އެންމެ މޮޅީ މެސީ ކަމަށް ބުނަން އުނދަގޫ: ރޮނާލްޑީނިއޯ

ލަންޑަން (ޑިސެމްބަރު 14) - ފުޓްބޯޅަ ތާރީހުގައި އެންމެ މޮޅީ ބާސެލޯނާގެ ތަރި ލިއޮަނަލް މެސީ ކަމަށް ބުނަން އޭނާ އަށް އުނދަގޫކަމަށް ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިޔާ ބްރެޒިލްގެ ރޮނާލްޑީނިއޯ ބުނެފި އެވެ.

ދާދި ފަހުން ބާސެލޯނާގެ ތަރި ލިއޮނަލް މެސީ ވަނީ ހަ ވަނަ ފަަހަރަށް ބެލޮންޑިއޯ ހޯދައި އެ އެވޯޑް އެންމެ ގިނައިން ހޯދުމުގެ ރެކޯޑް ގާއިމްކޮށްފަ އެވެ. މީގެ ކުރިން ރޮނާލްޑީނިއޯ ވަނީ ގިނަ ފަހަރެއްގެ މަތިން އެކި ޕޯޑިއަމްތަކުގައި މެސީ އަށް ތައުރީފުކޮށްފަ އެވެ.

ބްރެޒިލްގެ މީޑިއާ އަކަށް ދިން އިންޓަވިއުއެއްގައި ރޮނާލްޑީނިއޯ ބުނީ މެސީ އަކީ މި ޖީލުގެ އެންމެ މޮޅު ކުޅުންތެރިޔާ ކަމަށް ބުނުމުން ދެބަސްވެވޭނެ ފަރާތެއް ހުރެގެން ނުވާނެ ކަމަށެވެ.

"އަހަރެން މެސީ އަށް ޓަކައި އުފާކުރަން. އޭނާ އަކީ ބާސެލޯނާގެ ރޫހު. މެސީ އަކީ މި ޖީލުގައި ހުރި ދުނިޔޭގެ އެންމެ މޮޅު ކުޅުންތެރިޔާ. އެކަމާ ދެބަހެއް ނުވެވޭނެ،" 2005 ވަނަ އަހަރު ބެލޮންޑިއޯ ހާސިލްކުރި ރޮނާލްޑީނިއޯ ބުންޏެވެ.

"ކުޅުންތެރިން އަޅާކިޔުމަކީ އަހަރެން ކުރަން ބޭނުންވާ ކަމެއް ނޫން. އެއީ ހަގީގަތުގައި ފުޓްބޯޅަ ތާރީހުގައި އެންމެ މޮޅު ކުޅުންތެރިޔާ ކަނޑައަޅަން އުނދަގޫވީމަ. ޑިއޭގޯ މަރަޑޯނާ އާއި ޕެލޭ ދެން ރޮނާލްޑޯ ވެސް އެބަހުރި. އެހެންވެ އަހަންނަށް އުނދަގޫ ފުޓްބޯޅަ ތާރީހުގައި އެންމެ މޮޅު ކުޅުންތެރިޔަކީ މެސީއޭ ބުނަން. އެކަމަކު ޔަގީނުން ވެސް މި ވަގުތަށް ބަލާއިރު އެންމެ މޮޅީ މެސީ،"

ބާސެލޯނާގެ ޔޫތު ޓީމުތަކުން މެސީގެ ވިދުން ގަދަވަމުން އައިއިރު ސީނިއާ ޓީމުގައި ހުރި ތަރިއަކީ ރޮނާލްޑީނިއޯ އެވެ. ބާސެލޯނާ ސީނިއާ ޓީމަށް މެސީ ޕްރޮމޯޓްކޮށް ކުޅުމުގެ ފުރުސަތު ދޭން ފެށުމުން އޭނާ އަށް ރޮނާލްޑީނިއޯ ވަނީ އެކި ގޮތްގޮތުން އެހީތެރިވެދީފަ އެވެ. ބާސެލޯނާގެ ކޯޗު ފްރޭންކް ރައިކާޑްގެ ނަޒަރުގައި އެންމެ ފުރަތަމަ ދުވަހުން ފެށިގެން ޕްރެޝަރެއް ނެތި މެސީގެ ހުނަރު އެންމެ މޮޅަށް ދައްކަން ރޮނާލްޑީނިއޯ އާއޮ ކާލޯސް ޕުޔޯލް ފަދަ ކުޅުންތެރިން މުހިއްމު ދައުރެއް އަދާކުރި އެވެ.