މަރުގެ ތިން މައްސަލަ ވަރަށް އަވަހަށް އަލުން ޕީޖީ އަށް ފޮނުވާނަން: ކޮމިޝަން

އަނިޔާވެރިކޮށް އަވަހާރަކޮށްލި ޑރ. އަފްރާޝީމް އަލީ އާއި ވަގަށް ނަގައި މަރާލި ނޫސްވެރިޔާ އަހްމަދު ރިލްވާނާއި ބްލޮގަރު ޔާމީން ރަޝީދުގެ މަރުގެ މައްސަލަ ވަރަށް އަވަހަށް އަލުން ޕްރޮސިކިއުޓަ ޖެނެރަލްގެ އޮފީހަށް ފޮނުވާނެ ކަމަށް މަރު ކޮމިޝަނުން މިއަދު ބުނެފި އެވެ.

މި ތިން މަރާ ގުޅިގެން ކޮމިޝަނުން ދައުވާކުރަން އެދުނީ މުހައްމަދު މަޒީދާއި ސާމިތު މުހައްމަދުގެ މައްޗަށެވެ. ހަރުކަށި ފިކުރުގެ ޖަމާއަތް ހިންގައި ހަރަކާތްތައް ފުޅާކޮށް ހިންގާ ކަމަށް ތުހުމަތުކުރާ އެ ދެ މީހުންނަކީ ތިން މަރުގެ ވެސް މޭސްތިރިން ކަމަށް މަރު ކޮމިޝަންގެ ރިޕޯޓުގައި ވަނީ ތުހުމަތުކޮށްފަ އެވެ.

މަރު ކޮމިޝަނުން ދައުވާކޮށްދޭން އެދުނު މައްސަލަތަކުގެ ތަހުގީގު އިތުރަށް ފުރިހަމަކުރަން ޕްރޮސިކިއުޓަ ޖެނެރަލްގެ އޮފީހުން ވަނީ އަނބުރާ ފޮނުވާލައިފަ އެވެ.

ކޮމިޝަންގެ މެމްބަރު އަދި ގާނޫނީ ވަކީލް ފަރީޝާ އަބްދުﷲ "މިހާރު" އަށް ވިދާޅުވީ ޕީޖީން އެދުނު ކަންކަން ފުރިހަމަ ކުރުމުގެ މަސައްކަތް ކުރިއަށްދާ ކަމަށެވެ. އެކަން ނިމުމާ އެކު އަލުން ޕީޖީ އަށް ފޮނުވާނެ ކަމަށް ވިދާޅުވި އެވެ.

"ހުރިހާ މައްސަލަތަކެއްގެ ވެސް މަސައްކަތް އެބަދޭ،" ފަރީޝާ ވިދާޅުވި އެވެ.

މަޒީދާއި ސާމިތުގެ އިތުރުން ކޮމިޝަނަށް ދޮގު މައުލޫމާތު ދިން ކަމަށް ތުހުމަތުކޮށް، ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ މައްޗަށް ވެސް ދައުވާ ކޮށްދޭން ކޮމިޝަނުން އެދުނެވެ. އެކަމަކު ޕީޖީން އެދުނީ، ފުލުސް އޮފީހަށް ހުށަހަޅައިގެން ޖިނާއީ ތަހުގީގެއް ހިންގުމަށެވެ.

އަފްރާޝީމްގެ މަރާ ގުޅޭ ގޮތުން ކޮމިޝަނުގެ ތަހުގީގު ރިޕޯޓް ރައީސް އޮފީހުން ވަނީ އާއްމުކޮށްފަ އެވެ. އެ ރިޕޯޓުގައި، ރާއްޖޭގައި ހަރުކަށި ފިކުރުގެ ޖަމާއަތްތައް ބެހިފައިވާ ގޮތާއި ނުރައްކާތެރި މިންވަރާއި ހަރަކާތްތައް ހިންގާ ގޮތް ތަފްސީލްކޮށްދީފައިވެ އެވެ.

މަރު ކޮމިޝަނަށް ހުށަހަޅާ މައްސަލަތައް ތަހުގީގުކޮށް ނިންމުމަށް ކަނޑައަޅާފައި ވަނީ ދެ އަހަރުގެ މުއްދަތެކެވެ. އެ ކޮމިޝަން އުފެއްދިތާ ކުރީކޮޅު އާއްމުކުރި ގޮތުގައި، ތަހުގީގުކުރަން ޖެހޭ މައްސަލަތަކުގެ އަދަދު އޭރު އުޅެނީ 29 ގަ އެވެ.