީއަތުގެ މަރުހަލާ ލަސްވުމުގެ ސަބަބުން ޖަލުތައް ތޮއްޖެހުމުގެ މައްސަލަ ބޮޑުވެފައިވާ ކަމަށް ވެސް އޭނާ ވިދާޅުވި އެވެ. މެލްޒާ ވިދާޅުވި ގޮތުގައި ޖަލުތަކާއި މީހުން ބަންދުކުރާ އެހެން ތަންތަން އަދި ދައުލަތުން ބަލަހައްޓާ މީހުން ތިބޭ ތަންތަނުގެ ހާލަތު ބަލައި، އޭނާ އިޚުތިޔާރު ކުރެއްވި މީސްމީހުންނާ ވަކިން ބައްދަލުކުރައްވައި މައުލޫމާތު އެއްކުރެއްވުމުގައި ރާއްޖޭގެ އިދާރާތަކުން ފުރިހަމަ އެއްބާރުލުން ލިބިވަޑައިގެންނެވި އެވެ.

"މީހުން ބަންދުކުރާ މަރުކަޒުތަކުގައި އޮތް އެންމެ ބޮޑު މައްސަލައަކީ، އާއްމު އުސޫލެއްގެ ގޮތުން، އެކަށީގެންވާ މުއްދަތަށް ވުރެ އިތުރަށް މީހުން ބަންދުގައި ބޭތިއްބުމުގެ ސަބަބުންނާއި ކުދިކުދި ކަންކަމުގައި ވެސް މީހުން ބަަންދުކުރުން އަދި ތަހުގީގާއި ޝަރީއަތުގެ މަރުހަލާ ލަސްވުމުގެ އިތުރުން، ޖާގައިގެ ދަތިކަމުގެ ސަބަބުން، ހުރިހާ ޑިޓެންޝަން ސެންޓަރުތަކެއްގައި ހެން، ފާހަގަކޮށްލެވޭ ވަރަށް ތޮއްޖެހިފައި ވުން،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި މީހުން ބަންދުކުރާ ތަންތަނުގެ އޮކިއުޕަންސީ ރޭޓު ހުރީ 150 ޕަސެންޓާއި 190 ޕަސެންޓާއި ދެމެދުގަ އެވެ. އޭގެ މިސާލެއްގެ ގޮތުގައި އޭނާ ނެންގެވީ މާފުށި ޖަލެވެ. އެ ޖަލުގެ ޖާގައަކީ 655 ފިރިހެނުންނާއި 55 އަންހެނުން ކަމަށް ވާއިރު އެތަނުގައި 969 ފިރިހެނުންނާއި 53 އަންހެނުން މިހާރު ވެސް އެބަތިިބި ކަމަށް އޭނާ ވިދާޅުވި އެވެ.

ޖާގައިގެ ދަަތިކަމުގެ އިތުރުން ޖަލުތަކުގެ ހާލަތު ވެސް ހުރީ ދެރަކޮށް ކަަމަަށް އޭނާ ވިދާޅުވި އެވެ. އެގޮތުން އެތަންތައް ތޮއްޖެހިފައި އޮތް އިރު ސާފު ވައި ލިބެން ހުންނަ މިންވަރު ކުޑަ ކަމަށާއި ބައެއް މީހުންނަށް ސާފުވައި ނުވެސް ލިބޭޭ ކަމަށް ވެސް މެލްޒާ ވިދާޅުވި އެވެ.

ވެންޓިލޭޝަން ވަރަށް ގޯސްކޮށް ހުންނަ، ހޫނު ގަދަ އަދި ގުދުރަތީ އަލިކަން ވެސް ނުލިބޭ ގޮތަށް ގައިދީން ތިބޭ އިރު ތައުލީމާއި މަސައްކަތް ދަސްކުރުމުގެ ފުރަސަތާއި ޖިސްމާނީ ހަރަކާތްތެރިކަމުގެ ފުރުސަތު ވެސް ނުލިބޭ ކަމަށް އޭނާ ވިދާޅުވިި އެވެ.

"ގިނަ ގައިދީންނަށް ތާޒާ ވަޔާއި ގުދުރަތީ އަލިކަމުގެ ތެރެއަށް ނުކުތުމުގެ ފުރުސަތު ލިބެނީ ހަފްތާއަކު އެއް ގަޑިއިރަށް ކަަމަށް ވާއިރު، މިގޮތަށް ބޭރަށް ގެންދާ ގެންދިއުން ހުއްޓިފައި އޮންނަނީ ކަނޑައަޅާފައިވާ ކުދިކުދި އޭރިއާތަކަކަށް. އަދި ބައެއް ހާލަތްތަކުގައި އެތަންތަނަށް ގެންދާ އިރު އެމީހުން ތިބެނީ ފަހަތަށް ބިޑިއަޅުވާފައި،" މެލްޒާ ވިދާޅުވި އެވެ.

އެގޮތަށް ކަންތައް ކުރަން ޖެހޭ ސަބަބަކީ ޖަލުތައް ބަލަހައްްޓާ ފަރާތްތަކުން މެލްޒާ އަށް މައުލޫމާތު ދީފައިވާ ގޮތުގައި ގައިދީން ބަލަހައްޓަން އެކަށީގެންވާ ވަރަށް މީހުން ނުތިބޭތީ އެވެ.

އޭނާ ވިދާޅުވި ގޮތުގައި ލާއިންސާނީ އަނިޔާގެ މައްސަލަތައް ބަލަން ރާއްޖޭގައި ހުރި މުއައްސަސާތައް މަސައްކަތް ކުރާ ގޮތް ރަނގަޅު ނިޒާމެއްގެ ތެރެއިން ބަލަމުން ނުދިއުމަކީ ވަރަށް ބޮޑު ކަންބޮޑުވުމެކެވެ. އެގޮތުން ހިއުމަން ރައިޓްސް ކޮމިޝަނަށާއި ނެޝަނަލް އިންޓެގްރިޓީ ކޮމިޝަނަށް ގިނަ މައްސަލަތަކެއް ހުށަހަޅާފައި ވިޔަސް އެފަދަ ކަމަކަށް ޒިންމާވާން ޖެހޭ އެއްވެސް އޮފިޝަލަކާ ދެކޮޅަށް ދައުވާ ކުރެވިފައި ނުވާ ކަމަށް މެލްޒާ ވިދާޅުވި އެވެ.

މެލްޒާ މިއަދު އާއްމު ކުރެއްވީ އޭނާގެ ހޯއްދެވުންތަކުގެ ވަގުތީ ރިޕޯޓެކެވެ. ހޯދުންތަކުގެ ފުރިހަމަ ރިޕޯޓެއް އެކުލަވައިލުމަށް ފަހު އދ.ގެ ހިއުމަން ރައިޓްސް ކައުންސިލަށް ހުށަހަޅުއްވާނީ 2021 ވަނަ އަހަރު އެވެ.