އައިފޯން 13: ނެޓްވޯކް ނުލިބުނަސް ސެޓެލައިޓް މެދުވެރިކޮށް ކޯލް ކުރެވޭނެ؟

އެޕަލް އިން މި މަހު ފަހުކޮޅު ނެރޭނެ ކަމަށް ބުނާ އައިފޯން 13 ގައި ލޯ-އާތު-އޯބިޓް (ލިއޯ) މޯޑް ފީޗާ ނުވަތަ ސެޓެލައިޓް ކަނެކްޓިވިޓީ ހިމަނާފައިވާނެ ކަމަށް ލަފާކޮށްފި އެވެ.

މި ވާހަކަ ދެއްކީ ޓެކް ކުންފުނީގެ އުފެއްދުންތައް ރިސާޗްކުރާ މިން-ޗީ ކުއޯ އެވެ. އޭނާ ބުނެފައިވާ ގޮތުގައި މި ފީޗާ އަކީ މީގެ ކުރިން ވެސް އައިފޯނުތަކަށް ގެނައުމާ ގުޅޭ ގޮތުން އެޕަލް އިން ވަރަށް ބޮޑަށް މަސައްކަތްކޮށްފައި އޮތް ފީޗާއެކެވެ. އެހެންވެ މިހާރު އައިފޯންގެ ކުރިއަށް އޮތް ސީރީޒްއާ އެކު ލިއޯ މޯޑް ފީޗާ ހަގީގަތަކަށް ވުމުގެ ފުރުސަތު ވަރަށް ބޮޑު ކަމަށް ބުންޏެވެ.

މި ފީޗާގެ ސަބަބުން ސެލް ކަނެކްޓިވިޓީއަކާ ނުލައި ނުވަތަ އިންޓަނެޓް ސިގްނަލްތައް ކަމަށްވާ ވައިފައި، 4ޖީ އަދި 5ޖީ އާ ފަދަ ނެޓްވޯކަކާ ނުލައި ކޯލްކޮށް ޓެކްޓްސް މެސެޖް ވެސް ފޮނުވޭނެ އެވެ.

ކުއޯ ބުނެފައިވާ ގޮތުގައި އައިފޯން 13 އާ އެކު މި ފީޗާ ތައާރަފުކުރުމަށް ފަހު އެޕަލްގެ ކުރިއަށް ހުރި އިތުރު އުފެއްދުންތަކުގައި ވެސް ލިއޯ މޯޑް ބޭނުންކުރާނެ އެވެ. އޭގެ ތެރޭގައި އެޕަލްގެ ވީއާރް ހެޑްސެޓާއި އެޕަލް ކާރާއި އިންޓަނެޓާ ގުޅުން ހުރި އިތުރު ޑިވައިސްތައް ހިމެނެ އެވެ.

ކުއޯ ބުނެފައިވާ ގޮތުގައި އައިފޯން 13 ގައި އެޕަލް އިން ބޭނުންކޮށްފައިވާނީ ކުއަލްކޮމް އެކްސް60 ބޭސްބޭންޑް މޮޑަން ޗިޕްގެ ކަސްޓަމައިޒް ވާޝަނެކެވެ. ލިއޯ މޯޑް ފީޗާއާ ބާރުދެނީ ވެސް މި ސަބަބާ ހުރެ އެވެ. އެހެންވެ މިއީ ސެޓެލައިޓް މެދުވެރިއަކަށްވެ، އައިފޯނުގެ މުއާމަލާތްތަކަށް ވަރަށް ބޮޑު ލުއިކަމެއް ގެނެސްދޭނެ ކަމެކެވެ.

އެޕަލް އަކީ އަބަދު ވެސް ކުންފުނީގެ އުފެއްދުންތައް ލޯންޗްކުރުމުގެ ކުރިން އެއްވެސް ވާހަކައެއް ދައްކާ ކުންފުންޏަކަށް ނުވާތީ އައިފޯން 13 އާ ބެހޭ ގޮތުން މި ދެކެވޭ ވާހަކަތަކުގައި އޮތީ ކިހާ ވަރެއްގެ ހަގީގަތެއް ކަމެއް ނޭނގެ އެވެ. އެކަމަކު ކުއޯ ކަހަލަ ރިސާޗަރުންގެ ވާހަކަތައް ވަރަށް ގިނަ ފަހަރަށް ދިމާވެ އެވެ.

އައިފޯން 13 ލޯންޗްކުރާނެ ކަމަށް ބެލެވެނީ މި މަހުގެ 24 ގަ އެވެ.