ހެމާ އެމްވީ: ލޮކްޑައުންގައި ޖިމް ފޯނަށް

ކޮވިޑް-19އާ ގުޅިގެން އެންމެ ފުރަތަމަ އެޅި ފިޔަވަޅުތައް ތެރެއިން ޖިމްތަކާ ކަސްރަތު ކްލާސްތައް ބަންދުކުރުން ހިމެނެ އެވެ. އެންމެ ފަހުން ފުރަބަންދަކަށް ގޮސް އެންމެން ގޭގައި ތިބެން މަޖުބޫރުވެފައިވާއިރު މިހާރު ކުރެވޭ ހަމައެކަނި ކަމަކީ ކައިކައިގެން ބަނޑުދަމައިފަ އޮތުމެވެ. ލޮކްޑައުންއަށް މަހެއް ވެފައިވާއިރު އެއް މަސްތެރޭގައި ވެސް ފަސް ހައެއްކަ ކިލޯ ބަރުވި މީހުން މަދު ނޫންކަން ސޯޝަލް މީޑިއާއަށް ބަލާލިޔަސް އެނގެ އެވެ. އޮފީހަށް ދާން ޖެހޭއިރު ލާ ގަމީހުގެ ގޮށް ނޭޅުވޭނެއޭ ބުނާ ޒުވާނުން ވެސް މަދެއް ނޫނެވެ.

މިފަދަ ހާލަތެއްގައި ތިބި އިރު ޖިސްމާނީ ދުޅަހެޔޮކަމުގެ އިތުރަށް ނަފްސާނީ ދުޅަހެޔޮ ކަމަށް ވެސް ކަސްރަތައް އެންމެން ވެސް ތިބީ އެދި އެދި އެވެ. މި އެދުމަށް އެހީއެއްގެ ގޮތުން މާލޭގައި މަޝްހޫރު ޖިމް އިންމިވަނީ ހަދިޔާއެއް ދޫކޮށްލައިފަ އެވެ.

"މި ދަނޑިވަޅުގަ އެންމެނަށްވާ އެހީއެއްގެ ގޮތުގަ، ހެމާ އެމްވީ އެޕް މި ދޫކޮށްލަނީ، އުންމީދަކީ މިއީ އެންމެނަށް ވެސް ބޭނުންތެރި އެއްޗަަކަށް ވުން،" ހެމާ ޖިމްގެ ވެރިޔާ އަހުމަދު މުއާޒު "މިހާރު" އަށް ވިދާޅުވި އެވެ.

އެމެރިކާގެ ކުންފުންޏަކާއި ރާއްޖޭގެ ހުނަރުވެރި ދެ ޒުވާނުން ކަމަށްވާ އަހުމަދު ވިދާދް، އަދި އަހުމަދު އާއިޝް ގުޅިގެން އުފައްދާފައިވާ މި އެޕުން ގާތްގަނޑަކަށް ޖިމެއްގައި ލިބޭ ހުރިހާ ޚިދުމަތެއް ލިބެން ހުރެ އެވެ.

ގޫގްލް ޕްލޭ އާއި އެޕް ސްޓޯއިން ވެސް ލިބެން ހުންނަ މި އެޕަކީ އެއްވެސް ފައިސާއެއް ދެއްކުމެއް ނެތި ފަސޭހައި ބޭނުންކޮށްލެވޭ އެޕެކެވެ. ވީ އެންމެ ޔޫސާ ފްރެންޑްލީކޮށް ތައްޔާރުކޮށްފައިވާ މި އެޕް މެދުވެރިކޮށް ބަރުދަން ލުއި ކުރަން ބޭނުން ނަމަ އަދި ބަރުވާން ބޭނުން ނަމަވެސް ކަންކުރަންވާ ގޮތުގެ ތަފްސީލް އެހީ ލިބިގެންދާނެ އެވެ

މި އެޕުގައި މިލިއަނަކަށް ވުރެ ގިނަ ނިއުޓްރިޝަންތަކާއި، ގޭގައި ވެސް ފަސޭހަކާމާ އެކު ކޮށްލެވޭނެ އެކި ކަސްރަތުތައް ހިމަނާފައިވާނެ އެވެ.

އެޕް ބޭނުންކުރާނެ ގޮތް:

- ލޮގިން ވުމަށް ފަހު ސެޓިންގްސް އިން އެ މީހެއްގެ ޑެއިލީ ކެލޮރީ އިންޓޭކް އެންޓާކޮށްލާނީ.

- އެޕްގަ އިންނަ 'ނިއުޓްރިޝަން' އޮޕްޝަންއިން ކޮންމެ ދުވަހަކު ވެސް ކާތަކެތި އެންޓާ ކޮށްލާނީ. އޭރުން ކާން ޖެހޭ މިންވަރަށް ވުރެ ގިނައިން ކެވިއްޖެ ނަމަ އެޕް މެދުވެރިކޮށް އެނގެން ހުންނާނެ.

- 'ވޯކްއައުޓް' އޮޕްޝަން މެދުވެރިކޮށް އެކި ކަސްރަތުތައް އިހްތިޔާރުކޮށް ވީކްލީ ޕްލޭންއެއް ތައްޔާރުކޮށްލާނީ.

މި ސްޓެޕްތައް ފުރިހަމަކޮށްލުމުން، ކޮންމެ ދުވަހަކު ވެސް ކެވެނީ ކިހާ މިންވަރަކަށް ކަން އެނގިގެން ދެއެވެ. އަދި ކާން ޖެހެނީ ކިހާ މިންވަރަކަށްކަން ރެކޯޑުވެފައިވާއިރު ދެން ކަސްރަތުކުރަންވީ ކިހާ ވަރަކަށްކަން ވެސް އެނގިގެން ދެ އެވެ. އެހެންވީމާ މި އެޕަކީ ޖިމަށް ނުގޮސް ލިބޭ ޕާސަނަލް ޓްރެއިނާއެކޭ ވެސް ބުނެވިދާނެ އެވެ.

ހެމާ ޖިމްގެ، ވެރިޔާ އަހުމަދު މުއާޒު "މިހާރު" އަށް ވިދާޅުވީ މި އެޕްގެ މައިގަނޑު މަގްސަދަކީ، ލޮކްޑައުން ހާލަތުގައި ތިބި އިރު އެންމެނަށް ވެސް ކަސްރަތު ކުރެވޭނެ ގޮތެއް ހޯދައިދިނުން ކަމަށެވެ. އަދި ޒަމާނަށް އަންނަމުންދާ ބަދަލުތަކާ އެކު ހުރިހާ ކަމެއް ވެސް ޓެކްނޮލޮޖީއާ ގުޅިފައިވާތީ މުސްތަގުބަލުގައި މިފަދަ އެޕްތަކަކީ ކަސްރަތު ކުރުމަށް އެންމެ ބޮޑު އެހީއަކަށް ވެގެންދާނެ ކަމަށް ގަބޫލު ކުރާ ކަމަށް ވެސް ވިދާޅުވި އެވެ.

"ކުރިއަށް އޮތް ތަނުގަ ޒުވާނުން މިކަމުން އިންސްޕަޔާ ވެގެން މިކަލަ އެޕްތައް ހަދާނެ ކަމަށް އުންމީދު ކުރަން،" މުއާޒް ވިދާޅުވި އެވެ.

މި އެޕް ބޭނުންކުރާނެ ގޮތާއި ކަސްރަތު ކުރުުމުގެ އިތުރު މައުލޫމާތުތައް ބޭނުންނަމަ އެޕްގެ އިތުރަށް ވެސް ހެމާގެ އޮފިޝަލް އިންސްޓަގްރާމް ޕޭޖާއި ފޭސްބުކް ޕޭޖަށް މެސެޖު ކުރުމުން ޖިމް އިންސްޓަރަކްޓަރުންގެ އެހީތެރިކަން މިކަމަށް ލިބިގެންދާނެ ކަމަށް ވެސް އޭނާ ވިދާޅުވި އެވެ.