ކުޅުދުއްފުށިން އިތުރު ދެ މީހަކު ކޮވިޑަށް ޕޮޒިޓިވް ވެއްޖެ

ހދ. ކުޅުދުއްފުށިން އިތުރު ދެ މީހަކު ކޮވިޑް-19 އަށް ޕޮޒިޓިވް ވެއްޖެ އެވެ.

އެ ސިޓީ އަށް ދިޔަ "ފާޅު" ބޯޓުގެ ފަޅުވެރިއަކު އެ ބައްޔަށް ޕޮޒިޓިވްވުމާ ގުޅިގެން ކުޅުދުއްފުއްޓާއި އެ ބޯޓު ޖެއްސި ނޮޅިވަރަމަށް ވެސް މީހުން އަރައިފޭބުން އެޗުޕީއޭ އިން ވަނީ މަނާކޮށްފަ އެވެ.

އެޗުއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި އެ އިދާރާގެ ތަރުޖަމާނު ޑރ. ނަޒްލާ ރަފީގު ވިދާޅުވީ، ކުޅުދުއްފުށިން މިހާތަނަށް 11 ސާމްޕަލް ނަގާފައިވާ ކަމަށެވެ. އޭގެ ތެރެއިން ދެ މީހަކު ކޮވިޑަށް ޕޮޒިޓިވްވެފައިވާ ކަމަށް އޭނާ ވިދާޅުވި އެވެ. ކޮންޓެކްޓު ޓްރޭސިންގެ ތެރެއިން ނޮޅިވަރަމުން ވެސް އިތުރު ދެ ކޮންޓެކްޓުން ފެނިފައިވާ ކަމަށް ޑރ. ނަޒްލާ ވިދާޅުވި އެވެ.

ރާއްޖެ އިން މިހާތަނަށް 20 ރަށަކުން ޕޮޒިޓިވް ކޭސްތައް ފެނިފައިވާއިރު މިހާރު މޮނިޓަރިންގައި އޮތީ ގދ. ހޯނޑެއްދޫ، ހދ. ކުޅުދުއްފުށި އަދި ހދ، ނޮޅިވަރަމެވެ. ހޯނޑެއްދޫން 44 ކޭސް ފެނިފައިވާއިރު އެ ރަށުގައި އަދިވެސް އެޗްޕީއޭ އިން ދަނީ ގެތަކަށް ޒިޔާރަތްކޮށް ހާލުބަލަމުންނެވެ. މިހާތަނަށް 75 ގެއަކަށް ޒިޔާރާތްކޮށް، ބަލީގެ އަލާމާތް ހުރި މީހުންގެ ސާމްޕަލް ދަނީ ނަގަމުންނެވެ. އެގޮތުން މިއަދު ވެސް ހަތަރު މީހެއްގެ ސާމްޕަލް ނަގާފައިވާ ކަމަށް ޑރ. ނަޒްލާ ވިދާޅުވި އެވެ.

ރާއްޖެ އިިން މިހާތަނަށް ކޮވިޑް-19 އަށް ޕޮޒިޓިވްވެފައި ވަނީ 10،45 މީހެކެވެ. އޭގެ ތެރެއިން 8،754 މީހުން ރަނގަޅުވެފައިވާއިރު ފާއިތުވި ދެ ހަފުތާގެ ތެރޭގައި ޕޮޒިޓިވް ކޭސްތަކުގެ އަދަދު އަންނަނީ ދަށްވަމުންނެވެ.