މުވައްޒަފުން ބިނާ ކުރުމުގެ އެވޯޑު ހޮލިޑޭ އިން ރިސޯޓަށް

މުވައްޒަފުން ބިނާ ކުރުމުގައި އެންމެ ފާހަގަކޮށްލެވޭ ރިސޯޓަށް ކޮންމެ އަހަރަކު "ހިޔުމަން ކެޕިޓަލް އޮފް އެޗްއާރު" އިން ދޭ "ސްޓާފް ރިކްރިއޭޝަން ޓީމް އޮފް ދަ އިޔާ" ގެ އެވޯޑު ހޮލިޑޭ އިން ކަނޑޫމާ ރިސޯޓަށް ލިބިއްޖެ އެވެ.

މި އެވޯޑު އެ ރިސޯތަށް ލިބިފައިވަނީ މުވައްޒަފުން ކުރިއަރުވައި މުވައްޒަފުންނަށް އިތުރު ފުރުސަތުތައް ހުޅުވައިދިނުމުގައި ރިސޯޓުގެ އެޗްއާރު ޓީމުން ކުރާ މަސައްކަތަށެވެ. މިއީ ރިސޯޓާއި ވިޔަފާރި ކުރިއެރުވުމަށް ކޮންމެހެން ބޭނުންތެރި ކަމެއް ކަމަށް ހޮލިޑޭ އިންގެ މާކެޓިން އެންޑްކޮމިއުނިކޭޝަންސް މެނޭޖަރު ރަމޭޝާ ސަމަރަސިންހެ ވިދާޅުވި އެވެ.

މުވައްޒަފުން ބިނާ ކުރުމުގެ އިތުރުން އެންމެ އެޗްއާރު ލީޑަރުގެ އެވޯޑު ވެސް ލިބިފައިވަނީ އެ ރިސޯޓުގެ އެޗްއާރު މެނޭޖަރު އަހުމަދު ޝަޒީން އަށެވެ. މި ދެ އެވޯޑަކީ ވެސް އެ ރިސޯޓަށް ލިބުނު ވަރަށް ބޮޑު ޝަރަފެއް ކަމަށް ހޮލިޑޭ އިން ރިސޯޓުން ދެކެ އެވެ.

އެ ރިސޯޓުގެ ޖެނެރަލް މެނޭޖަރު ޖޯސެފް ވިދާޅުވީ ޝަޒީންއަކީ ރިސޯޓުގެ މުވައްޒަފުން ކުރިއެރުވުމަށް ނުހަނު ގިނަގުނަ މަސައްކަތްތައް ކުރައްވާ ބޭފުޅެއް ކަމަށެވެ. އަދި އެ ރިސޯޓުގެ އެޗްއާރު ޓީމުގެ މަސައްކަތުން އެ ރިސޯޓަކީ މުވައްޒަފުން މަސައްކަތް ކުރާ ހިތްވާ ފަދަ މާހައުލެއް އޮތް ރިސޯޓަކަށް ހަދާފައިވާ ކަން އޭނާ ފާހަގަކުރެއްވި އެވެ.

ހޮލިޑޭ އިން ރިސޯޓުން ވަނީ މި ކާމިޔާބީ ފާހަގަ ކުރުމަށް ހާއްސަ ހަރަކާތްތަކެއް ވެސް ކުރިއަށް ގެންދަން ރާވައިފަ އެވެ. އެގޮތުން، "ސެލެބްރޭޓް ސާވިސް ވީކް"ގެ ނަމުގައި ކުޅިވަރުގެ ހަރަކާތްތަކާއި އިޖްތިމާއީ ހަރަކާތްތައް ކުރިއަށް ގެންދާނެ އެވެ. މިއީ މުވައްޒަފުން ކުރާ މަސައްކަތަށް ޝުކުރުވެރިވުމުގެ ގޮތުން ފާހަގަކުރާ ހަފްޓާއެއް ކަމަށް ހޮލިޑޭ އިން ރިސޯޓުން ބުނެ އެވެ.

މީގެ އިތުރުން ތިމާވެށި ރައްކާތެރިކުރުމުގެ ގޮތުން އެ ރިސޯޓު ހިންގާ އިންޓަކޮންޓިނެންޓަލް ހޮޓެލްސް ގްރޫޕުން "ގިވިން ފޯ ގުޑް"ގެ ނަމުގައި ޗެރިޓީ ހަރަކާތްތަކާއި ގަސް އިންދުން ފަދަ ހަރަކާތްތައް މި އަހަރު ތެރޭގައި ކުރިއަށް ގެންދާނެ ކަމަށް އެ ރިސޯޓުން ބުންޏެވެ.