އިންކަމް ޓެކްސްގެ ގަވާއިދަށް އާންމުންގެ ހިޔާލު ހޯދަނީ

އިންކަމް ޓެކްސްގެ ގާނޫނުގެ ދަށުން މީރާއިން އެކުލަވާލާފައިވާ ގަވާއިދުތަކަށް ގުޅޭ ގޮތުން އާންމުންގެ ހިޔާލު ހޯދަން ހުޅުވާލައިފި އެވެ.

އިންކަމް ޓެކްސް ގަވާއިދާއި ޓްރާންސްފާ ޕްރައިޒިންގެ ގަވާއިދު އެކުލަވާލުމަށް ފަހު އެ އިދާރާގެ ވެބްސައިޓުގައި ވަނީ އާންމުކޮށްފަ އެވެ. މި ގަވާއިދުތަކަށް ހިޔާލު ހުށަހަޅަން ޖެހޭނީ އަންނަ އަންގާރަ ދުވަހުގެ މެންދުރު 12:00 ގެ ކުރިންނެވެ. އީމެއިލްގެ ޒަރީއާއިން ހިޔާލު ހުށަހެޅޭނެ ކަމަށް މީރާއިން ބުންޏެވެ.

މީރާއިން ބުނީ މި ވަގުތަށް ބޭނުންވާ ކަންކަން ހިމަނައިގެން ތައްޔާރުކޮށްފައިވާ ގަވާއިދުތަކެއް ކަމަށެވެ. ކުރިއަށް އޮތް ތަނުގައި ގާނޫނާ ގުޅޭ ގޮތުން ހަދަން ޖެހޭ އިތުރު ގަވާއިދުތަކަށް އާންމުންގެ ހިޔާލު ހޯދަން ވެސް ހުޅުވާނެ ކަމަށް މީރާއިން ބުންޏެވެ.

އިންކަމް ޓެކްސް ގާނޫނު ރައީސް އިބްރާހިމް މުހައްމަދު ސޯލިހު ވަނީ މިދިއަ އަންގާރަ ދުވަހު ތަސްދީގު ކުރައްވައިފަ އެވެ. އަދި ޖެނުއަރީ 1 އިން ފެށިގެން އިންކަމް ޓެކްސް ނަގަން ފަށާނެ އެވެ.

ރާއްޖޭގައި ފުރަތަމަ ފަހަރަށް އިންކަމް ޓެކްސް ނަގާނީ މަހަކު 60،000ރ އަށް ވުރެ މަތިން އާމްދަނީ ލިބޭ މީހުންގެ އަތުންނެވެ. އެގޮތުން މަހަކު 60،000-100،000 ރުފިޔާއާ ދެމެދުގެ އަދަދެއް ލިބޭ މީހުންގެ އަތުން 5.5 ޕަސެންޓް، 150،000-100،000ރ. އާ ދެމެދުގެ އާމްދަނީއެއް ލިބޭ މީހުންގެ އަތުން އަށް ޕަސެންޓް، 150،000-200،000ރ ގެ އާމްދަނީ ލިބޭ މީހުންގެ އަތުން 12 ޕަސެންޓް އަދި މަހަކު 200،000ރ އަށް ވުރެ މަތިން އާމްދަނީއެއް ލިބޭ މީހުންގެ އަތުން 15 ޕަސެންޓްގެ ޓެކްސްއެއް ނަގާނެ އެވެ.

ފިނޭންސް މިނިސްޓްރީން ލަފާކުރާ ގޮތުގައި އިންކަމް ޓެކްސް އިން ދައުލަތަށް އަހަރަކު 450 މިލިއަން ރުފިޔާ ލިބޭނެ އެވެ. އެ ޓެކްސް ދައްކަން ޖެހޭ ވަރުގެ އާމްދަނީއެއް ލިބޭ މީހުންގެ އަދަދު އުޅެނީ ގާތްގަނޑަކަށް 3،200 ގަ އެވެ.