އޮންލައިންކޮށް ފެން ބިލް ދައްކަން އެމްޑަބްލިއުއެސްސީން އިލްތިމާސްކޮށްފި

ފެން ބިލް ދައްކަން މި ދުވަސްވަރު އެމްޑަބްލިއުއެސްސީ އަށް ދިއުމުގެ އޮންލައިންކޮށް ބިލް ދައްކަން އެ ކުންފުނިން މިއަދު އިލްތިމާސްކޮށްފި އެވެ.

މާލޭގައި ފެނުގެ ހިދުމަތް ފޯރުކޮށްދޭ ކުންފުނިން ނެރުނު ބަޔާނުގައި ބުނީ ކޮވިޑް-19 އަށް ރާއްޖޭން ހަ މީހަކު ޕޮޒިޓިވްވެފައި ވާީ، އެ ވައިރަސް ފެތުރުން ހުއްޓުވަން ސަލާމަތީ ފިޔަވަޅުތައް އަޅަން ކަމާބެހޭ އިދާރާތަކުން އަންގާފައިވާ ކަމަށެވެ. އެހެންވެ ކަސްޓަމަ ސާވިސް ކައުންޓަރަށް ދިއުމުގެ ބަދަލުގައި މޮބައިލް އެޕްލިކޭޝަން އަދި އޮންލައިން ހިދުމަތުގެ ބޭނުން ހިފަން އެ ކުންފުނިން އެދިފައި ވެ އެވެ.

އެ ކުންފުނީގެ އެޕްލިކޭޝަން މެދުވެރިކޮށް، ކިއުގައި ނުޖެހި، ކޮންމެ މަހެއްގެ ފެން ބިލަށް އަރާ ވަރު ބަލައި ފައިސާ ދެއްކޭނެ އެވެ. އޮންލައިނުން، ފެނާއި ނަރުދަމާގެ ހިދުމަތްތަކަށް ފޯމު ހުށަހަޅައި ގޭގައި ތިބެގެން އެ ހިދުމަތުގެ ސްޓޭޓަސް ބަލައިލެވޭނެ އެވެ.

"ވީމާ، މިފަދަ ދަނޑިވަޅުތަކުގައި ސަރުކާރުގެ ކަމާބެހޭ އިދާރާތަކުން ފޯރުކޮށްދޭ އިރުޝާދުތަކަށް ފުރިހަމައަށް ތަބާވެ އަމަލުކުރުމަށް އެދެމެވެ. އަދި މި ކުންފުނީގެ ހިދުމަތް ހޯދައި ލިބިގަތުމުގައި މި ދެންނެވި ވަސީލަތްތަކުގެ ބޭނުން ހިފައި ރައްކާތެރިކަމުގެ ފިޔަވަޅު އެޅުމަށް ހުރިހާ ކަސްޓަމަރުންގެ އަރިހުން އެދެމެވެ،" ބަޔާނުގައި ބުންޏެވެ.

ހިދުމަތްތަކާ ގުޅޭ މައުލޫމާތު ސާފުކުރަން ނުވަތަ މައްސަލައެއް ހުށަހަޅަން ކަސްޓަމަ ކެއާ ސެންޓަރުގެ ނަންބަރު، 105 އަށް ގުޅޭނެކަމަށް އެމްޑަބްލިއުއެސްސީން ބުންޏެވެ.