އިފުރު އެއާޕޯޓާ އެކު ރިސޯޓު ވިއްކާލަނީ

ރ. އިފުރު އެއާޕޯޓާ އެކު އެރަށުގައި ތަރައްގީކޮށްފައިވާ ރިސޯޓު ވިއްކާލަން، އެ ރިސޯޓް ހިންގާ ދަ ސްމޯލް މޯލްޑިވްސް އައިލެންޑް ކޯ (ޓީއެސްއެމްއައި) އިން އިއުލާނުކޮށްފި އެވެ.

ގާތްގަނޑަކަށް 56 ހެކްޓަރުގެ، ފަސް ތަރީގެ މި ރިސޯޓުގައި 150 ވިލާ ހިމެނެ އެވެ. މިއީ 300 އެނދުގެ ރިސޯޓެކެވެ.

ސަރުކާރުން 50 އަހަރަށް ދޫކޮށްފައިވާ މި ރިސޯޓުގައި ރާއްޖޭގެ އެހެން ރިސޯޓުތަކެކޭ އެއްފަދައިން ގިނަ ހިދުމަތްތަކެއް ވަނީ ގާއިމްކޮށްފަ އެވެ. މި ރިސޯޓުގައި 215 މީހުންގެ ޖާގައިގެ ރެސްޓޯރެންޓެއް ހިންގާ އިރު ޕޫލް އޭރިއާ ރެސްޓޯރެންޓަކީ އެއްފަހަރާ 124 މީހުންނަށް ހިދުމަތް ދެވެ އެވެ.

ރިސޯޓުގައި ހިތްހަމަ ޖައްސާލުމަށް ގިނަ ހަރަކާތްތަކެއް ރޭވިފައިވެ އެވެ. އެގޮތުން ޓެނިސް ކޯޓަކާއި ބެޑްމިންޓަން ކޯޓެއްގެ އިތުރުން ރީކްރިއޭޝަން ސެންޓަރެއް ވެސް ހުރެ އެވެ. އަދި ޖިމަކާއި ކިޑްސް ކްލަބެއްގެ އިތުރުން ޑައިވް ސެންޓަރަކާއި ވޯޓާ ސްޕޯޓްސްގެ ގިނަ ހަރަކާތްތަކެއް ވެސް ހިންގޭނެ އިންތިޒާމުތައް ވަނީ ހަމަޖައްސާފަ އެވެ.

މީގެ އިތުރުން ސްޓާފުންނަށް ހާއްސަ އެކޮމޮޑޭޝަނަށް އަށް އިމާރާތް ހަދާފައިވެ އެވެ. މި އިމާރާތުގައި 128 ރޫމް ހުންނަ އިރު 400 މީހުންނަށް ބޭނުން ކުރެވޭނެ އެވެ.

އިފުރު ތަރަައްގީކުރުމުގެ މަސައްކަތް އިފުރު އިންވެސްޓްމަންޓާ ހަވާލުކުރީ ރިސޯޓް ތަރައްގީ ކުރުމަށް ތިން ރަށް ދޭ ގޮތަށް މެއި، 2011ގަ އެވެ. އެރަށުގައި އެއާޕޯޓު ހުޅުވާފައިވަނީ 2015 ވަނަ އަހަރު އެވެ. ކޯސްޓްލައިން ކުންފުނިން ތަރައްގީކުރި މި އެއާޕޯޓު މެނޭޖްކުރަމުން އައީ އައިލެންޑް އޭވިއޭޝަނުންނެވެ.