އެމްއެންބީސީގެ 1.5 މިލިއަން ރުފިޔާ އަށް ޚިޔާނާތްތެރިވި މީހަކު ޖަލަށް ލާން ކުރި ހުކުމް ދަމަހައްޓައިފި

މޯލްޑިވްސް ނޭޝަނަލް ބްރޯޑްކާސްޓިން ކޯޕަރޭޝަން (އެމްއެންބީސީ) އަށް ޑޮލަރު ހޯދައި ދޭނެ ކަމަށް ބުނެ 1.5 މިލިއަން ރުފިޔާ ނެގުމަށް ފަހު އެއަށް ޚިޔާނާތްތެރިވި މީހަކު 25 އަހަރަށް ޖަލަށްލާން ކޮށްފައިވާ ހުކުމް ހައި ކޯޓުން ދަމަހައްޓައިފި އެވެ.

ސ. މަރަދޫ ރަބީއުގޭ އަހުމަދު ޒަމީން ޖަލަށްލާން މިދިޔަ އަހަރު ކްރިމިނަލް ކޯޓުން ހުކުމްކުރީ ސެޕްޓެމްބަރު، 2011 ގައި އެމްއެންބީސީއަށް 100،000 ޑޮލަރު ހޯދައިދޭނެ ކަމަށް ބުނެ 1.5 މިލިއަން ރުފިޔާ ހޯދުމަށް ފަހު ޑޮލަރު ހޯދައި ނުދީ، އެ ފައިސާއަށް ޚިޔާނާތްތެރިވި މައްސަލައިގަ އެވެ. އޭނާ ޖަލަށްލުމުގެ އިތުރުން އޭނާ ޚިޔާނާތްތެރިވި ފައިސާ އެމްއެންބީސީއަށް ދެއްކުމަށްޓަކައި އެ ފައިސާ ސިވިލް ކޯޓަށް ދައްކަން ވެސް ދަށު ކޯޓުން ޒަމީނަށް އަމުރުކޮށްފައިވެ އެވެ.

އެ މައްސަލަ ޒަމީންގެ ފަރާތުން އިސްތިއުނާފް ކުރުމުން ހައި ކޯޓުން މިދިޔަ ބުދަ ދުވަހު ހުކުމްކުރީ ދަށު ކޯޓުގެ ހުކުމް ރަނގަޅު ކަމަށާއި އެ ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށެވެ. ހައި ކޯޓުގެ ތިން ފަނޑިޔާރުން އިއްތިފާގުވި ހުކުމުގައި ވަނީ ޚިޔާނާތުގެ ކުށުގައި ފުރިހަމަވާންޖެހޭ ހުރިހާ އުންސުރެއް އެ މައްސަލާގައި ފުރިހަމަވާ ކަމަށާއި އެ ކުށް ޒަމީންގެ މައްޗަށް ސާބިތުވާ ކަމަށެވެ.

ޒަމީންގެ ފަރާތުން ބުނެފައިވަނީ ޑޮލަރު ހޯދަން އެމްއެންބީސީން އޭނާއަށް ދިން ފައިސާ އޭނާ ހަވާލުކުރީ އިޓަލީ މީހަކަށް ކަމަށާއި އެ މީހާ ރާއްޖެއިން ބޭރަށް ދިޔަ ގޮތަށް އަނބުރާ ނާންނަ ކަމަށެވެ.

އެކަމަކު ހުކުމުގައި ވަނީ އެ މީހާގެ ނަން ފިޔަވައި އިތުރު އެއްވެސް މައުލޫމާތެއް ޒަމީނަށް ދެވިފައިނުވާ ކަމަށާއި އެ މީހާގެ ވާހަކަ ތަހުގީގުގައި ވެސް ފާހަގަނުކޮށް، ޒަމީން ހަނު ހުރެފައިވާ ކަމަށެވެ. އެހެންވެ އޭނާގެ އަމަލުތަކަށް ބަލާއިރު އެކަމުގައި އޭނާގެ ނުބައި ނިޔަތެއް އޮތްކަން ސާބިތުވާ ކަމަށް ހުކުމުގައިވެ އެވެ.

ޒަމީން ޚިޔާނާތްތެރިވީ 10،000ރ. އަށް ވުރެ ބޮޑު އަދަދެއްގެ ފައިސާއަށް ކަމަށްވާތީ ކުރީގެ ގާނޫނުލް އުގޫބާތުގެ ދަށުން އެ ކުށަށް ޒަމީނަށް އަންނަން ޖެހެނީ 130 އަހަރުގެ ޖަލު ހުކުމެކެވެ. ނަމަވެސް އެއް ކުށަކަށް ދެވޭ އެންމެ ބޮޑު އަދަބަކީ 25 އަހަރަށް ޖަލަށްލުން ކަމަށް އޭރުގެ ގާނޫނުލް އުގޫބާތުގައި އޮތުމުން ޒަމީންގެ އަދަބު 25 އަހަރަށް ކޯޓުން ދަށްކުރީ އެވެ.

އެމްއެންބީސީއަކީ ދައުލަތުގެ މީޑިއާ ހިންގުމަށް ކުރީގެ ރައީސް މުހައްމަދު ނަޝީދުގެ ވެރިކަމުގައި އުފެއްދި ކުންފުންޏެކެވެ.