ޖޫރިމަނާ ނުދެއްކޭ ނަމަ މުޖުތަމައަށް ޚިދުމަތް ކުރުވާ ގޮތަށް ގާނޫނު އިސްލާހުކޮށްފި

ގަވާއިދާ ޚިލާފަށް ޕާކް ކުރުމާއި އެއްގަމު ދަތުރުފަތުރުގެ ގާނޫނާ ޚިލާފު ވެގެން ކުރެވޭ ޖޫރިމަނާ ނުދެއްކޭ ނަމަ، މުޖުތަމައަށް ޚިދުމަތް ކުރަން ލާޒިމު ކުރެވޭ ގޮތަށް ގާނޫނަށް އިސްލާހު ގެނެސް، ރައްޔިތުންގެ މަޖިލީހުން މިއަދު ފާސްކޮށްފި އެވެ.

އެއްގަމު ދަތުރުފަތުރާ ބެހޭ ގާނޫނަށް ސަރުކާރުގެ ފަރާތުން ކުޅުދުއްފުށީ އުތުރު ދާއިރާގެ އެމްޑީޕީގެ މެމްބަރު ޔާސިރު އަބްދުއްލަތީފް ހުށަހެޅުއްވި ބިލުގައި ކުރިން އޮތީ ޕާކިން ޖޫރިމަނާ އާއި އެ ގާނޫނާ ޚިލާފު ވުމުން ކުރެވޭ ޖޫރިމަނާ ފައިސާ ހޯދަން ކޯޓަށް ދިއުމުގެ ބާރު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ލިބޭ ގޮތަށެވެ. އެކަމަކު، ޕާކިން ޖޫރިމަނާ ބޮޑުކުރަން އެ ބިލުގައި ހިމަނާފައެއް ނުވެ އެވެ.

ނަމަވެސް ކޮމިޓީ މަރުހަލާގައި، އެ ބިލަށް ބަދަލު ގެނެސް ނިންމާފައި ވަނީ ޖޫރިމަނާ ފައިސާ ހޯދަން ކޯޓަށް ދިއުމުގެ ބާރު މީރާ އަށް ދިނުމުގެ އިތުރުން ޖޫރިމަނާގެ އަދަދު 10،000ރ. ވުރެ ބޮޑުވާ ނަމަ، ފައިސާގެ ހޯދުމުގެ ބަދަލުގައި އެ މީހަކު ލައްވައި މުޖުތަމައަށް ޚިދުމަތެއް ނުވަތަ މަސައްކަތެއް ކުރުވުމަށް ކޯޓު އަމުރަށް އެދުމުގެ ބާރު މީރާ އަށް ދިނުމަށެވެ. އެކަމާބެހޭ އުސޫލުތައް އެ ގާނޫނުގެ ދަށުން ހަދާ ގަވާއިދެއްގައި ބަޔާން ކުރަން ޖެހޭނެ ކަމަށް އެ ބިލުގައިވެ އެވެ.

އެ ބިލް މަޖިލީހުގެ ޖަލްސާގައި މިއަދު ފާސްކުރީ 62 މެމްބަރުންގެ ވޯޓުންނެވެ. ބިލާ ދެކޮޅަށް އެއްވެސް މެމްބަރަކު ވޯޓެއް ނުދެއްވަ އެވެ.

ޖޫރިމަނާއާ ބެހޭގޮތުން ޝަކުވާ ހުށަހެޅޭނެ ނިޒާމެއް 90 ދުވަސް ތެރޭގައި ޓްރާންސްޕޯޓް މިނިސްޓްރީގެ ދަށުގައި ގާއިމު ކުރުމާއި އެ ނިޒާމުގެ ތެރެއިން ޖޫރިމަނާ ބާތިލް ކުރުމުގެ ބާރު ލިބޭ ގޮތަށް ބިލުގައި ހިމަނާފައިވެ އެވެ. ބާރަށް ދުއްވާ މީހުންނާއި ލައިސަންސް ނެތި ދުއްވާ މީހުންނަށް ކުރެވޭ ޖޫރިމަނާ ބޮޑުކުރަން ވެސް އެ ބިލުގައި ވެ އެވެ.

އެގޮތުން، ސްޕީޑް ލިމިޓަށް ވުރެ ބާރަށް ދުއްވާ ފުރަތަމަ ފަހަރު 500ރ. އިން ޖޫރިމަނާ ކުރުމާއި އެކަން ތަކުރާރުކޮށްފި ނަމަ 750ރ. އިން ޖޫރިމަނާ ކުރުމާ އެކު 48 ގަޑިއިރަށް ލައިސަންސް ހިފެހެއްޓޭނެ އެވެ. އަދި ތިން ވަނަ ފަހަރަކު 1،000ރ. އިން ޖޫރިމަނާ ކުރުމާ އެކު، އެ މީހަކު ދުއްވި އުޅަނދު 15 ދުވަހަށް ހިފެހެއްޓޭ ގޮތަށް ބިލުގައި ހިމަނާފައިވެ އެވެ.

ނުރައްކާތެރިކޮށް ދުއްވުމުގެ ސަބަބުން މީހެއްގެ ފުރާނަ އަށް ގެއްލުމެއް ލިބިއްޖެ ނަމަ، ދެވޭ އަދަބު ވެސް ބޮޑުކުރަން އެ ބިލުގައި ވަނީ ހިމަނައިފަ އެވެ. އެގޮތުން، ގާނޫނުލްއުގޫބާތުގެ ދަށުން އެ މީހަކަށް ޖިނާއީ ދައުވާ ކުރުމާ އެކު، ލައިސަންސް 10 އަހަރާއި 25 އަހަރާ ދެމެދުގެ މުއްދަތަށް ހިިފެހެއްޓުމުގެ ބާރު ލިބޭ ގޮތަށް ހެދުމާއި އެފަދަ އަމަލެއްގެ ސަބަބުން ހަށިގަނޑަށް ގެއްލުމެއް ލިބިއްޖެ ނަމަ، ޖިނާއީ ދައުވާ ކުރުމާ އެކު ހަ މަހާއި ފަސް އަހަރާ ދެމެދުގެ މުއްދަތަށް ލައިސަންސް ހިފެހެއްޓޭނެ ކަމަށް ވެސް އެ ބިލުގައިވެ އެވެ.

ވަކި ރަށެއް ނުވަތަ އަތޮޅެއްގައި ދުއްވޭނެ އުޅަނދުގެ އަދަދާއި މުއްދަތު ކަނޑައެޅުމުގެ ބާރު މިނިސްޓްރީ އަށް ލިބޭ ގޮތަށް ސަރުކާރުން ބިލް ހުށަހެޅިޔަސް، ކޮމިޓީ މަރުހަލާއިން ނިންމީ އެ ބާރު ސިޓީ ކައުންސިލްތަކަށް ދިނުމަށެވެ. އެކަމަކު ސިނާއީ ސަރަހައްދުތަކުގައި އެ އަދަދު ކަނޑައަޅާނީ މިނިސްޓްރީން ކަމަށް ބިލުގައިވެ އެވެ.