މުއާޒަށް އަލުން ޔޫތު މިނިސްޓްރީގެ ކޯޑިނޭޓަރުކަން ދީފި

ޔޫތު މިނިސްޓްރީގެ އެގްޒެކްޓިވް ކޯޑިނޭޓަރުގެ މަގާމުގައި ހުންނަވަނިކޮށް މިދިޔަ އަހަރުގެ ތެރޭގައި މަގާމުން ވަކި ކުރި އަބްދުﷲ މުއާޒު އަލުން އެ މަގާމަށް ހަމަޖައްސައިފި އެވެ.

މުއާޒު ކުރިން މަސައްކަތް ކުރެއްވީ ޔޫތު މިނިސްޓްރީގެ ދަށުން ހިންގަމުން ގެންދާ ނެޝަނަލް ސެންޓަ ފޯ ދި އާޓްސް (އެންސީއޭ)ގަ އެވެ.

ފިލްމީ ދާއިރާ އިން މަޝްހޫރު ވެފައިވާ މުއާޒު ދެން ވެސް މަސައްކަތް ކުރެއްވުމަށް ހަމަޖެހިފައިވަނީ އެންސީއޭގަ އެވެ.

މުއާޒު އޭރު ވަޒީފާ އިން ވަކި ކުރީ ކީއްވެ ކަމެއް ސަރުކާރުން ވެސް އަދި އޭނާ ވެސް ހާމައެއް ނުކުރެ އެވެ. އެކަމަކު އެނގިފައިވާ ގޮތުގައި އޭނާ ވަޒީފާ އިން ވަކި ކުރީ އޭރު ޖެހުނު ސިޔާސީ މައްސަލައެއްގަ އެވެ.

ވަޒީފާ އިން ވަކި ކުރިތާ މާ ގިނަ ދުވަހެއް ނުވެ، ފުލުހުން ބަލަމުންދާ މައްސަލައަކާ ގުޅިގެން އޭނާ ފުލުސް އޮފީހަށް ގެންގޮސް ބަޔާން ވެސް ނަގާފައި ވެ އެވެ.

މުއާޒު ވިދާޅުވީ އޭނާއަކީ އެންމެ ކުރިއްސުރެ ފިލްމީ ދާއިރާ ކުރިއެރުވުމަށް މަސައްކަތް ކުރަމުން އައި މީހެއް ކަމަށާއި ކުރިމަގުގައި ވެސް މަސައްކަތް ކުރާނީ އެ ކަމަށް ކަމަށެވެ.

"އަޅުގަނޑަށް ވަޒީފާ އަށް ވުރެ ބޮޑަށް މުހިއްމީ އެންސީއޭގައި ހުރެގެން ފިލްމީ ދާއިރާ އަށް ކުރިމަތިވެފައި ހުރި ގޮންޖެހުންތައް ނައްތާލުން،" އޭނާ ވިދާޅުވި އެވެ.

މުއާޒަކީ ޕަބްލިކް ސާވިސް މީޑިއާ (ޕީއެސްއެމް) ގެ ޑެޕިއުޓީ މެނޭޖިން ޑައިރެކްޓަރު އައިމިނަތު ޝާޔަންގެ ފިރިމީހާ އެވެ.