އައިފޯން 7 އަށް ހެޑްފޯން ޖެކް އަނބުރާ ގެންނަނީ

އެޕަލްގެ އެންމެ ފަހުގެ ފޯނު ކަމަށްވާ އައިފޯން 7 ގައި އެންމެ ތަފާތު އެއް ކަމަކީ ހެޑްފޯން ޖެކް ޖަހާނެ ތަނެއް ނެތުމެވެ. ވަޔަލެސް ހެޑްފޯނަށް ބަދަލުވުމެވެ. އެކަމަކު ކުރިން ވެސް ބޭނުންކުރި ގޮތަށް ވާގަނޑުލީ ހެޑްފޯން ބޭނުންވާ ނަމަ، ލައިޓްނިން ޕޯޓަށް އެޑަޕްޓަރެއް ގުޅައިގެން ހެޑްފޯން ޖެހިދާނެ އެވެ.

އެޕަލް އިން ބޭނުންވަނީ ހެޑްފޯން ވަޔަލެސްކުރަން ކަމަށް ވިޔަސް މިކަމާ އެހާ ބޮޑަށް އެއްބަސްނުވާ މީހުން މަދެއް ނޫނެވެ. އެހެންވެ ބަޔަކު މިހާރު މަސައްކަތް ފަށާފައި ވަނީ އައިފޯން 7 އަށް ހެޑްފޯން ޖެކް އަނބުރާ ގެނެވޭނެ ގޮތެއް ހޯދުމަށެވެ. އެގޮތުން އައިފޯން 7 އަށް ހާއްސަ ބެޓެރީ ކޭހެއް އުފެއްދުމަށް ފައިސާ ހޯދުމުގެ މަސައްކަތް ވަނީ ފަށައިފަ އެވެ. އެ ކޭސްގައި ލައިޓްނިން ޕޯޓާއި ހެޑްފޯން ޖެކް ވެސް އިންނާނެ އެވެ.

"ފިއުޒް ކޭސް" ގެ މި ކޮންސެޕްޓް ހަގީގަތަކަށް ހެދުމަށް ދަނީ މަސައްކަތް ކުރަމުންނެވެ. އެ ކޭސް އުފައްދާނީ އެމެރިކާގެ ޓެކްސަސްގެ ކުންފުންޏެއް ކަމަށްވާ އެކްޗުއަލް އިނޮވޭޝަން އިންނެވެ.

މީގެ ކޭސް އުފެއްދުމަށް ފައިސާ ހަދިޔާކުރާ ފުރަތަމަ 250 މީހުންނަށް މި ވިއްކާނީ 49 ޑޮލަރަށް ކަމަށާއި ދެން އެހީވާ 400 މީހުންނަށް 59 ޑޮލަރަށް ވިއްކާނެ ކަމަށް އަދި އޭގެ ފަހުން 69 ޑޮލަރަށް އާންމުކޮށް ވިއްކާނެ ކަމަށް ވަނީ ބުނެފަ އެވެ.

އައިފޯން 7 އަށް އުފައްދާ ކޭސްގައި 2400 މިލިއެމްޕް އަވާސްގެ ބެޓެރީއެއް އަދި 7 ޕްލަސްގެ ކޭސްގައި 3600 މިލިއެމްޕް އަވާސްގެ ބެޓެރީއެއް ހިމަނަން ވަނީ ނިންމައިފަ އެވެ. މި ޗާޖުކުރާނީ ލައިޓްނިކް ކޭބަލްގެ ބަދަލުގައި މައިކްރޮ ޔޫއެސްބީ ބޭނުންކޮށްގެންނެވެ.

"ފިއުޒް" އަކީ ހާޑްވެއާ ސަޕްލައިކުރުމުގެ އެއްވެސް ތަޖުރިބާއެއް ހުރި ބައެއް ކަމެއް އެނގިފައެއް ނެތެވެ. އެކަމަކު އައިފޯން 7 އަށް މީގެ ކޭސްއެއް ހަމަ ކޮންމެހެން ބޭނުންވާ ކަމަށް ގަބޫލުކުރެވޭ ނަމަ ރިސްކު ނަގާފައި ފިއުޒް އަށް ފައިސާ ހަދިޔާކުރަންވީ އެވެ. ފިއުޒް އިން އުންމީދުކުރަނީ ޑިސެމްބަރު މަހު އެ މީހުންގެ އުފެއްދުން ސަޕްލައިކުރަން ފެށޭނެ ކަމަށެވެ.