ސަރުކާރު ނުވެއްޓި އޮންނަނީ ކޯލިޝަނާ ހެދި: އާދަމް ޝަރީފް

އެމްޑީޕީގެ އާއްމު މެމްބަރުންނަށް ހައްގު މިންވަރު ލިބުމަށް ހުރަސް އެޅިފައި ވަނީ ވެރިކަން ކުރާ ކޯލިޝަންގައި ހިމެނޭ ޕާޓީތަކަށް ބައި އަޅަން ޖެހުމުން ކަމަށް ވިދާޅުވެ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅާ ގުޅިގެން ކޯލިޝަންގެ ދިފާއުގައި ކުރީގެ ޑިފެންސް މިނިސްޓަރު އަދި ޕީއެންސީގެ ނައިބު ރައީސް އާދަމް ޝަރީފް އުމަރު މިއަދު ނުކުމެވަޑައިގެންފި އެވެ.

ކައުންސިލް އިންތިޚާބުގެ ކެމްޕޭނަށް ބޮޑު ތިލަދުންމައްޗަށް ވަޑައިގެން ހއ. އިހަވަންދޫގައި ނަޝީދު ވިދާޅުވީ އެމްޑީޕީ ވެރިކަމުގައި އޮތް ނަމަވެސް އެ ޕާޓީގެ އާއްމު މެމްބަރުންނަށް ހިތްހަމަޖެހުން ނުލިބުމުގެ ސިއްރަކީ ކޯލިޝަން ކަމަށެވެ. މަޖިލީސް އިންތިޚާބުގައި ރައްޔިތުން ތިބި ގޮތް ސާފު ކަމަށާއި ކައުންސިލް އިންތިޚާބުގެ ބޭނުންތެރިކަން ބޮޑުވަނީ، ސަރުކާރު ދެމިއޮންނާނީ ކޯލިޝަންގެ ތެރޭގައިތޯ ކަނޑައަޅަން ކަމަށް ވިދާޅުވި އެވެ.

ކޯލިޝަނަކުން ވެރިކަން ކުރުމާ ދެކޮޅަށް އަބަދުވެސް ވަކާލާތު ކުރައްވާ ނަޝީދު ވިދާޅުވި ގޮތުގައި ލާމަރުކަޒީ ނިޒާމަކީ އެ ޕާޓީގެ ވިސްނުމެކެވެ. ކޯލިޝަން ޕާޓީތަކަށް، އެ ޕާޓީ އެކު ވެސް އެ ނިޒާމް ހިންގަން ނޭނގޭނެ ކަމަށް ވިދާޅުވި އެވެ.

ކުރީގެ ރައީސް އަބްދުﷲ ޔާމީނާ ދެކޮޅަށް އެކުލަވާލައި، 2018 ގެ ރިޔާސީ އިންތިޚާބު ކާމިޔާބު ކުރި ކޯލިޝަނާ ދެކޮޅަށް ނަޝީދު އަމާޒުކުރެއްވި ބަހުގެ މި ހަމަލާތަކަށް އެ ޕާޓީތަކުން ރައްދު ނުދެނީސް ދިފާއުގައި ނުކުމެވަޑައިގެން އާދަމް ޝަރީފް ވިދާޅުވީ "މި ސަރުކާރު ނުވެއްޓި އޮތުމުގެ ސަބަބަކީ ކޯލިޝަން" ކަމަށެވެ.

ވެރިކަން ކުރާ ކޯލިޝަންގައި އެމްޑީޕީގެ އިތުރުން ހިމެނެނީ ޖުމްހޫރީ ޕާޓީ އާއި އަދާލަތު ޕާޓީ އަދި ކުރީގެ ރައީސް އަދި އެމްއާރުއެމްގެ ރައީސް މައުމޫން އަބްދުލްގައްޔޫމެވެ. ކޯލިޝަންގެ ވެރިކަމެއް އުފެއްދީ، މި ޕާޓީތަކުގެ ލީޑަރުން ނިސްބަތްވެވަޑައިގަންނަވާ ޕާޓީތަކަށް ސަރުކާރުން ވަކި ޕަސެންޓެއް ކަނޑައަޅައި ވެރިކަން ކުރާށެވެ. ފަސް އަހަރު މި ކޯލިޝަން ދެމެހެއްޓުމަށް، މަޖިލީސް މެދުވެރިކޮށް ގާނޫނީ ބާރުވެރިކަން ދިނުމަކީ ވެސް ރައްޔިތުންނަށް ކެމްޕޭން ތެރޭގައި ވެފައިވާ ވައުދެކެވެ.

ކޯލިޝަން އުފެއްދި ރޫހާ ޚިލާފަށް ނަޝީދު ދެއްކެވި ވާހަކަފުޅާ މެދު ހިތްހަމަޖެހިވަޑައިނުގަތް އާދަމް ޝަރީފް ވިދާޅުވީ އެމްޑީޕީ އަށް ވެރިކަމަށް އާދެވުނީ ކޯލިޝަނުން ވެސް ކުރި މަސައްކަތުން ކަމަށެވެ. ސަރުކާރު ނުވެއްޓި އޮތުމަށް މެދުވެރިވެފައި ވަނީ ވެސް އެ ސަބަބު ކަމަށް ވިދާޅުވި އެވެ.

އާދަމް ޝަރީފް ވިދާޅުވި ގޮތުގައި ސަރުކާރުގެ ހިންގުން ލަސްވެފައި އިޚްލާސްތެރި ކަމެއް ވެސް ނެތެވެ. ޚިދުމަތް ނުދެވެނީ ހިންގަން ނޭނގޭތީ ކަމަށް ވިދާޅުވި އެވެ.

ނަޝީދު ވިދާޅުވި ގޮތުގައި މަޖިލީސް އިންތިޚާބެކޭ އެއްގޮތަށް ކައުންސިލް އިންތިޚާބު ވެސް އެމްޑީޕީ އަށް ދޭން ޖެހޭ ސަބަބަކީ ރައްޔިތުން އެދޭ ގޮތަށް ވެރިކަން ހިންގުމެވެ. އެގޮތަށް ކަންކަން ތަރުތީބުކޮށްގެން އެމްޑީޕީ ނޫން ބަޔަކަށް ހިންގަން ނޭނގޭނެ ކަމަށް ވިދާޅުވި އެވެ.