އިގްތިސާދީ ހެޔޮ ބަދަލުތަކުގެ ސަބަބުން މުސާރަތައް ބޮޑުވާނެ: ސައީދު

ރައީސް އަބްދުﷲ ޔާމީންގެ ސަރުކާރުން އިގްތިސާދު ހަރުދަނާ ކުރަން އަޅާ ފިޔަވަޅުތަކުގެ ނަތީޖާއެއްގެ ގޮތުން ސަރުކާރު މުވައްޒަފުންގެ މުސާރަ ބޮޑުވާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.

ކާޑުގެ ބާވަތްތަކުން އާންމު ސަބްސިޑީ ކަނޑާލި މައްސަލައާ ގުޅޭ ގޮތުން، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީގައި ވާހަކަ ދައްކަވަމުން ސައީދު ވިދާޅުވީ އިގްތިސާދު ހަރުދަނާ ކުރަން ރައީސް ޔާމީންގެ ސަރުކާރުން އެޅި ފިޔަވަޅު އިޖާބީ ގޮތެއްގައި ބަލައިގަންނަން ޖެހޭނެ ކަމަށެވެ.

"މިކަންތައްތަކުގެ ނަތީޖާއަކަށްވާނީ ޒުވާނުންނަށް ވަޒީފާގެ ފުރުސަތު އިތުރުވުން، މުސާރައިގެ ގޮތުގައި ލިބޭ މިންވަރު އިތުރުވުން،" މެމްބަރަކު ކުރެއްވި ސުވާލެއްގެ ޖަވާބުގައި ސައީދު ވިދާޅުވި އެވެ.

"މިކަންތައްތައް ވުމަށް މާ ގިނަ ދުވަހެއް ނެތް،"

މިނިސްޓަރު ވިދާޅުވި ގޮތުގައި ކާޑުގެ ސަބްސިޑީގެ ގޮތުގައި މީގެ ކުދިން ދެމުން އައި އެހީގެ ޖުމްލަ 41 ޕަސެންޓު ބޭނުންކުރަނީ ބިދޭސީންނާއި ފަތުރުވެރިންނެވެ. ސައީދު ވިދާޅުވި ގޮތުގައި އެއީ އަހަރެއްގެ މައްޗަށް ގާތްގަނޑަކަށް 126 މިލިއަނެއްހާ ރުފިޔާ އެވެ. އެތައް މިލިއަން ރުފިޔާއެއް ބިދޭސީންނަށް ސަބްސިޑީ ގޮތުގައި ނުދީ ތަރައްގީގެ މަޝްރޫއުތަކަށް އެ ފައިސާ ހަރަދު ކުރުމަކީ ކުރެވިދާނެ ކަމެއް ކަމަށް އޭނާ ވިދާޅުވި އެވެ.

ބިދޭސީންނާއި ފަތުރުވެރިންނަކީ ސަބްސިޑީ ހައްގު މީހުން ނޫން ކަމަށާއި ސަރުކާރުން މަސައްކަތް ކުރަނީ ސަބްސިޑީ އޭގެ އެންމެ ހައްގުވެރިންނަށް ފޯރު ކޮށްދިނުމަށް ކަމަށް ތަކުރާރުކޮށް އޭނާ ވިދާޅުވި އެވެ. އަދި މިހާރު ސަބްސިޑީ ކަނޑާ ނުލައިފި ނަމަ، ކުރިމަގުގައި ރާއްޖެ އަންނަ ފަތުރުވެރިންގެ އަދަދު އިތުރުވުމުން ސަބްސިޑީގެ ގޮތުގައި އެ މީހުންނަށް ދާ ހަރަދު ދެ ގުނަ ބޮޑުވެގެން ދާނެ ކަމަށް ވެސް އޭނާ ވިދާޅުވި އެވެ.

"މި އަދަދު ޑަބަލްވުމުގެ ކުރިން ބުރަ އާއި ތަކުލީފުތައް ނުއުފުލައިފި ނަމަ، އަންނަން އޮތް ޖީލުތަކުގެ ޒުވާނުން އުފުލަން ޖެހޭ ތަކުލީފުތައް އިތުރަށް ޑަބަލްވާނެ،" ސައީދު ވިދާޅުވި އެވެ.

މިނިސްޓަރު ވިދާޅުވީ ސަރުކާރުން މަސައްކަތް ކުރަނީ އިގްތިސާދީ ގޮތުން ކުރިމަތިވެފައި އޮތް ހުރިހާ ގޮންޖެހުންތަކެއް ކަޑައްތުކޮށް އަރަނި ބަޖެޓަކަށް ހެދުމަށެވެ. އަދި ރާއްޖެ އަށް އެކި ފަރާތްތަކުން ދޭ ލޯނުތައް 15-20 އަހަރުން ދައްކަން ޖެހުމަކީ އެކަމުގެ ހެއްކެއް ގޮތުގައި އޭނާ ފާހަގަކުރެއްވި އެވެ.

މިނިސްޓަރު ވިދާޅުވި ގޮތުގައި 2013ގައި މި ސަރުކާރު ވެރިކަމާ ހަވާލުވުމުގެ ފުރުސަތު ލިބުމަކީ ގައުމަށް ލިބުނު ނަސީބެކެވެ. އެހެން ނޫން ނަމަ، ގައުމު އޮންނާނީ ބަނގުރޫޓުވެފައި ކަމަށް ސައީދު ވިދާޅުވި އެވެ.

ގްރީސް، އިޓަލީ، ޕޯޗުގަލް އަދި ސްޕެއިން ފަދަ ގައުމުތައް 2007 އިން ފެށިގެން ބަނގުރޫޓުވެގެން ދިޔައީ ސަބްސިޑީ އަށް އިންތިހާ އަށް ބަރޯސާވުމުންކަން މާލީ ބޮޑެތި އިދާރާތަކުން ބުނެފައިވާ ކަމަށް މިނިސްޓަރު ވިދާޅުވި އެވެ. އަދި ކުދިކުދި ޖަޒީރާ ގައުމުތަކުން ޓާގެޓަޑް ސަބްސިޑީއަކަށް ދިއުމުގެ މުހިންމުކަން އެ އިދާރާތަކުން އަބަދުވެސް ފާހަގަކުރާ ކަމަށް މިނިސްޓަރު ވިދާޅުވި އެވެ.

ހަމައެކަނި ފަގީރުންނަށް ސަބްސިޑީ ލިބޭ ގޮތަށް އޮތުމުން މާލޭގައި ކުރިން 3.98ރ. އަށް ލިބުނު ހަނޑޫ ކިލޯއެއް މިހާރު ގަންނަން ލިބޭނީ 7.96ރ. އަށެވެ. ކުރިން ހަތަރު ރުފިޔާ އަށް ވިއްކި ހަކުރު ކިލޯގެ އަގު ދެ ގުނަވެ އަށް ރުފިޔާ އަށް ވަނީ ބޮޑުވެފަ އެވެ. ފުށް ކިލޯއެއްގެ އަގު ވަނީ 2.96ރ. އިން 5.96ރ. އަށް ބޮޑުވެފަ އެވެ. މި އަގުތަކަށް ވުރެ ރާއްޖޭގެ އެހެން ސަރަހައްދުތަކުގައި ކާޑުގެ ބާވަތްތަކުގެ އަގުތައް ބޮޑެވެ.

ކާޑުގެ ސަބްސިޑީ ގަވާއިދުގައިވާ ގޮތުން ޝަރުތު ހަމަވާ ކޮންމެ މީހަކަށް މަހަކު 40ރ. ގެ މަގުން މުޅި އަހަރަށް ކަނޑައަޅާފައި ވަނީ 280ރ. އެވެ. ގޭބީސީއަކަށް މަހެއްގެ މައްޗަށް ގިނަވެގެން ލިބޭނީ 240ރ. ނުވަތަ އަހަރަކަށް 2،880ރ. އެވެ. ސަބްސިޑީ ދޭނީ ގަވާއިދުގައިވާ ގޮތުގައި، އެ މީހެއްގެ ބޭންކް އެކައުންޓަށް ޖަމާކޮށްގެން ކަމަށް ގަވާއިދުގައި ކަނޑައަޅާފައިވެ އެވެ.

އެންސްޕާގެ ސީއީއޯ މުޖުތަބާ ޖަލީލް މިއަދު ވިދާޅުވީ އާންމު ސަބްސިޑީ ކަނޑާލުމުގެ ކުރިން ފޯމު ހުށަހެޅި 95 ޕަސަންޓު މީހުންނަށް ސަބްސިޑީ ލިބޭ ގޮތަށް ނިންމާފައިވާ ކަމަށެވެ. އަދި އާންމު ސަބްސިޑީ ކަނޑާލި ފަހުން ހުށަހެޅި ފޯމުތައް ބަލަމުން އަންނަ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ބޯހިމެނުމުގެ ނަތީޖާ ދައްކާ ގޮތުން ރާއްޖޭގައި 68،000 އަށްވުރެ ގިނަ ގޭބިސީ ހުންނައިރު އެވްރެޖްކޮށް ކޮންމެ ގޭބިސީއެއްގައި ދިރިއުޅެނީ ހަ މީހުންނެވެ. ނަމަވެސް އާ ސާވޭތަކަށް ބަލާފައި އަންނަ އަހަރުގެ ކުރީކޮޅު ގަވާއިދަށް ބަދަލު ގެންނާނެ ކަމަށް ވެސް އޭނާ ވިދާޅުވި އެވެ.