ބަޖެޓް ތަންފީޒު ކުރާނެ ގޮތުގެ ސާކިއުލާއެއް ނެރެފި

ރައްޔިތުންގެ މަޖިލީހުން މި އަހަރަށް ފާސްކުރި ބަޖެޓު ދައުލަތުގެ އޮފީސްތަކުން ތަންފީޒު ކުރާނެ ގޮތުގެ ސާކިއުލާއެއް ފިނޭންސް މިިނިސްޓްރީން ފޮނުވައިފި އެވެ.

މިދިޔަ މަހުގެ 31 ގައި ފިނޭންސް މިނިސްޓްރީން ފޮނުވި ސާކިއުލާގައި ބުނެފައިވަނީ އޮފީސްތަކަށް ކަނޑައަޅާފައިވާ ބަޖެޓަށް ވުރެ އިތުރަށް ހަރަދު ކުރެވޭނީ ފިނޭންސްގެ ހުއްދައާ އެކު ކަނޑައަޅާފައިވާ ބަޖެޓުގެ ފަސް ޕަސެންޓަށް ވުރެ އިތުރު ނުވާ ގޮތަށް ކަށެވެ. މިގޮތަށް ހަރަދު ކުރެވޭނީ ކޮންމެހެން ކުރަން ޖެހޭ ހަރަދެއް ނުވަތަ އެ ހަރަދެއް ނުކޮށްފި ނަމަ ރައްޔިތުންނަށް ދެމުން އަންނަ ހިދުމަތަކަށް ބުރޫއަރާފާނެ ކަމަކަށް އެކަންޏެވެ.

ފިނޭންސްގެ ގަވާއިދުގައި ބުނެފައިވާ ގޮތުން މަޝްރޫއެއް ހިންގަން ބަޖެޓުގައި ކަނޑައަޅާފައިވާ އެއްވެސް ފައިސާއެއް އެހެން ކަމެއްގައި ބޭނުމެއް ނުކުރެވޭނެ އެވެ. އަދި މުވައްޒަފުންނަށް ހަރަދު ކުރަން ފާސްކުރާ ބަޖެޓުން ވެސް އެހެންކަމަކަށް ހަރަދެއް ނުކުރެވޭނެ އެވެ.

ދައުލަތުގެ އޮފީސްތަކުގެ މުވައްޒަފުންގެ މުސާރައިގެ އޮނިގަނޑަށް އެއްވެސް ބަދަލެއް ގެނެވޭނީ އެ މިނިސްޓްރީ އާއި ނޭޝަނަލް ޕޭ ކޮމިޝަނުގެ ހުއްދަ ލިބިގެންނެވެ. އަދި ބަޖެޓް ކޮށްފައި އޮތް ނަމަވެސް މިހާރު ދޭން ފަށާފައި ނުވާ އެއްވެސް އެލަވެންސެއް މިނިސްޓްރީގެ ހުއްދައާ ނުލާ ނުދެވޭނެ ކަމަށް ވެސް ފިނޭންސުން ބުނެ އެވެ.

ފިނޭންސުން ބުނި ގޮތުގައި ތަކެއްޗާއި ހިދުމަތްތަކަށް އެދޭ ފޯމު ތައްޔާރުކުރަން ނުޖެހޭ ހަރަދުތައް ފިޔަވައި އެހެން ހުރިހާ ހަރަދެއް ކުރަން ޖެހޭނީ ޕާޗޭޒް އޯޑަރު ތައްޔާރު ކުރުމަށް ފަހުގަ އެވެ. އެގޮތަށް އަމަލު ނުކުރާ އޮފީސްތަކާ މެދު ފިޔަވަޅު އަޅާނެ ކަމަށް ވެސް އެ މިނިސްޓްރީން ބުންޏެވެ. މިފަދަ މައްސަލަތަކުގައި ޒިންމާވާން ޖެހޭނީ އެ އޮފީހެއްގެ ފައިނޭންސް އެގްޒެކެޓިވް އެވެ.

ފިނޭންސްގެ މި އުސޫލުތަކަށް ކައުންސިލްތަކުން އަމަލު ކުރާކަށް ނުޖެހެ އެވެ. ކައުންސިލްތަކަށް ހިލޭ އެހީގެ ގޮތުގައި ދައުލަތުން ދޭ ފައިސާ ހޭދަކުރުމަށް ހަމަޖެހިފައިވާ އުސޫލު މި މަހު 15 ގެ ކުރިން ކައުންސިލްތަކުން ނިންމަން ޖެހޭނެ އެވެ.

ސަރުކާރުން ކައުންސިލްތަކަށް މި އަހަރު 1.6 ބިލިއަން ރުފިޔާ ދެ އެވެ. މިއީ ސީދާ ކައުންސިލްތަކަށް ސަރުކާރުން މުޅިން އަލަށް ދޭން ފެށި މާލީ އެހީއެކެވެ. މި އެހީއާ އެކު ރަށު ކައުންސިލްތަކަށް ލިބޭ މާލީ ބާރުވެރިކަން މިދިއަ އަހަރަށް ވުރެ އެވްރެޖްކޮށް 148.6 ޕަސެންޓް ބޮޑުވާނެ އެވެ. އަތޮޅު ކައުންސިލްތަކަށް އެ ލިބެނީ 155.1 ޕަސެންޓް އިތުރުވުމެކެވެ.

ސަރުކާރުގެ އެހީ އަކީ ސިޓީ ކައުންސިލްތަކަށް މާލީ ގޮތުން ލިބޭނެ 433.4 ޕަސެންޓްގެ ކުރިއެރުމެކެވެ.

މި އަހަރު ފާސްކޮށްފައި ވަނީ 37.8 މިލިއަން ރުފިޔާގެ ބަޖެޓެކެވެ.