އެމްޑީޕީގެ ޓިކެޓް ހޯދަން 1،300 އަށް ވުރެ ގިނަ މީހުން

އަންނަ އޭޕްރީލްް މަހު ބާއްވާ ލޯކަލް ކައުންސިލްތަކުގެ އިންތިހާބަށް އެމްޑީޕީގެ ޓިކެޓްގައި ވާދަކުރާނެ ކެންޑިޑޭޓުން ހޮވުމުގެ ޕްރައިމަރީގައި ވާދަކުރަން 1،300 އަށް ވުރެ ގިނަ މީހުން ފޯމު ލައިފި އެވެ.

އެ ޕާޓީގެ އިންތިހާބާ ބެހޭ ކޮމިޓީގެ ނައިބު މުގައްރިރު އަދި ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އިބްރާހީމް މުއިއްޒު މިއަދު ވިދާޅުވީ، ސުންގަޑި ހަމަވިއިރު، ޕްރައިމަރީގައި ބައިވެރިވާން ހުށަހެޅި ފޯމުގެ ތެރެއިން 1،364 ފޯމު ބަލައިގެންފައިވާ ކަމަށެވެ.

މި ސަރުކާރު ހިންގާ ކޯލިޝަންގެ މައި ޕާޓީ، އެމްޑީޕީގެ ޑެޕިއުޓީ ޗެއާޕާސަން އަދި ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ރޭ ކުރެއްވި ޓްވީޓެއްްގައި ވިދާޅުވީ ޕްރައިމަރީގައި އެހާ ގިނަ ބަޔަކު ބައިވެރިވުމަކީ "އެޖެންޑާ 19 ޕްރޮމޯޓްކުރަން ހިންގާ ހަރަކާތުގައި ކޯލިޝަންގެ މެމްބަރުން ބައިވެރި ނުވާން " އިދިކޮޅުން ގޮވައިލި ގޮވައިލުމަށް ދިން ރައްދެއް ކަމަށެވެ.

އޭނާ އެހެން ވިދާޅުވީ، އެމްޑީޕީގެ "އެޖެންޑާ 19" ޕްރޮމޯޓް ކުރަން ހިންގާ ހަރަކާތްތަކުގައި އިދިކޮޅު ކޯލިޝަންގެ މެމްބަރުން ބައިވެރި ނުވާން އެދި ޕީޕީއެމް/ޕީއެންސީން ނެރުނު ބަޔާނަކަށް ދިން ރައްދެއްގަ އެވެ.

ނިޔާޒް ފާހަގަކުރެއްވި ގޮތުގައި، ކައުންސިލް އިންތިހާބުގެ 980 މަގާމަށް 1،400 އަށް ވުރެ ގިނަ މީހުން ކުރިމަތިލި އެވެ.

ޕްރައިމަރީގައި ބައިވެރިވާން ފޯމު ލުމާއި ވޯޓާސް ލިސްޓަށް ޝަކުވާ ހުށަހަޅަން އެމްޑީޕީން ފުރަތަމަ ކަނޑައެޅި ސުން ގަޑި އަކީ މިދިޔަ ހުކުރު ދުވަހުގެ ހަވީރު 6:00 އެވެ. އެކަމަކު، އެ ދުވަހުގެ ހަވީރު ވީ އިރު ވެސް ގިނަ އަދަދެއްގެ މީހުން ކިއުގައި ތިބުމުން ރޭގަނޑު 9:00 އާ ހަމައަށް އިތުރު ކުރި އެވެ.

ލޯކަލް ކައުންސިލްތަކުގެ އިންތިހާބަށް އެމްޑީޕީން ވާދަކުރާނެ ކެންޑިޑޭޓުން ކަނޑައަޅާ ޕްރައިމަރީ އޮންނާނީ މި މަހުގެ 31 ގަ އެވެ.

ލޯކަލް ކައުންސިލްތަކުގެ ގާނޫނަށް ބަދަލު ގެނެސް، މޭޔަރުންނާއި ކައުންސިލްތަކުގެ ރައީސުން ވަކިން ހޮވާ ގޮތަށް ހަމަޖެއްސުމާއި ކައުންސިލްތަކުގެ ދައުރު ފަސް އަހަރަށް ބަދަލުކުރުން ފަދަ ސަބަބުތަކާ ހެދި މި އަހަރުގެ އިންތިހާބުގެ ވާދަވެރިކަން ވަނީ ބޮޑުވެފަ އެވެ. އެގޮތުން މާލެ އާއި އައްޑޫ އަދި ފުވައްމުލަކުގެ މޭޔަރުންގެ ގޮނޑި އަށް އެމްޑީޕީގެ ވަރުގަދަ އެތައް ބޭފުޅުންނެއް ވާދަކުރައްވަ އެވެ.

އިލެކްޝަންސް ކޮމިޝަނުން އާއްްމު ކޮށްފައިވާ މައުލޫމާތުން އެނގޭ ގޮތުގައި މިދިޔަ އަހަރުގެ ސެޕްޓެމްބަރު މަހާ ހަމައަށް އެމްޑީޕީ ގައި 53،000 އަށް ވުރެ ގިނަ މެމްބަރުން ތިއްބެވެ. ބެލެވޭ ގޮތުގައި އެ ޕާޓީގެ މެމްބަރުންގެ އަދަދު މިހާރު ވާނީ އެ އަށް ވުރެ އިތުރުވެފަ އެވެ.

ލޯކަލް ކައުންސިލް އިންތިހާބަށް ކެމްޕޭން ކުރުމަށް އަތޮޅުތަކަށް ކުރާ ފުރަތަމަ ދަތުރު މިއަދު ފަށާނެ ކަމަށް އެމްޑީޕީން ބުންޏެވެ. ރާއްޖޭގައި އެންމެ ފަހުން ބޭއްވި ދެ އިންތިހާބު ކާމިޔާބުކުރީ އެ ޕާޓީންނެވެ. އެއީ 2018 ވަނަ އަހަރުގެ ރިޔާސީ އިންްތިހާބާއި މިދިޔަ އަހަރު ބޭއްވި މަޖިލިސް އިންތިހާބެވެ.