މިއީ ބިރުވެރިކަމެއް، އެކަމަކު އާ ކަމެއް ނޫން: ޑރ. އިސްމާއިލް

ކޮވިޑް-19 ޖެހިފައިވާ މީހުންނަށް ފަރުވާ ދެއްވަން ގާތުގައި އުޅުއްވުމަކީ ބިރުވެރިކަމެއް ކަމަށާއި ނަމަވެސް އެއީ އެއްވެސް ޑޮކްޓަރަކަށް އާ ކަމެއް ނޫން ކަމަށް، ކޮވިޑް-19ގެ ބަލި މީހުންނަށް ފަރުވާ ދޭ ޓީމުގެ އިސް އެއް ޑޮކްޓަރު މުހައްމަދު އިސްމާއިލް ރޭ ވިދާޅުވެއްޖެ އެވެ.

އައިޖީއެމްއެޗުގައި މަސައްކަތްކުރައްވަމުން ގެންދަވާ ނޭވާލާ ނިޒާމްގެ ކޮންސަލްޓަންޓް ޑރ. އިސްމާއިލް ޓީވީއެމްގެ ޕްރޮގްރާމެއްގައި ވާހަކަދައްކަވަމުން ވިދާޅުވީ ޑޮކްޓަރުންނަކީ، ކޮންމެ ކަހަލަ ބަލިމީހަކަށް ފަރުވާދޭން ވެސް ކުރީ ސަފުގައި ތިބޭ ބަޔަކަށް ވާތީ އެންމެ ރިސްކް ބޮޑީ ވެސް އެ މީހުންނަށް ކަމަށެވެ. އޭގެ ތެރޭގައި ނަރުހުން ވެސް ހިމެނޭ ކަމަށް އޭނާ ވިދާޅުވި އެވެ.

ޑރ. އިސްމާއިލް ވިދާޅުވި ގޮތުގައި ކޮރޯނާވައިރަސް އިން ޖައްސާ ކޮވިޑް-19ގެ ބިރު ބޮޑުވަނީ އެއަށް ވެކްސިނަކާއި ފަރުވާއެއް ވެސް ހޯދިފައިނުވާތީ އެވެ. ނަމަވެސް ޑޮކްޓަރެއްގެ ހައިސިއްޔަތުން ބައްލަވާ ނަމަ މިފަދަ ބަލިތަކަކީ އާ ކަަމަކަށް ނުވާނެ ކަމަށް ވިދާޅުވި އެވެ.

މިސާލެއް ދައްކަވަމުން ޑރ. އިސްމާއިލް ވިދާޅުވީ ޓީބީ ބައްޔަކީ ވެސް އެހާ ނުރައްކާތެރި އެއްޗެއް ކަމަށާއި ނަމަވެސް ޑޮކްޓަރުން ގެންދަނީ އޭގެ ބަލިމީހުންނަށް ވެސް ފަރުވާދެމުން ކަމަށެވެ.

"ހަގީގަތަށް ދަންނަވާ ނަަމަ މިކަހަލަ ހާލަތްތަކުގައި ބިރެއް ނުގަނޭ. ސަބަބަކީ މިބަލި ނޫނަސް ބަލި މީހެއް ކައިރިއަށް ދާ ކަމަށްވަންޏާ އަބަދުވެސް މިއުޅެނީ ރިސްކެއްގެ ތެރޭގައި،" ޑރ. އިސްމާއިލް ވިދާޅުވި އެވެ.

"މިސާލަކަށް ޓީބީ، އެއީ ވެސް ހަމަ މީހުން ވަރަށް ބޮޑަށް ބިރުގަންނަ ކަމެއް. ހަމަ ގައިންގަޔަށް އަރާ ބައްޔެއް،" އޭނާ ވިދާޅުވި އެވެ.

ޑރ. އިސްމާއިލް ވިދާޅުވި ގޮތުގައި ކޮވިޑް-19 ގެ ބިރު ބޮޑުކަމުން ސަމާލުވާން ޖެހޭ ވަރަށް ގިނަ ކަންކަން ހުރެ އެވެ. ވަކި ކަހަލަ ހެދުމެއް ލުމާއި ފަރުވާ ދިނުމަށް ފަހު އާންމުންގެ ތެރެއަށް އަލުން ނުކުންނަ އިރު ތަބާއަވާން ޖެހޭ އިރުޝާދުތަކެއް ހުންނަ ކަމަށް ވެސް ވިދާޅުވި އެވެ.

ފަރުވާ ދޭ ޓީމު އަމަލްކުރަން ޖެހޭ ބައެއް ކަންކަން

- ކަނޑައަޅާފައި ހުންނަ ވަކި ހިސާބެއްގައި ތިބެ އަތް ދޮވުން

- އޭގެ ފަހުން ހާއްސަ ހެދުންތައް ލައި، މީހާ ފުރިހަމަޔަށް ނިވާކުރުން

- ފަރުވާ ދިނުމަށް ފަހު ނުކުމެ، ވަކި ހިސާބަކުން ފުރަތަމަ އަނެއްކާވެސް އަތް ދޮވުން

- އޭގެ ފަހުން ހާއްސަ ހެދުން ބޭލުން

- ދެން ރަނގަޅަށް ފެން ވަރައި، މުޅި ހަށިގަނޑު ދޮވެ ސާފުކުރުން

އޭނާ ވިދާޅުވި ގޮތުގައި ފަރުވާ ދިނުމަށް ފަހު ނުކުންނާނީ ޔަގީނުން ވެސް ވައިރަހާ އެކު ކަމަށް ވުމުން، ސަލާމަތީ ގޮތުން އަޅަން ޖެހޭ ފިޔަވަޅުތައް ވެސް ވަރުގަދަ އެވެ.

"އެންމެ ރަނގަޅަށް ރައްކާތެރިކަމުގެ ފިޔަވަޅު އަޅައިގެން ތިއްބަސް އެއީ 100 ޕަސަންޓް ޔަގީނެއް (ނޫން، ވައިރަސް ނުހުންނާނެ ކަމުގެ). އެހެންނަމަވެސް ﷲއަށް ވަކީލް ކޮށްފައި އަޅުގަނޑުމެން ކުރަން ޖެހޭނެ ކަމެއް މިއީ،" ޑރ. އިސްމާއިލް ވިދާޅުވި އެވެ.

މި ނުރައްކާތެރި ހާލަތުގައި ސިއްހީ ތަޖުރިބާކަރުންގެ ފަރާތުން ލިބެމުން އަންނަ އެއްބާރުލުމަށް އޭނާ ޝުކުރު އަދާކުރެއްވި އެވެ. އެގޮތުން ކޮންމެ ގަޑިއެއްގެ ކޮންމެ ޑިއުޓީއަކަށް ލިޔަސް، އެއްވެސް ޝަކުވާއެއް ނެތި، އެ އެންމެން ވެސް މަސައްކަތްކުރައްވަމުން ގެންދަވާ ކަމަށް ވިދާޅުވި އެވެ.

މި ދަނޑިވަޅުގައި ޑރ. އިސްމާއިލް އެތައް ބައެއްގެ މަސައްކަތް ފާހަގަކުރެއްވި އެވެ. އޭގެ ތެރޭގައި ގިނަ ބަޔަކު ހިލޭސާބަހަށް ނުކުމެ އުޅުމަކީ ވެސް އޭނާގެ ނަޒަރުގައި ވަރަށް ބޮޑު ޚިދުމަތެކެވެ. އެހެންކަމުން އެ އެންމެންނަށް ވެސް ޝުކުރު އަދާކުރެއްވި އެވެ.