އެޕަލުން ސެޓެލައިޓް އުފައްދަނީ އެ ކުންފުނިން އުފައްދާ ޑިވައިސްތަކަށް އިންޓަނެޓް ފޯރުކޮށްދޭން

މިއީ އެޕަލުން ވަރަށް ސިއްރު ސިއްރުން ހިންގާ ޕްރޮގްރާމެކެވެ. އެޕަލުން ސެޓެލައިޓް އުފައްދަނީ އެވެ. ބޭނުމެއް ކަމަށް ބުނަނީ، އެ ކުންފުނިން އުފައްދާ ޑިވައިސްތަކަށް އިންޓަނެޓް ދިނުމެވެ.

އައިފޯން އަދި އައިޕެޑް ފަދަ އެޕަލުން އުފައްދާ ޑިވައިސްތައް، ދުނިޔޭގެ ކޮންމެ ތަނެއްގައި ބޭނުންކުރި ނަމަވެސް، އެ ހިސާބަކަށް އިންޓަނެޓް ގެންގޮސްދިނުމަކީ އެޕަލުން ކުރަން ބޭނުން ކަމެކެވެ. މިކަން ހާސިލުކުރުމަށްޓަކައި، އަމިއްލަ އިންޓަނެޓް ނެޓްވޯކެއް ދުނިޔެ ވަށާލައި ގަތާލެވިދާނެ ގޮތް ކަރުދާހާ ހަމަ އަށް ގެނައުމަކީ އެޕަލް އަށް އެއްވެސް ކަމެއް ނޫނެވެ.

އެޕަލް އަށް މި މަސައްކަތް ކާމިޔާބުކުރެވިއްޖެ ނަމަ، އައިފޯން ފަދަ "ޑިޒައިން ބައި އެޕަލް" ޑިވައިސްތައް ގެންގުޅޭ މީހުން އުޅޭނީ ވަކި ދުނިޔެއެއްގަ އެވެ. މި ޑިވައިސްތަކަށް އިންޓަނެޓް ލިއްބައިދޭނީ ހަމަ ސީދާ އެޕަލުންނެވެ. އެ ޑިވައިސްއެއް ބޭނުންކުރާ ގައުމެއްގެ ނެޓްވޯކަކަށް ބަރޯސާކުރާކަށް ނުޖެހޭނެ އެވެ.

އަމިއްލަ ސެޓެލައިޓް ނެޓްވޯކެއް ގާއިމުކުރުމަކީ ޚިޔާލަށް ގެންނަ ފަސޭހަ ކެމެކެވެ. އެހެން ނަމަވެސް ބުރަ މަސައްކަތެކެވެ. އެޕަލް އަކީ މި ފަދަ ބުރަ މަސައްކަތްތައް ކާމިޔާބުކުރާ ކުންފުންޏެކެވެ.

ބްލޫމްބާގް ރިޕޯޓްކުރާ ގޮތުގައި، އެޕަލްގެ އިންޖިނޭރުން މިހާރު ކުރާ މަސައްކަތަކީ، އެންޓަނާ ޑިޒައިންކުރުމެވެ. އެޕަލުން ވަނީ ކުރި އަށް އޮތް ފަސް އަހަރު ތެރޭގައި މި މަސައްކަން ނިންމަން ހިފާފަ އެވެ. އެހެން ނަމަވެސް، އަދި ކުރި އަށް ދަނީ މިއީ އެޕަލް އަށް ކުރެވިދާނެ ކަމެއްތޯ ބެލުމަށް ކުރެވޭ މަސައްކަތްތައް ކަމަށް ވެ އެވެ.

އަމިއްލަ ސެޓެލައިޓް އުފައްދައި އިންޓަނެޓް ނެޓްވޯކެއް ހިންގުމަކީ އެޕަލް އަށް ކުރެވޭ ވަރުގެ މަސައްކަތެއް ނަމަ އަދި މާލީ ގޮތުން ކުންފުންޏަށް ތަނަވަސް މަސައްކަތެއް ކަމަށް ލަފާކުރެވޭ ނަމަ އެޕަލުން މިކަން ކުރި އަށް ގެންދާނެ ކަމަށް ބުނެ ވެ އެވެ.