ބުރުގާ އެޅިއަސް ވަޒީފާ އިން ކަނޑާނުލެވޭނެ: ސްވިސް ކޯޓު

ޖެނީވާ (އޮކްޓޯބަރު 24) - ސްވިޒަލެންޑުގެ ކުންފުންޏެއްގައި މަސައްކަތް ކުރާ މުސްލިމް އަންހެނަކު ބުރުގާ އެޅުން އުޒުރަކަށް ދައްކާ އޭނާ ވަޒީފާ އިން ވަކި ނުކުރެވޭނެ ކަމަށް އެ ގައުމުގެ ކޯޓަކުން ހުކުމްކޮށްފި އެވެ.

ސްވިޒަލެންޑުގެ މީޑިއާތަކުން ބުނީ މިއީ އެ ގައުމުގެ ކޯޓަކުން ކުރި މި ބާވަތުގެ ފުރަތަމަ ހުކުމް ކަމަށެވެ. ބާންގެ ސަރަހައްދީ ކޯޓަކުން ނިންމާފައި ވަނީ އުމުރުން 29 އަހަރުގެ ސާބިއާގެ އަންހެން މީހާ ވަޒީފާ އިން ވަކިކޮށްފައި ވަނީ މަގްބޫލް ސަބަބެއް ނެތި ކަމަށެވެ. އަދި އޭނާ ވަޒީފާ އިން ވަކިކުރި މުއްދަތުގައި ލިބެން ޖެހޭ މުސާރަ އިޔާދަކޮށް ލިބުނު އެހެނިހެން ގެއްލުންތަކުގެ ބަދަލު ދިނުމަށް އޭނާ މަސައްކަތް ކުރި ޑްރައި ކްލީނިން ކުންފުނީގެ މައްޗަށް ވަނީ އަމުރުކޮށްފަ އެވެ.

އާބިދާ ނަމަކަށް ކިޔާ އަންހެން މީހާ ބުރުގާ އަޅަން ފެށުމުން ވަޒީފާ އިން ވަކިކޮށްފައި ވަނީ ޖެނުއަރީ 2015 ގަ އެވެ. އޭރު އޭނާ ވަނީ އެ ކުންފުނީގައި ހަ އަހަރު މަސައްކަތްކޮށްފަ އެވެ. ކުންފުނިން އަންގާފައި ވަނީ ބުރުގާ އެޅުމަކީ އެ ކުންފުނީގެ ސާފުތާހިރު ކަމުގެ މިންގަނޑާ ޚިލާފު ކަމެއް ކަމަށާއި އެހެންވެ ބުރުގާ ބާލަން ޖެހޭނެ ކަމަށެވެ. ނޫން ނަމަ ވަޒީފާ އިން ވަކިކުރާނެ ކަމުގެ އިންޒާރު ވަނީ ދީފަ އެވެ. އަންހެން މީހާ ވަނީ ކޮންމެ ދުވަހަކު ވެސް އޭނާގެ ބުރުގާ ދޮންނާނެ ކަމަށާއި ނޫން ނަމަ ޑިސްޕޯސެބަލް ބުރުގާ ބޭނުންކޮށްފާނެ ކަމަށް ބުނެފަ އެވެ. ނަމަވެސް މިއިން އެއްވެސް ކަމެއް ކުންފުނިން ގަބޫލް ނުކޮށް އޭނާ ވަނީ ވަޒީފާ އިން ވަކިކޮށްފަ އެވެ.

ކޯޓުގެ ނިންމުންތަކަށް މުސްލިމް ޖަމާއަތްތަކުން ވަނީ ތައުރީފްކޮށްފަ އެވެ.