މާފަށް އެދުނު ވައްޑެ ސްޓޭޓް މިނިސްޓަރަކަށް!

ކުރީގެ ރައީސް އަބްދުﷲ ޔާމީންގެ ޕީއެންއެފް ޕާޓީ ދޫކޮށް، ސަރުކާރު ހިންގާ ޕާޓީ ޕީއެންސީއާ ގުޅުނު މުހައްމަދު އަހުމަދު ވަހީދު (ވައްޑެ) ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރަކަށް އައްޔަނުކޮށްފި އެވެ.

ވައްޑެ އަށް މި ސަރުކާރުގެ އިސް މަގާމެއް ދެއްވިއިރު، އޭނާ ވަނީ ޕީއެންއެފްގެ ޖަލްސާތަކުގައި ރައީސް ޑރ. މުހައްމަދު މުއިއްޒަށާއި ފަސްޓް ލޭޑީ ސާޖިދާ މުހައްމަދަށް ވަރަށް ބޮޑަށް ފާޑު ވިދާޅުވެ، އެކި ފަހަރު މަތިން ވާހަކަ ދައްކަވައިފަ އެވެ.

ނަމަވެސް މިދިޔަ މަހުގެ އޭނާ ވަނީ ރައީސާއި ފަސްޓް ލޭޑީގެ ކިބައިން މާފަށް އެދުމަށް ފަހު، ޕީއެންސީ އަށް ސޮއި ވެސް ކުރައްވައިފަ އެވެ.

ވައްޑެ އެ ދުވަހު ވިދާޅުވެފައި ވަނީ ރައީސްގެ ދެކަނބަލުންނަށް ބޭއަދަބީ ބަހުން، ވަރަށް ހުތުރުކޮށް އެއްޗެހި ވިދާޅުވެވުނީ ސިޔާސީ ޖޯޝުގައި ކަމަށެވެ.

އަދި އޭރު އެގޮތަށް ވާހަކަ ދެއްކެވީ އޭރު ލިބިވަޑައިގެންނެވި މައުލޫމާތުތަކަކަށް ބިނާކޮށް ކަމަށާއި މިހާރު އެއީ ހަގީގަތާއި މުޅިން ހިލާފު މައުލޫމާތުތަކެއް ކަން ކަށަވަރު ވެފައިވާ ކަމަށް ވެސް އޭނާ ވިދާޅުވެފައި ވެ އެވެ.