5ޖީ އާ އެކު ބްލެކްބެރީ ފޯނު އަންނަ އަހަރު ނެރެނީ

މި އަހަރުގެ އޮގަސްޓް މަހުން ފެށިގެން ބްލެކްބެރީ ފޯނުގެ ވިޔަފާރި ހުއްޓާލާނެ ކަމަށް ބުނެފައި ވަނިކޮށް 5ޖީ ނެޓްވޯކާ އެކު އަންނަ އަހަރު ބްލެކްބެރީ ފޯނު ނެރެން ނިންމައިފި އެވެ.

ބްލެކްބެރީ އަކީ މިހާރު ޓީސީއެލްގެ ދަށުގައި އޮތް ބްރޭންޑެކެވެ. ޓީސީއެލުން ބްލެކްބެރީ ގަތީ 2016 ގަ އެވެ. އެ ބްރޭންޑްގެ ފޯނު މި އަހަރުން ފެށިގެން ވިއްކުން ހުއްޓާލާނެ ކަމަށް އިއުލާންކޮށްފައި ވަނިކޮށް އަންނަ އަހަރުގެ ތެރޭގައި ނެރެން ނިންމާފައިވާ އެންޑްރޮއިޑް ސަޕޯޓްކުރާ ފޯނު އަންނާނީ އޭގެ އައިކޮނިކް ކީޕެޑާ ވެސް އެކުގައި ކަމަށް މީޑިއާތަކުން ބުންޏެވެ.

އެމެރިކާގެ ޓެކްސަސްގެ ސްޓާޓްއަޕެއް ކަމަށްވާ އޮންވާޑް މޯބިލިޓީއާ ގުޅިގެން ނެރޭ ބްލެކްބެރީގެ އާ ފޯނަކީ ވިޔަފާރި އާއި ސަރުކާރުތަކުގެ ވިއުގަތަކަށް ހާއްސަ އެއްޗަކަށްވާނެ އެވެ.

އޮންވާޑް މޯބިލިޓީގެ ސީއީއޯ ޕީޓާ ފްރޭންކްލިން ވިދާޅުވީ ބްލެކްބެރީގެ އާ ފޯނު ނެރޭނީ އާ ޑިޒައިނާ އެކުގައި ކަމަށާއި ކުރީގެ ޑިޒައިންތައް ބޭނުން ނުކުރާނެ ކަމަށެވެ. އެކަމަކު ކުރީގެ މޮޑެލްތަކުގެ ކީބޯޑާއި އާ ފޯނުގެ ކީ ބޯޑާ ވައްތަރު ގޮތްތަކެއް ހުންނާނެ ކަމަށް ވިދާޅުވި އެވެ.

"އަހަރެމެންގެ ޓާގެޓަކީ ބޭނުންކުރަން ހުރިހާ ގޮތަކުން ވެސް ރައްކާތެރި އަދި ބޭނުން ކުރަން ވެސް ފަސޭހަ ފޯނެއް ނެރުން،" ފްރޭންކްލިން ވިދާޅުވި އެވެ. "އޭގެ މާނަ އަކީ ކެމެރާ އާއި އެ ނޫން ވެސް ވަރަށް ފީޗާތައް ވަރަށް ފަސޭހައިން ބޭނުންކޮށްލެވޭ ގޮތަށް ބްލެކްބެރީގެ އާ ފޯނު އަންނާނީ."

ބްލެކްބެރީގެ ސީއީއޯ ޖޯން ޗެން ވިދާޅުވީ އޮންވާޑާ ގުޅިގެން 5ޖީ ފޯނެއް ނެރުމަކީ ވަރަށް ބޮޑު އުފަލެއް ކަމަށެވެ. އޭނާ ވިދާޅުވީ ބްލެކްބެރީ ސްމާޓްފޯނުވެގެން ދާނީ ކަސްޓަމަރުން އިތުބާރުކުރާ ގަޔާވާނެ އެއްޗަކަށް ކަމަށެވެ.

ދެހާހުގެ އަހަރުތަކުގެ ކުރީކޮޅު އާންމުންގެ ތެރޭގައި ބޮޑު މަގުބޫލުކަމެއް ހޯދި ބްލެކްބެރީ ފޯނުގެ މާކެޓް ގެއްލުނީ އެޕަލް އާއި ގޫގުލް ފަދަ ކުންފުނިތަކުގެ ވާދަވެރިކަން ބޮޑުވާން ފެށުމާ އެކީގަ އެވެ. ސްމާޓްފޯނު އުފެއްދުމުގެ ވިޔަފާރީގައި މިހާރު އެންމެ ވާދަވެރިކަން ބޮޑީ އެޕަލް އާއި ދެކުނު ކޮރެއާގެ ސެމްސަންގާ ދެމެދު އެވެ.

ބްލެކްބެރީގެ އާ ފޯނު އަންނަ އަހަރު އެންމެ ފުރަތަމަ ނެރެން ނިންމާފައި ވަނީ އުތުރު އެމެރިކާ އާއި ޔޫރަޕްގެ މާކެޓަށެވެ. އެކަމަކު ސީދާ ތާރީހަކާއި އަގު އަދި އިއުލާނެއްނުކުރެ އެވެ. އެކަމަކު އަހަރު ދެބައިވުމުގެ ކުރިން ނެރޭނެ ކަމަށް އޮންވާޑުން ބުނެ އެވެ.