ކާބަން މަދުކުރަން މަސައްކަތްކުރަމުން ވެސް ކުރިއެރުން ހޯދޭނެ: ނަޝީދު

ގިނަ ފޮސިލް ފިއުލް އަންދައި ގިނަ ކާބަން ބޭރުކުރުމުގެ ހައްގު އޮންނަން ގައުމުތަކުން ބޭނުންވަނީ އެގޮތަށް ކަންތައް ކުރުމުން މުއްސަނދިވާނެ ކަމަށް ދެކޭތީ ކަމަށާއި އެކަމަކު ކާބަން މަދު ސްޓްރެޓެޖީތަކުން ވެސް ހަމަ އެވަރުގެ ކުރިއެރުމެއް ހޯދޭނެ ކަމަށް ރައްޔިތުންގެ މަޖިލީހުގެެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ވާޗުއަލްކޮށް މިއަދު ފެށި ފަސްވަނަ ވޯލްޑް ކޮންފަރެންސް އޮފް ސްޕީކާސް އޮފް ޕާލަމެންޓްގައި ތަގުރީރު ކުރައްވަމުން ނަޝީދު ވިދާޅުވީ ގިނަ ކާބަން ބޭރުކުރަން ބޭނުންވުމަކީ އެންމެން ވެގެން އަމިއްލަ އަށް މަރުވުމުގެ ރެެސިޕީއެއް ކަމަށެވެ. ގިނަ ކުރިއެރުންތަކެއް ލިބޭ ގޮތަށް، އެހެން ނަމަވެސް 2050 ވަަނަ އަހަރާ ހިސާބަށް ދާއިރު ކާބަން ބޭރުކުރާ މިންވަރު ސުމެއްގައި ބަހައްޓަން އަމާޒު ހިފައިގެން އިގުތިސާދީ ޕްލޭންތައް އެކުލަވައިލަން ތަރައްގީވަމުން އަންނަ ގައުމުތަކަށް ހުށަހަޅުއްވާ ކަމަށް ވެސް އެމަނިކުފާނު ވިދާޅުވި އެވެ. ނަޝީދު ވިދާޅުވި ގޮތުގައި ހުރިހާ ގައުމެއްގައި ކާބަން ބޭރުކުރާ މިންވަރު ސުމަކަށް ހެދޭނެ ޕްލޭންތައް އިގުތިސާދާއި ހަކަތައިގެ މާހިރުން އެކުލައިލަން ބޭނުމެވެ.

"ތަރައްގީގެ ތަފާތު މަގަކުން ވެސް އަޅުގަނޑުމެންނަށް ހަމަ އެއް އިގުތިސާދީ ނަތީޖާތަކެއް ހޯދިދާނެ. ކާބަން މަދު ތަރައްގީގެ ސްޓްރެޓެޖީއެއް ހޯދުމާއެކުގައި ވެސް އިގުތިސާދީ ގޮތުން ހަަމަ އެއް ނަތީޖާތަކެއް ދެމެހެއްޓިދާނެ،" ނަޝީދު ވިދާޅުވި އެވެ.

އެމަނިކުފާނު ވިދާޅުވި ގޮތުގައި ކާބަން މަދުކޮށް ހިންގާ ތަރައްގީގެ މަޝްރޫއުތައް އެނޫން މަޝްރޫއުތަކަށް ވުރެ އަގުވެސް ވަކި ބޮޑެއް ނޫނެވެ. މިސާލަކަށް ނެންގެވީ އިންޑިއާގައި ކަރަންޓް އުފައްދާނެ ބަޔަކު ހޯދަން ދާދި ފަހުން ހުޅުވާލި ބިޑެކެވެ. އެ މަޝްރޫ އަަށް ދެބިޑެއް ހުށަހެޅި އިރު އަގުހެވީ ކާބަން މަދު ބިޑް ކަމަށް ނަޝީދު ވިދާޅުވި އެވެ.

މޫސުމަށް އަންނަ ބަދަލުތަކާ ބެހޭ ގޮތުން ބައިނަލްއަގުވާމީ ގޮތުން ކުރާ މަޝްވަރާތަކުގައި ހަމަހަމަކަމެއް ނެތް ކަމަށް ވިދާޅުވެ، އެކަމުގައި ހުޅަނގުގެ ގައުމުތަކުން އަމަލުކުރަމުންދާ ގޮތަށް ނަޝީދު ފާޑުވިދާޅުވި އެވެ. ދުނިޔެ ހޫނުވުން ހުއްޓުވޭނީ ރާއްޖެ އާއި ރާއްޖޭގެ އަވަށްޓެރިން ފަދަ ތަރައްގީވަމުން އަންނަ ގައުމުތަކުން ކާބަން ބޭރުކުރުން ހުއްޓުވައިގެން ކަމަށް، ހުޅަނގުގެ ގިނަ ގައުމުތަކުންނާއި ތިމާވެށްޓަށް މަސައްކަތްކުރާ ބައެއް ޖަމިއްޔާތަކުން ދެކޭ ކަމަށް އެމަނިކުފާނު ވިދާޅުވި އެވެ. އެކަމަކު ތަފާސްހިސާބުތަކުން ފެންނަން އޮތީ އެހެނެއް ނޫން ކަމަށް ވިދާޅުވެ، ތަރައްގީ ވަމުން އަންނަ ގައުމުތަކާއި ކުރިއަރާފައިވާ ބައެއް ގައުމުތަކުގައި ހަކަތަ ބޭނުންކުރާ މިންވަރު އެމަނިފާނު އަޅާކިއުއްވި އެވެ.