ކޮވިޑް-19: ޝައްކު ކުރެވޭ ކުޑަކުއްޖަކު ހިތަދޫން ޓެސްޓް ކުރަނީ

ކޮވިޑް-19 އަށް ޝައްކު ކުރެވިގެން އައްޑޫ ހިތަދޫގެ ކުޑަކުއްޖެއްގެ ޓެސްޓެއް ހެދުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފި އެވެ.

އުމުރުން 7-8 އަހަރާ ދެމެދުގެ އެ ކުއްޖާގެ ސާމްޕަލް ނެގުމުގެ ކަންކަން ކުރިއަށް ގެންދަން އެޗްޕީއޭ އިން އައްޑޫ އީކުއެޓޯރިއަލް ހޮސްޕިޓަލަށް އަންގާފައިވާ ކަމަށް އައްޑޫ މޭޔަރު އަބްދުﷲ ސޯދިގް (ސޯބެ) "މިހާރު" އަށް ވިދާޅުވި އެވެ.

ޓެސްޓް ހަދާނީ މާލޭގެ އައިޖީއެމްއެޗުންނެވެ.

ސޯބެ ވިދާޅުވި ގޮތުގައި، އިންޑިއާގެ ކޮޗިން އިން އައްޑު އަށް އިއްޔެ ދިޔަ އެ ކުއްޖާގެ ޓެސްޓް ކުރިއަށް ގެންދާތީ، ކުއްޖާ ދިރިއުޅޭގެ 14 ދުވަހަށް "ބަންދު" ކޮށްފައިވާކަން ކަން އެޗްޕީއޭ އިން ވަނީ އަންގައިފަ އެވެ. އެ ކުއްޖާ ކޮޗިން އިން އައްޑު އަށް ދިޔައީ ވެލާނާ އިންޓަނޭޝަނަލް އެއާޕޯޓުގައި މަޑުކުރުމަށް ފަހު ކަމަށް ވެ އެވެ.

އެޗްޕީއޭގެ އެންގުމުގައި ވަނީ ސިއްހީ ގޮތުން އިތުރަށް ބަލަންޖެހޭ ކަންކަން ބަލައި، އެހެން އެންގުމެއް އަންގަންދެން، އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން، ހިތަދޫ އެ ގެ 14 ދުވަހުގެ މުއްދަތަށް "ބަންދު" ކޮށްފައިވާ ކަމަށެވެ. އެހެންވެ، އެ ގޭގައި ތިބި ބަޔަކަށް އިތުރު އެއްވެސް ކަމެއް އަންގަން ދެން އެ ގެއިން ބޭރަށް ދިއުމާއި އެޗްޕީއޭގެ ހުއްދަ ނެތި އެއްވެސް ބަޔަކު އެ ގެ އަށް ވަނުން މަނާކޮށްފައިވާ ކަމަށް ވެސް އެންގުމުގައި ވެ އެވެ.

ރާއްޖެ އިން ކޮރޯނާވައިރަސް ޖެހިފައިވާ 13 މީހަކު ފެނިފައިވާއިރު، އޭގެ ތެރޭގައި އެއްވެސް ދިވެއްސަކު އަދި ނުހިމެނެ އެވެ. ރާއްޖެ އިން މި ބައްޔަށް ޕޮޒިޓިވް ވެފައި ވަނީ ކުރެއްދޫ އައިލެންޑް ރިސޯޓުގައި މަސައްކަތް ކުރާ ދެ ބިދޭސީއަކާއި 11 ޓޫރިސްޓެކެވެ. އެ މީހުން ނިސްބަތް ވަނީ އިޓަލީ އާއި ޖަރުމަނާއި އިނގިރޭސި ވިލާތާއި ސައުތު ކޮރެއާ އަދި ތުރުކީ އަށެވެ. އޭގެ ތެރޭގައި އެންމެ ގިނައީ އިޓަލީގެ މީހުންނެވެ. އެ ގައުމުގެ ނުވަ މީހެއްގެ ގައިން ކޮވިޑް ބަލި ފެނިފައިވާ ކަމަށް އެޗްޕީއޭ އިން ބުނެފައި ވެ އެވެ.

ކޮވިޑް ބަލިން އިތުރަށް ފެތުރުނަނުދިނުމަށްޓަކައި ސަރުކާރުން މިދިޔަ ބުރާސްފަތި ދުވަހު ވަނީ ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާންކޮށް، ވަރުގަދަ ފިޔަވަޅުތަކެއް އަޅަން ފަށައިފަ އެވެ. އޭގެ ތެރޭގައި ރިސޯޓުތަކަށް އަރައިފޭބުން ވަކި މުއްދަތަކަށް މަނާކުރުމާއި ގެސްޓް ހައުސްތަކަށް ޓޫރިސްޓުން ގެންދިއުން މަނާކުރުން ހިމެނެ އެވެ. އަދި ސްކޫލްތަކުގެ ކިޔެވުން ދެ ހަފުތާ އަށް މެދުކަނޑާލުމާއި ކިޔަވައިދޭ އެހެނިހެން ތަންތަން މިވަގުތަށް ބަންދުކުރުމާއި ސަރުކާރުގެ އޮފީސްތައް އަންނަ ބުރާސްފަތި ދުވަހުން ފެށިގެން އަންނަ ހަފުތާގެ ބުރާސްފައްޗާ ހަމައަށް ބަންދުކުރުން ހިމެނެ އެވެ.