ކޯމާގައި އޮތް ޒުވާނާގެ ހޮސްޕިޓަލް ބިލްތަކަށް ވެސް އެންސްޕާ އިން އެހީވެއްޖެ

ފުވައްމުލަކުގައި ހިނގި އެކްސިޑެންޓެއްގައި ޒަހަމްވެ، މިހާރު ކޯމާއެއްގައި އޮތް ޒުވާނާއަށް އޭޑީކޭގައި ފަރުވާ ދެމުން އަންނައިރު ހޮސްޕިޓަލަށް ދައްކަން ޖެހޭ ފައިސާގެ ބޮޑު ބައެއް އެންސްޕާއިން ދައްކައިދީފި އެވެ.

ބާރު ސްޕީޑެއްގައި ދުއްވާފައި ދިޔަ ސައިކަލެއް ކޮންޓްރޯލް ނުވެ، ފަޅުގައި އޮތް ދޯންޏަކަށް ވެއްޓި ހިނގި އެކްސިޑެންޓުގައި އުމުރުން 18 އަހަރުގެ ޝަމީން ޖިހާދުގެ ސިކުނޑިއަށް ގެއްލުން ލިބި، ހޭނާރާ އޮންނަތާ މިހާރު ދެ ހަފުތާވާއިރު ހޮސްޕިޓަލުގެ ބިލަށް ލައްކައަކަށް ވުރެ ގިނަ ރުފިޔާ ވަނީ އަރާފަ އެވެ.

ޝަމީންއަށް އޭޑީކޭގައި ފަރުވާ ދެނީ އައިޖީއެމްއެޗުގައި ނިއުރޯ ސާޖަންއެއް ނެތުމުންނެވެ.

އޭޑީކޭގެ އައިސީޔޫ އާއި އެހެން ބައެއް ހިދުމަތްތަކަށް އާސަންދައެއް ނުލިބެ އެވެ. އެހެންވެ، ހޮސްޕިޓަލުގެ ބިލަށް އަރާ ފައިސާގެ ތެރެއިން 60 ޕަސެންޓް އެ ޒުވާނާގެ އާއިލާއިން ދައްކަން ޖެހޭއިރު އޭގެ އަގު 70،000-80،000 ރުފިޔާއަށް އަރާނެ ކަމަށް ލަފާކުރެ އެވެ. އެކަމަކު އާއިލާއިން ދައްކަން ޖެހޭ ފައިސާގެ ދެބައިކުޅަ އެއްބައި އެންސްޕާއިން މިހާރު ވަނީ ދައްކައިދީފަ އެވެ.

ޝަމީންގެ ބައްޕަ ޖިހާދު އަބްދުﷲ ބުނީ އިތުރު ފަރުވާ އަށް ދަރިފުޅު ބޭރަށް ފޮނުވައިދޭށާއި ހޮސްޕިޓަލުގެ ބިލުތަކަށް އެހީ ހޯދަން އެންސްޕާ އަށް އެދުނު ކަމަށެވެ. އެކަމަކު އޭރު ހަމަޖެހެން އޮތީ ކޮންމެވެސް އެއް ކަމެއް ކަމަށް ވާތީ އާއިލާއިން ބޭނުންވީ ބޭރަށް ގެންދިޔުމުގެ ހަރަދާ އެންސްޕާއިން ހަވާލުވާށެވެ.

އެންސްޕާއިން ވަނީ ސަމީންއާ އެކު ދެ މީހެއްގެ ދެކޮޅު ޓިކެޓާއި ސްޓްރެޗާއަކާއި ޑޮކްޓަރަކާއި ނަރުހެއް އިންޑިއާއަށް ފޮނުވައިދޭން އެއްބަސްވެފަ އެވެ. އެކަމަކު އެ ހަރަދުގެ އިތުރުން ހޮސްޕިޓަލުގެ ބިލަށް އެރި ފައިސާގެ ދެބައި ކުޅަ އެއްބައި ވެސް އެންސްޕާއިން މިހާރު ދައްކައިދީފި ކަމަށް އޭޑީކޭ އިން ބުނެފައިވާ ކަމަށް ޖިހާދު ބުންޏެވެ.

"ދަރިފުޅަށް އައިޖީއެމްއެޗުގައި ފަރުވާ ނުދެވުނީ އެތަނުގައި ނިއުރޯ ސާޖަންއެއް ނެތުމުން. އެކަމަކު އޭޑީކޭއަށް ގެނެސް މިކޮޅުގެ އައިސީޔޫގައި ދަރިފުޅު ބާއްވާއިރު ދުވާލަކު 18،000 ނުވަތަ 20،000 ރުފިޔާ އެބަ އަރާ. މިއީ އަޅުގަނޑުމެން ކަހަލަ މީހުންނަށް ދެއްކޭ ވަރަށް ވުރެ ބޮޑު އަދަދަކަށް ވުމުން އާއްމުންގެ އެހީތެރިކަމަށް ވެސް އެދުނީ،" ޖިހާދު ބުންޏެވެ.

އޭނާ ބުނީ ހޮސްޕިޓަލުގެ ބިލުގެ އެއްބައި، އެންސްޕާއިން ދައްކައިދިނުމުން އާއިލާއަށް ވަރަށް ބޮޑު ލުޔެއް ލިބިއްޖެ ކަމަށެވެ. އެކަމަކު ރާއްޖޭން ބޭރުގައި ފަރުވާކުރަން ހޭދަވާނެ ދުވަސް ނޭނގޭތީ އެކަމާ ކަންބޮޑުވާ ކަމަށް އޭނާ ބުންޏެވެ.

މެޝިނުގެ އެހީގައި ނޭވާލައްވަމުން އަންނަ ޝަމީން މާދަމާ އިންޑިއާ އަށް ފޮނުވުމުގެ ހުރިހާ ކަމެއް މިހާރު ހަމަޖެހިފައިވާ ކަމަށް އާއިލާއިން ބުނެ އެވެ.

"ހޮސްޕިޓަލަށް ގެނައިރުއްސުރެ ޝަމީން އެ އޮންނަނީ ކޯމާއެއްގައި. އެކަމަކު އެއްވެސް ޑޮކްޓަރަކު ނުބުނޭ އޭނާ ރަނގަޅު ނުކުރެވޭނެއޭ. އެކަމަށް ގިނަ ދުވަސްތަކެއް ނަގާނެ ކަމަށް ޑޮކްޓަރުން ބުނަނީ،" ޖިހާދު ބުންޏެވެ.

އެ އެކްސިޑެންޓް ހިނގާފައި ވަނީ ޝަމީން އޭނާގެ 15 އަހަރުގެ ފިރިހެން ކޮއްކޮ ގޮވައިގެން ދުއްވާލަން ނިކުމެ އުޅެނިކޮށެވެ. އެކަމަކު އެކްސިޑެންޓްގައި އޭނާގެ ކޮއްކޮއަށް މާ ބޮޑު އަނިޔާއެއް ނުވެ އެވެ. ސައިކަލަށް ވެސް މާ ބޮޑު ގެއްލުމެއް ލިބިފައެއް ނުވެ އެވެ.