މަދަނީ އިޖްރާއާތުގެ ބިލް އާންމުންގެ ޚިޔާލަށް ހުޅުވާލައިފި

ރައްޔިތުންގެ މަޖިލީހަށް ހުށަހަޅާފައިވާ މަދަނީ އިޖްރާއާތުގެ ބިލް އާންމުންގެ ޚިޔާލަށް މިއަދު ހުޅުވާލައިފި އެވެ.

މަދަނީ އިޖްރާއާތުގެ ބިލް ސަރުކާރުގެ ފަރާތުން މަޖިލީހަށް ހުށަހަޅާފައި ވާއިރު، އެ ބިލް ޑްރާފްޓް ކުރުމަށް ފަހު މަޖިލީހަށް ފޮނުވުމުގެ ކުރިން ވެސް ބަންޑާރަ ނައިބުގެ އޮފީހުން ކުރިން ވަނީ އެ ބިލް އާންމުންގެ ޚިޔާލަށް ހުޅުވާލައިފަ އެވެ.

ބަންޑާރަ ނައިބުގެ އޮފީހުން މިއަދު ނެރުނު ބަޔާނެއްގައިވަނީ އެ ބިލް އަނެއްކާވެސް އާންމުންގެ ޚިޔާލަށް ހުޅުވާލީ އަންނަ އަހަރު މަޖިލީހުގެ ދައުރު ފެށިގެން އެ ބިލުގެ މަސައްކަތް ކުރުމާ ހަމައަށް ވެސް ވީހާ ވެސް ގިނަ ބައެއްގެ ޚިޔާލު ހޯދައި، ގެންނަންޖެހޭ އިސްލާހުތައް ގެނައުމަށް ކަމަށެވެ. އެ ބިލާ ބެހޭގޮތުން ޚިޔާލެއް ހުށަހަޅަން ބޭނުންވާ ނަމަ މިމަސް ނިމުމުގެ ކުރިން އީމެއިލް ނުވަތަ ސިޓީ މެދުވެރިކޮށް ވެސް އެ އޮފީހަށް ޚިޔާލު ހުށަހެޅޭނެ ކަމަށް އެ ބަޔާނުގައިވެ އެވެ.

މަދަނީ އިޖްރާއާތުގެ ބިލަކީ މަދަނީ ދައުވާތައް ކޯޓުތަކަށް ހުށަހެޅުމުގެ އިޖްރާއާތުތަކާއި ދައުވާ ކުރުމުގެ މުއްދަތުތައް ކަނޑައެޅުމާއި އެފަދަ މައްސަލަތައް ބެލުމުގައި ކޯޓުތަކުގެ ބާރުތަކާއި ޒިންމާތައް ކަނޑައެޅުމުގެ އިތުރުން މައްސަލަތަކުގެ ކުޑަ ބޮޑު މިނަށް ބަލައި، ވަކި ކެޓަގަރީތަކަކަށް މައްސަލަތައް ބަހާލައިގެން ޚާއްސަ އިޖްރާއާތުތަކެއް ދަށުން މައްސަލަތައް ބެލުމާއި ހެކިބަސް ނެގުމާއި ޝަރީއަތްތަކާ ގުޅިގެން ހިނގާ ޚަރަދުތަކަށް ޒިންމާ ކުރުވުމުގެ އުސޫލުތައް ބަޔާންކުރާ ބިލެކެވެ، އަދި ވަގުތީ އަމުރު ނެރުމާއި ހުކުމްތައް އިސްތިއުނާފް ކުރުމާއި ހުކުމްތައް ތަންފީޒު ކުރުމުގެ ޚާއްސަ އުސޫލުތަކެއް ވެސް އެ ބިލުގައި ހިމެނެ އެވެ.

މަދަނީ އިޖްރާއާތުގެ ބިލް އެކުލަވާލާފައިވަނީ ރާއްޖެއިން ބޭރުގެ ކޮންސަލްޓެންޓެއްގެ އެހީގަ އެވެ. މިހާރު އަމަލުކުރާ ޖިނާއީ އިޖްރާއާތުގެ ގާނޫނާއި ގާނޫނުލް އުގޫބާތު ވެސް އެކުލަވާލީ ރާއްޖެއިން ބޭރުގެ ކޮންސަލްޓެންޓެއްގެ އެހީގަ އެވެ.