ފިންގަޕްރިންޓް ނެތް މީހުން ވަކިކުރުމުން އެމްޑީޕީގެ ދެބައިކުޅަ އެއްބައި މީހުން ޕާޓީން އުނިކޮށްފި

ސިޔާސީ ޕާޓީތަކުގައި ރަޖިސްޓްރީ ވުމަށް ފިންގަޕްރިންޓް ހުށަ ނާޅާ މެމްބަރުން ޕާޓީން ވަކިކުރުމަށް އިލެކްޝަންސް ކޮމިޝަނުން ނިންމި ނިންމުން ތަންފީޒު ކުރުމާ އެކު، އެމްޑީޕީގެ ދެބައިކުޅަ އެއްބައި މީހުން އެ ޕާޓީން މަދުވެއްޖެ އެވެ.

ސިޔާސީ ޕާޓީތަކުގެ ގާނޫނު އައުމުގެ ކުރިން ޕާޓީތަކުގައި ރަޖިސްޓްރީ ވެފައިވާ މެމްބަރުންގެ ތެރެއިން މި މަހުގެ 12 ގެ ކުރިން ފިންގަޕްރިންޓް ހުށަހަޅާފައި ނެތް މީހުން އިލެކްޝަންސް ކޮމިޝަނުން ވަކިކޮށް އާ ޕާޓީތަކުގެ އާ ދަފުތަރު މިއަދު ވަނީ އާއްމުކޮށްފަ އެވެ.

އޭގައިވާ ގޮތުން، ޖުމްލަކޮށް ބަލާއިރު ހުރިހާ ޕާޓީއަކުން މީހުން މަދުވެފައިވީ ނަމަވެސް އެންމެ ބޮޑު އަސަރެއް ކޮށްފައި ވަނީ އިދިކޮޅު ޕާޓީ އެމްޑީޕީ އަށެވެ. އެ ގޮތުން، ކުރިން އެންމެ ބޮޑު ޕާޓީގެ ގޮތުގައި އޮތް އެމްޑީޕީގައި މިދިޔަ އަހަރުގެ ފެބްރުއަރީގެ ނިޔަލަށް 46،608 މީހުން ރަޖިސްޓްރީވެފައިވީ ނަމަވެސް ފިންގަޕްރިންޓް ނެތުމުގެ ސަބަބުން އެ ޕާޓީން 18،803 މީހުން ވަނީ ވަކިކޮށްފަ އެވެ. މިހާރު އާއްމުކޮށްފައިވާ ދަފުތަރުގައިވާ ގޮތުން މިހާރު އެމްޑީޕީގައި ތިބީ 27،805 މެމްބަރުންނެވެ.

ދެން އެންމެ ގިނަ އަދަދެއްގެ ބަޔަކު މަދުވީ ކުރީގެ ރައީސް މައުމޫން އަބްދުލްގައްޔޫމް އުފެއްދެވި ޑީއާރުޕީންނެވެ. ކުރިން އެ ޕާޓީގައި 14،750 މެމްބަރުން ތިބި ނަމަވެސް، ފިންގަޕްރިންޓް ހުށަހަޅާފައި ނެތުމުން އެ ޕާޓީގައި މިހާރު ބާކީ ތިބީ 3،966 މެމްބަރުންނެވެ.

އަދާލަތު ޕާޓީގެ މެމްބަރުންގެ އަދަދު 9،009 އިން 7،595 އަށް މަދުވިއިރު، ޖުމްހޫރީ ޕާޓީން ވަނީ 3،000 މީހުން މަދުވެފަ އެވެ. އެހެންވެ، ޖޭޕީގައި މިހާރު ތިބީ 10،989 މެމްބަރުންނެވެ.

އާ ދަފުތަރުގައިވާ ގޮތުން ޕީޕީއެމްގެ މެމްބަރުންގެ އަދަދު ވަނީ 1،401 އަށް އިތުރުވެފަ އެވެ. ކުރިން އެ ޕާޓީގައި ތިބީ 36،232 މެމްބަރުން ކަމަށްވީ ނަމަވެސް، ފިންގަޕްރިންޓް ހިމެނޭ އިތުރު ފޯމު ހުށަހަޅައިގެން އެ ޕާޓީން ވަނީ މެމްބަރުންގެ އަދަދު 37،633 އަށް އިތުރުކޮށްފަ އެވެ. އަދި ސަރުކާރު ކޯލިޝަންގައި ހިމެނޭ އެމްޑީއޭގައި ކުރިން 10،639 މެމްބަރުން ތިބި ނަމަވެސް އެ ޕާޓީން ވަނީ 55 މެމްބަރުން މަދުވެފަ އެވެ.

ޕާޓީތަކުގެ ގާނޫނަށް 2013 ގައި އަމަލުކުރަން ފެށިއިރު، އެ ގާނޫނު އައުމުގެ ކުރިން ސޮއިކުރި މެމްބަރުންގެ ފިންގަޕްރިންޓް ހުށަހަޅަން ޖެހޭނެ ކަމަކަށް ބުނެފައެއް ނެތެވެ. އެކަމަކު އިލެކްޝަންސް ކޮމިޝަނުން މިދިޔަ އަހަރު ނިންމީ ގާނޫނު އައުމުގެ ކުރިން ސޮއިކުރި މެމްބަރުން ވެސް ފިންގަޕްރިންޓް ހުށަހަޅަން ޖެހޭނެ ކަމަށާއި ހުށަނާޅައިފި ނަމަ ޕާޓީން ވަކިކުރާނެ ކަމަށެވެ.

ޕާޓީތަކުގައި ތިބި މެމްބަރުންގެ ތެރެއިން ފިންގަޕްރިންޓް ހުށަހަޅާފައި ނެތް މީހުން ޕާޓީތަކުން ވަކިކުރުމަށް އިލެކްޝަންސް ކޮމިޝަނުން ނިންމުމުން އެމްޑީޕީން ވަނީ އެކަމާ ދެކޮޅަށް ކުރިން ސިވިލް ކޯޓަށް މައްސަލަ ވެސް ހުށަހަޅާފަ އެވެ. އެކަމަކު މިދިޔަ މަހުގެ ފަހުކޮޅު ސިވިލް ކޯޓުން އެ މައްސަލަ ނިންމީ އިލެކްޝަންސް ކޮމިޝަނާ އެއްކޮޅަށެވެ.