މީދުއްޕަރު ރިސޯޓުން ގިނަ ބަޔަކު ކާނާ ވިހަވެ ފަރުވާ ދެނީ

ރ. މީދުއްޕަރު ރިސޯޓުގައި މަސައްކަތް ކުރާ ގިނަ އަދަދެއްގެ ބަޔަކު ކާނާ ވިހަވެ، އޭގެތެރެއިން 11 ދިވެއްސަކު އެ އަތޮޅު މީދޫ ހެލްތު ސެންޓަރުގައި އެޑްމިޓްކޮށްގެން ފަރުވާދޭން ފަށައިފި އެވެ.

މީދޫ ހެލްތު ސެންޓަރުގެ އޮފިޝަލަކު މިރޭ ވިދާޅުވީ މީދުއްޕަރު ރިސޯޓުގައި ކާނާ ވިހަވެގެން މިހާތަނަށް 24 ދިވެއްސަކަށް ފަރުވާ ދިނުމަށް އެ ސެންޓަރަށް ގެނެސްފައިވާ ކަމަށެވެ. އެމީހުންގެ ތެރެއިން އެޑްމިޓްކޮށްގެން ފަރުވާދެމުން އަންނަ މީހުންގެ ހާލު މިހާރު ރަނގަޅު ކަމަށް އޭނާ ވިދާޅުވި އެވެ.

"މިއަދު ހެނދުނު އެމީހުން މިކޮޅަށް ގެންނަން ފެށީ. ސީރިއަސް ހާލަތުގައި މީހަކު ނެތް. އެކަކު ވަނީ ރ. އުނގޫފާރު ހޮސްޕިޓަލަށް ބަދަލުކޮށްފައި. އޭނާ ހޮސްޕިޓަލަށް ބަދަލުކުރީ އެހެން ކަމެއް ފާހަގަވެގެން. އެމީހާގެ ހާލު ވެސް ގޯހެއް ނޫން،" ހެލްތު ސެންޓަރުގެ އޮފިޝަލަކު ވިދާޅުވި އެވެ.

މިއަދު ރޯދަ ވިއްލި ފަހުން މީދުއްޕަރު ރިސޯޓުން ކާނާ ވިހަވެގެން ބިދޭސީންތަކެއް ވެސް ފަރުވާ ދިނުމަށް ހެލްތު ސެންޓަރަށް ގެނެސްފައިވާ ކަމަށް އޮފިޝަލް ވިދާޅުވި އެވެ.

މީދުއްޕަރު ރިސޯޓުން ވާހަކަ ދެއްކި މީހަކު "މިހާރު" އަށް ބުނީ ގިނަ މީހުން ކާނާ ވިހަވީ އިއްޔެ ރޯދަ ވީއްލި ގަޑީގައި ކެވުނު އެއްޗަކުން ކަމަށެވެ. އޭގެ ފަހުން، މިއަދު ރޯދަ ވީއްލި ގަޑީގައި ވެސް އިތުރު ބަޔަކު ކާނާ ވިހަވެގެން އުޅުނު ކަމަށް ވެސް ރިސޯޓުން ވާހަކަ ދެއްކި މީހާ ބުންޏެވެ.

"ގާތްގަނޑަކަށް މިތަނުގެ ސްޓާފުންގެ 80 އެއްހާ މީހުން ކާނާ ވިހަވި. ފާހަނާ އަށް ގޮސް ހޮޑުލައި ބޯ އެނބުރުމާއި ބޮލުގައި ރިއްސުމާއި ހުން ގަދަ މީހުން އެބަތިބި،" އެމީހާ ބުންޏެވެ.

"ބެލެވޭ ގޮތުގައި ރޯދަ ވީއްލަން ތައްޔާރު ކުރި ބަރަބޯ މަސްހުނީގައި ސަކަރާތްވެފައި ހުރި މަސް ބޭނުން ކުރީމަ މިކަމެއް ދިމާވެގެން މިއުޅެނީ،" އެމީހާ ބުންޏެވެ.

ގިނަ އަދަދެއްގެ މުވައްޒަފުން ކާނާ ވިހަވި ވިޔަސް ރިސޯޓުގެ ހިދުމަތްތަކަށް ބުރުލެއް ނާރައި ކުރިއަށްދާ ކަމަށް އޭނާ ބުންޏެވެ.