އަމިއްލަ ކުންފުންޏެއްގެ އުޅަނދެއްގައި ނާސާގެ އޮސްޓްރޮނޯޓުން ފުރަތަމަ ފަހަރަށް ޖައްވަށް

ފްލޮރިޑާ (މެއި 31) - އަމިއްލަ ކުންފުޏެއް ކަމަށްވާ ސްޕޭސްއެކްސްގެ ޖައްވީ އުޅަނދެއްގައި ނާސާގެ ދެ އޮސްޓްރޮނޯޓުން ފުރަތަމަ ފަހަރަށް ޖައްވަށް އިއްޔެ ދަތުރު ފަށައިފި އެވެ.

މިއީ އަމިއްލަ ކުންފުންޏެއްގެ އުޅަނދެއްގައި އިންސާނުން ޖައްވަށް އުފުލި ފުރަތަމަ ފަހަރެވެ. މި ތާރީޚީ ކާމިޔާބު ހާސިލްކޮށްފައިވާ ބިލިއަނަރު އީލޮން މާސްކުގެ ސްޕޭސްއެކްސްގެ ފެލްކަން-9 ގެ ރޮކެޓާ އެކު އުދުއްސާލި ޑްރެގަން ޖައްވީ އުޅަނދުގައި ނާސާގެ ދެ އޮސްޓްރޮނޯޓުން ކަމަށްވާ ގަޑް ހާލީ އާއި ބޮބް ބެންކެން ދަތުރު ކުރާނީ އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށެވެ.

މިއީ މީގެ ނުވަ އަހަރު ކުރިން ނާސާގެ ޝަޓްލް ޕްރޮގްރާމް ހުއްޓާލި ފަހުން އެމެރިކާގެ އުޅަނދެއްގައި އޮސްޓްރޮނޯޓުން ޖައްވަށް ދަތުރުކުރި ފުރަތަމަ ފަހަރެވެ. ދެހާސް އެގާރަ ވަނަ އަހަރުގެ ފަހުން އޮސްޓްރޮނޯޓުން ޖައްވަށް ފޮނުވަން ނާސާ އިން ބޭނުންކޮށްފައި ވަނީ ރަޝިޔާގެ ސޮޔޫޒް ރޮކެޓެވެ. އެހެންކަމުން މި ދަތުރާ އެކު ވަނީ ސްޕޭސްފްލައިޓްތަކުގައި ކޮމާޝަލް ކުންފުނިތަކަށް އާ ދޮރެއް ހުޅުވިފަ އެވެ.

އީލޮން މާސްކް ވިދާޅުވެފައި ވަނީ އޭނާގެ އުޅަނދެއް ޖައްވަށް އުދުހިގެންދާ މަންޒަރު ބަލަން ހުރުމަކީ ޖަޒުބާތުން ފުރިފައިވާ ވަގުތެއް ކަމަށެވެ.

ޖައްވީ އުޅަނދު އުދުއްސާލާ މަންޒަރު ބެއްލެވުމަށް ރައީސް ޑޮނަލްޑް ޓްރަމްޕް ވެސް ވަނީ ފްލޮރިޑާ އަށް ވަޑައިގެންފަ އެވެ. ނައިބް ރައީސް މައިކް ޕެންސްއާ އެކު ހުންނަވައި ޓްރަމްޕް ވިދާޅުވީ އެމެރިކާގެ ކުރީގެ ލީޑަރުން އެ ގައުމުގެ އެސްޓްރޮނޯޓުން ޖައްވަށް ފޮނުވާފައި ވަނީ ބޭރު ގައުމުތަކުގެ އެހީގައި ކަމަށެވެ. ނަމަވެސް މިއަދު ފަޚުރުވެރިކަމާ އެކު އެމެރިކާގެ އޮސްޓްރޮނޯޓުން ޖައްވަށް ދަތުރު ފަށާފައި ވަނީ އެމެރިކާގެ ރޮކެޓެއްގައި އެމެރިކާގެ ބިމުން ކަމަށް ވިދާޅުވި އެވެ.

ކުރީގެ މިލިޓަރީ ޓެސްޓް ޕައިލެޓުން ކަމަށްވާ ހާލީ، 53، އާއި ބެންކަން، 49، މިއަދުގެ ވަގުތެއްގައި އައިއެސްއެސް އަށް ފޯރާނެ ކަމަށް ބެލެވެ އެވެ. ދެހާސް ވަނަ އަހަރު ނާސާއާ ގުޅިފައިވާ ދެ އޮސްޓްރޮނޯޓުން ޖައްވީ ސްޓޭޝަނުގައި ތިބޭނީ ކިހާ ދުވަހަކު ކަމެއް ނޭނގެ އެވެ.

ޑްރެގަން ކެޕްސޫލް އަކީ މުޅިން އޮޓޮމެޓިކް ވެހިކަލެކެވެ. ޑްރެގަންގައި ކޮންޓްރޯލް ސްޓިކެއް ނުހުރެ އެވެ. ފްލައިޓް ކޮމާންޑްތައް އެންޓަ ކުރަނީ ޓަޗްސްކްރީން ޕެނަލަކުންނެވެ.

މީގެ 18 އަހަރު ކުރިން އުފެއްދި ސްޕޭސްއެކްސް ކުންފުނިން ވަނީ އޮސްޓްރޮނޯޓުން ޖައްވަށް ފޮނުވަން ނާސާ އެކު 2.6 ބިލިއަން ޑޮލަރުގެ އެއްބަސްވުމެއް ގާއިމްކޮށްފަ އެވެ. އެ އެއްބަސްވުމުގެ ދަށުން ޖައްވަށް ހަ ދަތުރު ކުރާނެ އެވެ.